Read lunyore 2 ABARUCHI 8 Bible Online

2 ABARUCHI 8 - lunyore bible

2 ABARUCHI 8

¹Ne Elisha yali niyabool'la omukhasi owamenyanga Shunemu, owa yali niyasimukusia omwanawe mbu, “Rula ibe nabomunzuyo mutsie mumenyekhwo hosi ahamunyoola; okhuba OMWAMI arumanga inzala khusibala khulwemihika chine nachitaru.”

²Kho omukhasi uyo yarula, nakhola singa Elisha yamulaka; natsia nabeinyumbaye okhumenya musibala esia Filisiti khulwemihika chine nachitaru.

³Ma olwa emihika chine nachitaru yichio chiali njiweye, omukhasi uyo yachel'la okhurula musibala esia Filisiti, natsia khumuruchi okhumureeba mbu akalusibubwe inyumbaye nelilobalie.

⁴Ne omuruchi yali nal'lomanga na Gehasi, omurumikhili wa Elisha naboola mbu, “Yanza unzinosie amang'ana akokhuchenyia kosi aka Elisha yakhola.”

⁵Ne olwa Gehasi yali nasiinoosia omuruchi obwa Elisha yasimukusia omufu, omukhasi tsana owa Elisha yasimukusia omwanawe yalakayila omuruchi nareebanga inyumba nelilobalie. Gehasi naboola mbu, “Omwami wanje, ouli omuruchi, omukhasi tsana nguoyu, khandi omwanawe owa Elisha yasimukusia ngwoyu.”

⁶Ne olwa omuruchi yareeba omukhasi tsana, yamubool'la singa obwa kali. Kho omuruchi yalanga omukhongo mulala okhumusinjil'la namubool'la akalusisie, omukhasi ebindi biosi ebiali ebibie, halala nende obukhala bwamachese kom'mikunda chichie khulwemihika chine nachitaru echiayali niyatikhila Filisiti.

⁷Elisha yatsia Damasiko olwa Beni Hadadi omuruchi wa Siria yali nali omulwaye ma Beni Hadadi nabool'lwa mbu, Elisha wol'le

⁸omuruchi nabool'la Hasaeli mbu, “Bukula esihanwa ohil'le otsie okhwakan'na Elisha ma akhureebele khu MWAMI nikali nambone nohomba nafwe.”

⁹Kho Hasaeli natsia okhumwakan'na, nali nende esihanwa esia etsikabila tsiosi etsiebindu bia Damasiko, nabichinjila khutsingamia amakhumi kane. Olwa yabukana nende Elisha, naboola mbu, “Omurumikhiliwo Beni Hadadi omuruchi wa Siria yarumile khuibe khureebe nikali nahone mubulwayebwe nohomba tawe.”

¹⁰Elisha namubool'la mbu, “OMWAMI umanyisie mbu siahene nafwe, nebutswa tsia omubool'le mbu nahone.”

¹¹Ma Elisha namureela tsimoni nakhulumamisie m'monimwe okhwola tsisoni nitsimuhamba Hasaeli; ma amasika amenji nikarula mumoni mwa Elisha.

¹²Hasaeli namureeba mbu, “Omwami wanje, esichilanga nolakaya nisina.” Naye nakalusia mbu, “Sichila manyile amabi aka nokhol'le abandu ba Isiraeli. Nohambie omul'lo mumatookho kabwe akasiirwa, khandi nawiire ababuukha babwe nolukanga; notonyania abaana babwe abatoro; niwarania abakhasi babwe ababelekha.”

¹³Kho Hasaeli nareeba mbu, “Ise omurumikhiliwo ofwana butswa esikilimboto, ndakhanyala mbwena okhukhola ling'ana liibi yili?” Elisha namukalusia mbu, “OMWAMI umanyisie mbu niwe owanobe omuruchi wa Siria.”

¹⁴Kho Hasaeli yakalukha khu Beni Hadadi owamureeba mbu, “Elisha akhubooleyekhwo sina?” Ne Hasaeli namukalusia mbu, “Yambooleye mbu siahene nohone.”

¹⁵Nebutswa litukhu elialondakhwo, yabukula lilungeti niyena m'maatsi, ma namufuunikha m'moni, okhwola nafwa. Hasaeli yamala naba omuruchi wa Siria musilenjesie.

¹⁶Mumuhika kwakharano kwa Yoramu omwana wa Ahabu, yali omuruchi wa Isiraeli, Yehoramu omwana wa Yehoshafati yakholwa omuruchi wa Yuda.

¹⁷Yachiaka okhuruka nali nemihika amakhumi kataru nachibili ne naruka mu Yerusalemu emihika munane.

¹⁸Yalonda amang'ana kabaruchi ba Isiraeli, singa abeinyumba ya Ahabu bakhola, sichila yali niyateesia omukhaana wa Ahabu. Yakhola obubi imbeli wo MWAMI.

¹⁹Nebutswa OMWAMI siyayenya okhumulula Yuda tawe sichila yali niyasubisia Daudi mbu abolwibulo lulwe bakhatsilil'le okhwamiha khasotso.

²⁰M'matukhu koburuchi bwa Yehoramu, Edomu yakhol'la Yuda indiri, ma nibemekha omuruchi wabwe abene.

²¹Ma Yehoramu niyambukha natsia Sairi halala namakaarike kosi aha Abaedomu babafumbila. Ne mubutukhu ye halala nabakhongo bamakaarike bayombel'la Abaedomu ma nibelukha, ma abasikaribe nibasalana okhukalukha ingo wabwe.

²²Kho Edomu bakhol'la oburuchi bwa Yuda induli okhwola leelo. Ma khandi litookho lia Libina liakhola induli olwene yilwo.

²³Ne amang'ana kandi kosi aka Yehoramu yakhola, kahandiikwa musitapu esia aketsinyinga tsiabaruchi ba Yuda.

²⁴Yehoramu yafwa ma nayabilwa mubilindwa biabaruchi mwitookho lia Daudi. Ahasia omusianiwe naruka musilenjesie.

²⁵Mumuhika kwelikhumi nachibili okwa Yoramu omwana wa Ahabu yali omuruchi wa Isiraeli, Ahasia omusiani wa Yehoramu yakholwa omuruchi wa Yuda.

²⁶Yachiaka okhuruka nali nemihika amakhumi kabili nachibili. Yaruka omuhika mul'la mu Yerusalemu, ne eliira lianyinawe liali Atsalia, omukhaana womuruchi Ahabu, omwitsukhulu wa Omiri owali omuruchi wa Isiraeli.

²⁷Ahasia yalonda amang'ana akeinyumba ya Ahabu, nakhola amabi imbeli wo MWAMI, singa obwa abeinyumba ya Ahabu bakhola sichila yali niyateesia munyumba ya Ahabu.

²⁸Ahasia yahambana nende Yoramu omwana wa Ahabu m'batsia okhulwana Hasaeli omuruchi wa Siria. Lihe lialwana Ramotsi eli mu Gileadi. Abasiria bamufumir'ra Yoramu mwihe.

²⁹Omuruchi Yoramu nachelela mwitookho lia Yesereli khulwo khuleswa amafumire. Ne Ahasia omwana wa Yoramu omuruchi wa Yuda yakongoma okhutsia okhulola Yoramu omwana wa Ahabu mwitookho lia Yesereli sichila yali omulwaye.