Read lunyore 2 ABARUCHI 25 Bible Online

2 ABARUCHI 25 - lunyore bible

2 ABARUCHI 25

¹Sedekia yakhol'la omuruchi Nebukadinesa wa Babulonia indiri kho Nebukadinesa omuruchi wa Babulonia yeetsa nabasikaribe bosi ma naseera Yerusalemu, khwitukhu lielikhumi khumwesi kwelikhumi mumuhika kwakharano nakhane okwoburuchi bwa Sedekia. Bombokha ekambi yabwe esioba welitookho ma nibombokha amasisi kokhulifumbila,

²ma nibalifumbila okhwola omuhika kwelikhumi namulala kwoburuchi bwa Sedekia.

³Khwitukhu liakharano nakhane liomwesi kwakhane khumuhika tsana, inzala yali inyingi mwitookho ma abandu nibatakha ebiakhulia.

⁴Kho nilwo olwa bafunaka muluhinga lwe litookho. Kata nikali Abababulonia bali nibafumbiye litookho, omuruchi halala nabasikaribe bebisa ma nibelukha nobutukhu. Babir'ra khunjila yomubwinjil'lo obwali hakari wamasisi kabili akali ahembi nomukunda kwomuruchi, ma nibelukha nibahengele mwibanda lia Yorodani.

⁵Nebutswa abasikari ba Babulonia balondel'la omuruchi Sedekia ma nibamufumil'la musipaapi esili ahembi Yeriko, ne abasikaribe nibelukha nibamulekha.

⁶Nibatiila omuruchi Sedekia ma nibamuhila imbeli womuruchi Nebukadinesa, owali nali mwitookho lia Ribula, ma Nebukadinesa namukhalachila esiina.

⁷Beera abasiani ba Sedekia naye nareyekhwo tsimoni; ma omuruchi Nebukadinesa nalaka mbu tsimoni tsia Sedekia tsihinibwe musihanga nibamuboha neminyol'lo ma nibamuhila Babulonia.

⁸Khwitukhu liakhane nakhataru khumwesi kwakharano, mumuhika kwelikhumi nakharano nakhane kwa Nebukadinesa omuruchi wa Babulonia, Nebusaradani, omuchetsiyi omukhongo womuruchi khandi etswoni yabasikaribe yenjila Yerusalemu.

⁹Yasamba Ehekalu, inyumba yomuruchi nende tsinyumba tsiabandu abakhongo mu Yerusalemu tsiosi. Sieinyumba ikhongo yasambwa.

¹⁰Balikul'la amasisi kelitookho lia Yerusalemu.

¹¹Ma Nebusaradani nabukula abandu abasitsa bosi abali nibasikala mwitookho nende yabo abali nibelukhila Babulonia, halala nabomukanda kundi kwosi ma nabahila mubuhambe Babulonia.

¹²Nebutswa Nebusaradani yalekha mu Yuda balala khubandu abamanani bomusibala okhulinda emisabibu nokhulima emikunda.

¹³Abababulonia bafunaka etsisiilo tsiomukasa, nende amakaari akali mu Hekalu, nelitangi liomukasa likali ma nibahila omukasa kwosi Babulonia.

¹⁴Khandi babukula tsindabu nemiikho, namamaki, nebichiiko, nebindu bindi biosi ebialombwa khumukasa ebiarumikhilwanga mubwekayakayi bwemu Hekalu.

¹⁵Babukula siesindu esialombwa khufetsa nohomba khutsahabu nibilimwo tsindaabo nende ebifuria biokhukinga amanda kang'aliye.

¹⁶Ebindu bialombwa khumukasa ebia Solomoni yali niyalombela Ehekalu yo MWAMI singa etsisiilo tsibili, nelitangi, nende amakaari biali ebisiro ebiranyala okhuchelwa.

¹⁷Esichelo siabuli esiilo siali etsimiita munane okhutsia ikulu, ne khwikulu khwasio yalikhwo ekofia yomukasa ehela emita ndala netsisentimita tsitaru. Okhubotokhana khukofia yosi yahomelwakhwo omukasa niyang'onibwakhwo nende amakomamango akalombwa khumukasa.

¹⁸Khandi Nebusaradani etswoni wa basikari yafumila Seraya Omwesaalisi Omukhongo, nende Sefania omwesaalisi omulondi womwesaalisi Omukhongo nende abakhongo bandi bataru bomu Hekalu; ma nabahila mubuhambe.

¹⁹Khandi yafumila okhurula mwitookho omukhongo wabasikari, nende abachetsiyi barano bomuruchi abali nibasikala mwitookho; nende omulondi wetswoni owasilinjil'langa amahandiko kamahe nende abandu abandi abakhongo amakhumi kasasaba.

²⁰Nebusaradani omukhongo wabasikari yababukula nabahila khumuruchi wa Babulonia owali nali Ribula,

²¹mulusoma lwa Hamatsi. Ebwene iyo omuruchi yalaka mbu bakhupwe ma berwe. Kho abandu ba Yuda bahilwa mubuhambe okhurula musibala siabwe.

²²Omuruchi Nebukadinesa wa Babulonia yakhola Gedalia omusiani wa Ahikamu omwitsukhulu wa Shafani okhuba omukafuna wa Yuda ma namura okhusinjil'la abandu bali nibasikaye musibala sia Yuda.

²³Ne olwa abakhongo babasikari ba Yuda nende abasikari abarayehana mumakhono ka Bababulonia bahul'la mbu Gedalia yali nakhol'lwe omukafuna kho batsia okhweyongo khuye ha Misipa. Nabo bali, Ishimaeli omwana wa Netsania, Yohanani omwana wa Karea, Seraya omwana wa Tanihumetsi okhurula mwitaala lia Netofa, Yaasania okhurula Maaka halala nende abandu babwe.

²⁴Gedalia nababool'la mbu: “Muhelesianga ling'ana lianje mbu murabba noburi khubakhongo ba Bababulonia tawe, menyenje musibala yisi nimurumikhila omuruchi wa Babulonia; ne kosi kalaba amalahi khwinywe.”

²⁵Nebutswa khumwesi kwakhane nakhataru, Ishimaeli omwana wa Netsania omwitsukhulu wa Elishama oweinyumba yoburuchi, yatsia Misipa nabandu likhumi nibamwinjil'la Gedalia ma nibamwira. Khandi yera Abaisiraeli nende Abababulonia abali n'naye Misipa.

²⁶Kho Abaisiraeli bosi abati nabakali halala nende abakhongo bamahe barula nibatsia Emisiri, sichila bali nibariye Abababulonia.

²⁷Ne mumuhika kwa Ewili Merodaki yakholwa okhuba omuruchi wa Babulonia yakhol'la Yehoyakini omuruchi wa Yuda, aketsimbabasi khulwokhumulakhuula okhurula mubuhambe. Akene yaka kekholekha khwitukhu liamakhumi kabili nakane nakataru khumwesi kwelikhumi nakhabili mumuhika kwamakhumi kataru nachine nachitaru inyuma wa Yehoyakini omuruchi wa Yuda okhuhilwa mubuhambe.

²⁸Khandi Ewili Merodaki yamukhol'la bulahi namuha indebe yoluyali olukali okhuyomba tsindebe tsiabaruchi aba yali n'nabo mubuhambe Babulonia.

²⁹Kho Yehoyakini yahuchil'lwa okhuhiinia tsingubotsie tsiobubohe ma alitsenje khumesa yomuruchi amatukhu kobulamubwe kosi.

³⁰Ne buli litukhu oluhono lwa yali nasili omulamu yahebwanga omukabwakwe kwa khasotso khulwo khurumikhila khu kosi aka yatakhanga.