Read lunyore 2 ABARUCHI 4 Bible Online

2 ABARUCHI 4 - lunyore bible

2 ABARUCHI 4

¹Omukhasi wa mulala khubasiani babaroobi yalakayila Elisha naboola mbu, “Omwami, omusaatsa wanje wafwa. Singa omanyile yali omundu owariitsanga OMWAMI, ne luno omundu wali niyamukopia amapesa witsile amapesa okhubukula abaana banje babili babe abasumbabe khwikobi eliomusaatsa wanje.”

²Elisha namureeba mbu, “Ndakhakhukhol'lakhwo sina? Mbol'la, nisina esiolikhwo n'nasio munzu?” Omukhasi tsana namukalusia naboola mbu, “Omwami ise mbulakhwo esindu siosi munzu, nerali echupa ndititi yamafura komuseituni.”

³Elisha namubool'la mbu, “Tsia hosi hosi, osabe abamenyanibo tsisongo tsikhaya tsinyinji etsionyala okhunyoola.

⁴Ma ibe nende abasianibo mwinjile munzu ma mweyikal'le mwo. Oronyie amafura mutsisongo nobiikha sibeka buli isongo yitsuye amafura.”

⁵Kho omukhasi yenjila munzuye nabasianibe, niyekala omuliango. Abasianibe nibamuleer'ra tsisongo naye natsukhil'lamwo amafura.

⁶Olwe tsisongo tsiosi tsiali ntsitsuye, yareeba nikali eyindi yosi yali nesikaye. Mulala khubasianibe namukalusia mbu, “Ebulakhwoho esikaye kata ndala tawe, tsiosi tsihweye.” Ma amafura nikalekha okhusundukhil'la.

⁷Nilwo olwa yetsa okhubool'la omuroobi Elisha, ma naye namubool'la, “Tsia okusie amafura ma orunge amakobi kaako, ne amapesa aketsa okhusikala orumikhile halala nabasianibo.”

⁸Litukhu lindi Elisha yatsia Shunemu, ahomukhasi mulala omuhinda yamenya. Omukhasi uyo yamuhomba yeetse okhulia esiokhulia. Kho kali mbu lwosi olwa Elisha yatsitsanga Shunemu, yenjilanga munzu mwomukhasi uyu okhulia esiokhulia.

⁹Omukhasi uyo yabool'la omusaatsawe mbu, “Ndi nobusubili mbu omundu witsanga hano khasotso uyu nomutsienukhu wa Nyasaye.

¹⁰Lekha khumulombele esikoti silala mukorofa yeinyamba yefwe, ma khumurelemwo esitanda, emesa, indebe, nende etaya; kho olwa nayetsenje okhukhukonya, nahulukhilenjemwo.”

¹¹Litukhu lindi Elisha yatsia Shunemu yenjila musikoti yisio ma niyerulil'lamwo.

¹²Yabool'la Gehasi omurumikhiliwe mbu, “Tsia olange omukhasi Omushunemu ula.” Ne olwa yali niyetsele,

¹³Elisha nabool'la Gehasi mbu, “Mureebe nisina esiandakhamukhool'lakhwo sichila akhulindanga nakhunyakhan'na okhusila. Haundi yakhenya areebelwe ling'ana khumuruchi nohomba khu etswoni osinjiliye abasikari bosi.” Omukhasi yakalusia naboola mbu, “Ise menyanga bulahi nende abandu banje ne sindakhangakhwo esindu tawe.”

¹⁴Elisha nareeba Gehasi, “Kho nisina esia ndakhamukhol'la?” Gehasi namukalusia “Abulakhwo omwana wosi tawe, ne omusaatsawe nomusakhulu.”

¹⁵Elisha naboola mbu, “Mulange yetse hano.” Ne olwa Gehasi yamulanga, yasinjila hasiliango.

¹⁶Elisha namubool'la mbu, “Omuhika kwetsa inyinga singa yino olwa nayoole nofumbel'le omwana omusiani.” Omukhasi naboola mbu, “Omwami wanje, ibe omundu wa Nyasaye orambehelakhwo, ise omurumikhiliwo tawe.”

¹⁷Nebutswa singa Elisha yali nabooye, omukhasi yabelekha, ma niyebula omwana omusiani inyinga tsana omuhika okwalondakhwo.

¹⁸Olwa omwana yali nakhul'le, litukhu lindi munyinga eyokhuchesa, yatsia khu samwana owali nali m'mukunda nabachesibe.

¹⁹Nonoho yekan'na samwana naboola mbu, “Makowe omurwe kukhomakaa.” Samwana nabool'la omurumikhili omusumbawe mbu, “Mubukule omuhile khunyinawe.”

²⁰Omurumikhili uyo yamuchinga ma namuhila khunyina. Yekhala khumakulu ka nyinawe okhwola etsisaa tsisasaba ma nafwa.

²¹Nyina yamuchinga namwalisia khusitanda sia Elisha, nakalusia omuliango, ma narula esioba.

²²Kho nalanga omusaatsawe namubool'la mbu, “Rumila mulala khubarumikhili yetse nepunda mbe onyala okhutsia bwangu khumuroobi Elisha, ma nyanguhe okhukalukha.”

²³Omusaatsawe namureeba mbu, “Busina wenya okhutsia olwaleelo? Silili litukhu liesabato nohomba eliokhuchiaka omwesi omuhia tawe.” Naye namubool'la mbu, “Orahendela tawe.”

²⁴Narechekha epunda, ma nalaka omurumikhili mbu, “Lomba epunda yilukhe bwangu ne oratsihila kalaha tawe.”

²⁵Kho yarula natsia khusikulu sia Karimeli aha Elisha yali nali. Olwa Elisha yamulola niyetsanga, yabool'la Gehasi mbu, “Lola, omukhasi Omushunemu yetsanga.

²⁶Yilukha tsia omwakan'ne ma omureebe amang'ana kosi namalahi khuye khumusaatsawe nende khumwanawe.” Omukhasi yakalusia Gehasi mbu kosi namalahi.

²⁷Nebutswa olwa yoola khu Elisha yenama imbeliwe ma nahanda khusilenjesie. Gehasi yenya okhumusindikha nebutswa Elisha namubool'la mbu, “Mulekhe abe, okhuba ali nomunyakhano omukhongo nebutswa OMWAMI ukubisile khu ise, naye siyambooleye nisina tawe.”

²⁸Omukhasi yabool'la Elisha mbu, “Omwami, ndakhureebakhwo omwana? Sindakhubool'la ‘Orambehelakhwo tawe?’ ”

²⁹Elisha nabool'la Gehasi mbu, “Eyanguyie obukule indabusi yanje motsie. Orakhasiesaniakhwo nomundu wosi khunjila tawe. Ochoome munzu ma obikhe indabusi yanje khumwana.”

³⁰Nyina mwana naye naboola, “Ndesuhanga khu MWAMI oli mwoyo khandi khuibe mbu, sindakhakhulekha tawe!” Kho yarula nibatsia n'naye.

³¹Gehasi yemela imbeli, nabikha indabusi ya Elisha khumwana, nebutswa amayoosi kosi sikahul'likhakhwo kata esilolelo sindi siosi siosi tawe. Khulwe yako yakalukha okhwakan'na Elisha namubool'la mbu, “Omwana siabukhile tawe.”

³²Olwa Elisha yoola munzu, yalola omwana khusitanda nafwiye.

³³Niyenjilamwo ma niyefungilamwo yenyene no mwana ma nasaaya khu MWAMI.

³⁴Kho yaniina khusitanda, nakona khumwana, nara omunwakwe khumunwa okwomwana, netsimonitsie khutsiomwana, namakhonoke khumakhono komwana. Olwa yelambisia khuye, omubili kwomwana kwachiaka okhutunduma.

³⁵Kho Elisha yachenda y'yi ne y'yi munyumba, ma nakalukha okhwelambisia khumwana khandi Omwana niyasamula hali khane nakhataru ma nahenga.

³⁶Elisha nabool'la Gehasi alange nyina mwana. Olwa yetsa, yamubool'la mbu, “Bukula omwanawo.”

³⁷Omukhasi uyo yakwa hasi hamakulu ka Elisha, namwinamila, ma nabukula omwanawe, narula natsia.

³⁸Kho Elisha yakalukha Giligali olwe inzala yaliho musibala. Ne olwa yali niyekesianga omukanda kwa abaroobi, yabool'la omurumikhiliwe mbu, “Renjekhakhwo khumahika indabu, olombele abaroobi ebiokhulia.”

³⁹Mulala khubo yarula natsia okhwaha etsifwa mubulimo. Yanyola emisabibu tsiomubulimo ma nanokakhwo eminji ntsitsula munguboye, niyetsa natsikhalachila mundabu, ne sibali nibatsimanyile tawe.

⁴⁰Ma nibenul'la abandu yabo khulutaabo. Ne olwa bali nibalitsanga khubilibwa tsana, bekan'na Elisha nibaboola mbu, “Omundu wa Nyasaye, esumu eli mubiokhulia.” Kho sibabilia tawe.

⁴¹Elisha naboola, “Khenul'lekhwo abandu luno.” Nobubi sibwalikhwo mundabu tawe.

⁴²Olundi khandi, omundu nalebe yarula Baali Shalisha, naleer'ra Elisha ebiokhulia ebiokhuranga okhucheswa m'mukunda. Nabio biali emikaati chieishayiri amakhumi kabili, nebirwe biobuswache obuhia mwikunia. Elisha nabool'la Gehasi mbu, “Helesia abandu ebiokhulia, babe abanyala okhulia.”

⁴³Nebutswa Gehasi yaboola mbu, “Ndakhahaana mbwena ebiokhulia bit'ti yibi khubandu emia ndala?” Elisha nameeta okhuboola mbu, “Bihaane khubandu, balie, okhuba OMWAMI aboolanga mbu, ‘Balalia ma ebindi bisikale.’ ”

⁴⁴Kho yabarenjekhela, nabo balia, ma ebindi nibisikala, singa obwa OMWAMI yali nabooye