Read lunyore 2 ABARUCHI 5 Bible Online

2 ABARUCHI 5 - lunyore bible

2 ABARUCHI 5

¹Naamani omukhongo wabasikari ba Siria, yali omundu woluyali olukali khandi owifuma yeikulu imbeli womuruchi wa Siria sichila OMWAMI yali nahelesisie Siria obulechi okhubir'ra mu Naamani. Khandi yali omulwani wolutswoni; harali yali omundu wobuchele.

²Mubuseere nalebe nende Isiraeli, Abasiria bali nibabukuye omukhaana undi omut'ti okhurula Isiraeli owamala nakholwa omukholi wa mukha Naamani.

³Litukhu elala yabool'la omukha Naamani mbu, “Omwami wanje niyakhakaanakhwo nomuroobi omenyanga Samaria, yakhamuhonia obuchelebwe.”

⁴Olwa Naamani yahul'la khukano, yatsia khumuruchi namubool'la akomukhaana Omuisiraeli yali nabooye.

⁵Ma omuruchi wa Siria naboola mbu, “Tsia khumuruchi wa Isiraeli, ma omuhelesie ebarwa y'yi okhurula khu ise.” Kho Naamani yatsia, nali nende ebitonye biefetsa etsielefu amakhumi kataru, nebitonye bietsahabu etsielefu amakhumi kasasaba, netsingubo tsiabukhan'ne mubulahi likhumi.

⁶Yahana ebarwa khumuruchi wa Isiraeli eyaboola mbu, “Ebarwa yino eleeranga Naamani omukhongo wabasikari banje khuibe. Ndakhekombe omuhonie obuchelebwe.”

⁷Olwomuruchi wa Isiraeli yali nasomele ebarwa y'yo, yarandula tsingubotsie naboola mbu, “Omuruchi wa Siria apaalanga ise mbwena ise nyala okhuhonia omundu uyu? Apaalanga ndi Nyasaye noho, owakhanyala okhwira nokhulamusia? Esichil'le omuruchi wa Siria niyarumila omundu mbu muhonie mubuchelebwe nisi? Kali kololi mbu ateemanga okhuleera obusoolo khu ise.”

⁸Olwa Elisha, omundu wa Nyasaye yahul'la obwa omuruchi wa Isiraeli yali naranduye tsingubotsie musibeela, yamukhupila omunwa naboola, “Esichil'le niwerandul'la tsingubotsio musibeela nisina? Lekha omundu uyo yetse yino, naye alamanya aliho omuroobi mu Isiraeli.”

⁹Kho Naamani natsiayo, halala netsipundatsie, namakaarike; nasinjil'la hamuliangokweinzu ya Elisha.

¹⁰Ma Elisha naruma omurumikhiliwe khuye, naboola mbu, “Tsia wesaabe m'muchela kwa Yorodani hali khane nakhataru, ne om'mbilikwo kulakalukha mung'ono mwakwo nawe olasiiyikha.”

¹¹Nebutswa Naamani nasinyikha ma narulayo naboola mbu, “Mpaal'lenge yakharul'le esioba okhundola, ma alasinjila imbeli wanje ma asaaye khu MWAMI Nyasayewe, nahabasia omukhonokwe ahobulwaye buli, niyambonia obuchele bwanje!

¹²Okhumeta khuyako, emichela cha Abana na Faripari echili Damasiko sichiyombele emichela chiosi echia Isiraeli? Sindakhesaabile muchiene yichio ma ndasiiyikha?” Nilwo olwa yasukhana, niyenyokha natsia muburima obukali.

¹³Ne abarumikhilibe bamutsiila nibaboola mbu, “Omwami, omuroobi alaba nakhubooleye okhole ling'ana lindi litinyu, khane siwakhakhol'le? Kho, busina oresaaba mumuchela ma osiyikhe singa obwa akhubooleye?”

¹⁴Kho Naamani niyekha mu Yorodani ma niyesaaba hali khane nakhataru, singa Elisha yali nabooye, ma nasiiyikha. Likhoba lilie liakaasa ma nilirel'lekha singa eliomwana omutoro.

¹⁵Yakalukha khu Elisha nende abandube bosi naboola mbu, “Luno manyile mbu musibala siosi sikhulimwo nanyasaye narali Nyasaye wa Isiraeli, khulwe yako, yanza obukule esihanwa sianje, omwami.”

¹⁶Elisha naye namubool'la mbu, “Ndesuhanga khu MWAMI oli mwoyo owe ise rumikhilanga mbu sindakhabukulakhwo esihanwa tawe.” Naamani namunichilisia mbu abukule, nebutswa Elisha yasuula.

¹⁷Kho Naamani naboola mbu, “Noba narabukula esihanwa sianje, kho lekha ise omurumikhiliwo mbukule liiloba elinyala okhuchingwa netsinyumbu tsibili nzie n'nalio ingo[1], sichila okhurula olwaleelo, ise omurumikhiliwo sinambanenje emisango emisambe nohomba echindi chiosi khubanyasaye bandi nikarali khu MWAMI yenyene.

¹⁸Ne khwing'ana lino OMWAMI yambeelenje ise omusumbawe olwa nambilenje omuruchi wanje muhekalu ya Rimoni, nyasaye wa Siria khulwo khumwekayakaya. Siahene OMWAMI nayambeele ise khwing'ana yilio.”

¹⁹Elisha namubool'la mbu, “Tsia nomulembe.” Ma Naamani narula natsia. Ne olwa Naamani yali niyakhatsia oluchendo olwimbikiti okhurula khu Elisha,

²⁰Gehasi, omurumikhili wa Elisha yapaara naboola mbu “Lola, Omwami wanje alekhele Naamani uno Omusiria natsia butswa sila okhumurunjiakhwo esindu. Yakhahuchiliye esihanwa esia Naamani yenyelenje okhumuha. Khu MWAMI oli mwoyo ise nzia okhumulondel'la, ma nyoolekhwo esindu okhurula khuye.”

²¹Kho Gehasi nalondeel'la Naamani. Ne olwa Naamani yalola omundu namulondanga tsimbilo, yeekha okhurula mwikaarilie okhumwakan'na namureeba mbu, “Esiakhakwa nisina?”

²²Gehasi nakalusia mbu, “Esindu tawe, kosi namalahi. Habula omwami wanje yarumile khubool'le mbu, ebilenje bino abandu babili khumukanda kwa abaroobi okhurula musibala siebikulu esia Efuraimu betsele okhumulola ne yakhayanza mbu obahe ebitonye etsielefu tsitaru biefetsa nende tsingubo tsindahi tsibili mubwabukhani.”

²³Naamani namubool'la mbu, “Yanza obukule ebitonye etsielefu tsisasaba biefetsa.” Yamunichilisia okhubibukula, naboha ebitonye etsielefu tsisasaba biefetsa m'makunia halala netsingubo tsindahi tsibili natuukha abarumikhilibe babili, nabo nibatsichinga okhuhil'la Gehasi.

²⁴Ne olwa boola khusikulu aha Elisha yamenyanga, Gehasi yatsibukula m'makhono kaake, ma natsibiikha munyumba ma nasebula abarumikhili ba Naamani.

²⁵Yenjila munyumba ma nasinjila imbeli wo Mwamiwe. Elisha namureeba mbu, “Wakhabetsanga hena Gehasi?” Naye naboola mbu, “Omwami wanje ise sinziyekhwo habundu tawe.”

²⁶Nebutswa Elisha namubool'la mbu, “Omwoyo kwanje sikwali n'nawe olwa otsiye khumundu ula ma niyekha okhurula mwikaarilie okhukhwakan'na? Ino sieli esaa eyokhuhuchil'la amapesa, netsingubo, nemikunda chiemiseituni, nemisabibu, namakondi netsing'ombe, nabakholi abes'saatsa nende abesikhasi tawe.

²⁷Khulwe yako, obuchele bwa Naamani bulakhuhamba, ne nabubetsenje khuibe nende khubolwibulo lulwo inziayo.” Kho olwa Gehasi yarula imbeli wa Elisha, yali owobuchele, ne likhobalie liali lilafu singa amachina Keifula.