Read lunyore 2 ABARUCHI 7 Bible Online

2 ABARUCHI 7 - lunyore bible

2 ABARUCHI 7

¹Elisha nakalusia mbu, “Hulile ako OMWAMI aboolanga! Mukamba khusaa singa ino, namube abanyala okhukula mu Samaria etsikilo tsitaru etsiobusie bweingano esitonye nohomba etsikilo tsisasaba etsieshayiri natsikusibwe esitonye silala esiefetsa.”

²Kho omukhongo olindanga omuruchi nabool'la Elisha mbu, “Yako sikakhanyalikha tawe kata nikakhaba OMWAMI mwene yakhaleera obuswache khunyinga ndala.” Ma Elisha namubool'la mbu, “Olalola netsimonitsio omwene nebutswa solaliakhwo ebiokhulia yibio tawe.”

³Abandu bobuchele bane bali mubwinjilo bwesilibwa sia Samaria; Babool'lana mbu, “Busina khulindil'langa okhufwila hano?

⁴Nikhwakhabola mbu, ‘Chende khwinjile mwitaala’, inzala elimwo, nefwe khulafiilamwo. Ne nikhwikhala hano, khandi khulafwa. Kho chende khutsie mukambi ya Basiria ma khwehane khubo. Nibakhubeela, khulaba mwoyo, ne nibakhwira kho ifwe khulafwa butswa.”

⁵Kho khubwile, barula m'batsia mukambi ya Abasiria. Olwa boolayo, omundu siyalikhwoyo kata mulala tawe.

⁶OMWAMI yali nakhol'le Abasiria okhuhul'la liyoka singa eliabasikari abanji abetsanga khutsisululi nende amakaari, kho nibapaara mbu omuruchi wa Isiraeli ukomboye abaruchi ba Bahiti nende abaruchi be Misiri nabasikari babwe okhwitsa okhubaseera.

⁷Kho belukha khumukolooba yikwo khulwokhuhonia obulamu bwabwe nibalekha amaheema kabwe, netsisululi tsiabwe, netsipunda tsiabwe, ma nibalekha ekambi yabwe inzele.

⁸Ne olwa abobuchele tsana boola handulo wekambi, benjila mwiheema, nibalia, nibayuwa ebialimwo, babukula efetsa netsahabu netsingubo nibatsia okhub'bisa ma nibakalukha, nibenjila mwiheema lindi, nibabukula ebindu okhurulamwo, batsia okhub'bisa.

⁹Nebutswa bamala nibabool'lana mbu, “Sikhukholanga habwene tawe. Lino nelitukhu elia amang'ana amalahi, nefwe khubun'ne n'nako. Nikhulindil'la okhwola mukamba olwa nabusie, nakhunyoole esinyasio. Kho chende khutsie ma khubool'le abakhongo bomuruchi.”

¹⁰Kho betsa nibalanga abalindi bebilibwa bielitookho nibababool'la mbu, “Khutsiye mukambi ya Basiria ne sikhulutsikhwomwo omundu kata okhuhul'lakhwo omundu wosi tawe; habula khulutsi butswa etsisululi, netsipunda tsibohelwe, namahema singa obwakali.”

¹¹Kho abalindi nibalandia amang'ana tsana, ma nikool'la abehango homuruchi.

¹²Omuruchi yabuukha m'mbutukhu ma nabool'la abakhongobe “Nzia okhum'mbool'la aka Abasiria baloosisie okhukhola. Bamanyile akeinzala yakhuli n'nayo, khulwe yako balekhele esianyi siabwe okhutsia okhwebisa esioba wekambi. Bapaalanga khwitsa okhurula mwitookho, okhutsia okhuruna ebiokhulia, ma beetsa okhukhutiila nikhusili mwoyo ma bafumile litookho.”

¹³Ne mulala naboola mbu, “Abandu abali mwitookho muno bali butswa abafu singa abandi bosi abamala okhufwa. Kho chende khurume abandu nende etsisululi tsirano khutsiasikala yitsi; kho khube abanyala okhumanyilisia akekholekhele.”

¹⁴Nibeela abandu nalebe, ma omuruchi nabaruma m'makaari kabili ma nabalaka batsie okhumanyilisia akali nekekhol'le khubasikari ba Asiria.

¹⁵Abandu yabo batsia okhwola Yorodani ne khunjila yosi balolakhwo tsingubo nende ebindu ebia Abasiria bali nibafubile olwa bali nibelukhanga. Ma nibakalukha okhubool'la omuruchi.

¹⁶Ma abandu ba Samaria nibelukha bwangu okhuyaaka ebindu mukambi ya Basiria. Ne singa OMWAMI yali nabooye, etsikilo tsitaru tsobusie obunyukhe tsiakusibwa esitonye silala esie efetsa, ne etsikilo tsisasaba etsieshayiri tsiakusibwa esitonye silala esiefetsa.

¹⁷Ne olwene yilwo omuruchi yali niyel'le omukhongo owamulindanga namureye okhulinda esilibwa; ne abandu bamusen'na hasi musilibwa, ma nafwa singa Elisha yarooba olwa omuruchi yali niyetsele khuye.

¹⁸Elisha yali nabooleye omuruchi mbu, “Khusaa singa ino litukhu lianalilondekhwo etsikilo tsitaru tsiobusie obunyukhe bulakusibwa esitonye silala esiefetsa ne etsikilo tsisasaba etsieishayiri tsilakusibwa esitonye silala esiefetsa, musilibwa sia Samaria.”

¹⁹Nebutswa omukhongo tsana yali nabooleye Elisha mbu, “Yako sikakhanyalikha tawe — kata nikakhaba OMWAMI mwene yakhaleera obuswache khunyinga ndala.” Ne Elisha yali namubooleye mbu, “Olalola netsimonitsio omwene, nebutswa solaliakhwo ebiokhulia yibio tawe.”

²⁰Nikekhola khuye singa mbwo, sichila abandu bamusen'na hasi musilibwa ma nafwa.