Read lunyore 2 ABARUCHI 3 Bible Online

2 ABARUCHI 3 - lunyore bible

2 ABARUCHI 3

¹Mumuhika kwelikhumi namunane olwa Yehoshafati yali omuruchi wa Yuda, Yoramu omwana wa Ahabu yachaaka okhwamiha Isiraeli mu Samaria, naye yamiha khulwemihika likhumi na chibili.

²Yakhola amabi imbeli wo MWAMI, nebutswa siali singa papawe nohomba mububibwe tawe, sichila yeha esiilo ya samwana yombokhela Baali.

³Kata mbwo yachila Isiraeli nekhola tsimbi singa Yeroboamu omwana wa Nebati, ne siyalekha okhwonona.

⁴Mesha, omuruchi wa Moabu yali omusitsa wokhuruka amakondi, ne buli muhika yahaananga ebimeme etsielefu emia ndala nende obwoya okhurula amamiiku etsielefu emia ndala singa obusuru khumuruchi wa Isiraeli.

⁵Nebutswa olwa omuruchi Ahabu yafwa, omuruchi wa Moabu yakhool'la Isiraeli induli.

⁶Kho Yoramu omuruchi wa Isiraeli yarula Samaria ma nabunjelesia emikanda chiabasikaribe bosi mu Isiraeli.

⁷Yaruma ling'ana khu Yehoshafati omuruchi wa Yuda naboola mbu, “Omuruchi wa Moabu ukholeye induli; mbula naukhonye nakhumuseere noho?” Omuruchi Yehoshafati namukalusia naboola mbu, “Nanzie n'nawe, okhuba ise ndi halala n'nawe abasikari banje nende ababo nibalala khandi etsisululi tsianje netsisaio.”

⁸Ma nareeba mbu, “Nakhulonde khunjila elihena?” Naye Yoramu nakalusia mbu, “Khulatsila khunjila eyomusitsimi sia Edomu.”

⁹Kho Yoramu, omuruchi wa Isiraeli nende abaruchi ba Yuda nende Edomu barula nibatsia mwihe. Ne olwa bali nibakhachenda khulwa amatukhu kane nakataru amaatsi kahwelel'la abasikari babwe nende etsisululi tsiabwe.

¹⁰Ma omuruchi wa Isiraeli naboola mbu, “Oo ifwe khufwiye! OMWAMI ukhureye halala ifwe abaruchi bataru mbu akhuhaane m'makhono kabasikari ba Moabu!”

¹¹Nebutswa omuruchi Yehoshafati yareeba mbu, “Abulakhwoho omuroobi wo MWAMI musibala sino owakhunyala okhureeba OMWAMI okhubir'ra muye?” Kho mulala khubakhongo babasikari bomuruchi wa Isiraeli nakalusia mbu, “Aliho omusiani wa Shafati olangwa Elisha. Niye owalinji omulondel'li wa Eliya.”

¹²Ne Yehoshafati naboola mbu, “Ye nomuroobi watooto.” Abaruchi bataru yabo bamala nibatsia khu Elisha.

¹³Elisha yabool'la omuruchi wa Isiraeli mbu, “Nisina esiakhachila khukhonye ibe? Tsia oreebe abaroobi ba so nende mamawo basaayanga.” Nebutswa omuruchi wa Isiraeli yamubool'la mbu “A tawe, OMWAMI niye okhureye halala ifwe abaruchi bataru mbu okhuhane mumakhono kabasikari ba Moabu.”

¹⁴Elisha naboola mbu, “Ndesuhanga khu MWAMI oli mwoyo, owarumikhilanga mbu, sindakhakhukhonyelekhwo kata nahati, nirakhalutsi Yehoshafati omuruchi wa Yuda oli noluyali.

¹⁵Nebutswa luno nder're omwembi.” Nolwa omwembi yakhupa obukhana, obunyali bwo MWAMI bwekha khuye,

¹⁶ma naboola mbu, “OMWAMI aboolanga amang'ana yaka, ‘Lime amako m'mutalo omwomu yiku kwosi.

¹⁷Okhuba OMWAMI aboolanga mbu, kata nikali simulalola obusindu kata ifula tawe, amaatsi kaletsula m'mutalo yikwo, kho mulanywakhwo inywe, netsing'ombe tsienywe halala nende etsisolo tsienywe.’ ”

¹⁸“Ling'ana yili neliangu mumoni mwo MWAMI; khandi alamuha obulechi khu Bamoabu.

¹⁹Mulaleka amatookho kabwe kosi akasiirwa namasisi akali amalahi okhusila, khandi mularemachila hasi emisaala chiabwe chiosi, nimwikal'la ebitaho biabwe, ne mulononia emikunda chiabwe emilahi.”

²⁰Omukamba kwelitukhu elialondakhwo, khunyinga yokhuhaana omusango, omusango kwa bulitukhu mukamba tsuli, amaatsi keetsa okhurula khunjila erulanga Edomu, ma niketsusia esibala siosi.

²¹Olwa Abamoabu bahul'la mbu abaruchi bataru bali nibetsele okhubalwana, abasaatsa bosi abanyala okhuchinga ebilasan'nwe okhurula khubati okhwola khubakhulundu, balangwa ma nibarebwa ham'paka okhulindil'laho.

²²Olwa babuukha mukamba tsuli, eliuba liali niliakhanga khumaatsi ma nilikakhola okhwakhanya singa amatsahi mutsimoni tsia Bamoabu.

²³Nabo mbaboola mbu, “Yaka namatsahi! Okhwola abaruchi bataru babe nibalwan'ne abene khubene ma nibeeran'ne. Chende khutsie okhumulula etsikambi tsiabwe.”

²⁴Nebutswa olwa boola khukambi ya Baisiraeli, Abaisiraeli babaseera nibabakhuya, ma Abamoabu nibelukha mutsimoni tsiabwe. Abaisiraeli batsilil'la okhulondel'la nende okhwira Abamoabu

²⁵ma nibakhuya amatookho kabwe. Ne khubuli omukunda omulahi okwababir'rangakhwo siomundu wosi yafuubangakhwo lichina okhwola olwa amachina ketsulamwo. Bekal'la ebitaho biamaatsi biosi, ma nibaremachila emisaala chiosi hasi, okhwola olwa amachina ketsula buli habundu. Mukhumalila Kiri Hareseti lionyene, nilio eliali nilisikaye, ne abemilinga balifumbila ma nibaliseera.

²⁶Olwomuruchi wa Moabu yalola nalekel'lwanga mwihe, yabukula abandu betsinganga etsimia chine nachitaru natema okhubir'ra hakari wabasuku mbu yelukhile Siria, nebutswa sikanyalikha tawe.

²⁷Kho yabukula omusianiwe omukhulundu, owakharuchile musilenjesie, namuhana asambilwe khwisisi liomwitookho singa omusango khunyasaye wa Moabu. Abaisiraeli bamala nibatechela okhusila, ma bamala nibarula Moabu nibakalukha musibala siabwe.