Read lunyore 2 ABARUCHI 9 Bible Online

2 ABARUCHI 9 - lunyore bible

2 ABARUCHI 9

¹Omuroobi Elisha yalanga mulala khubaroobi ababuukha namubool'la mbu, “Werechekhe ma obukule akhachupa khamafura khano, otsie Ramotsi Gileadi.

²Olwa oba nowol'leyo, okhaabeyo Yehu omwana wa Yehoshafati omwitsukhulu wa Nimishi. Winjile ma omuhinie khubasie, omuhile musikoti siomukari.

³Ma obukule akhachupa khamafura tsana, omutsukhiil'le khumurwe noboola mbu, ‘Kano niko ako MWAMI aboolanga: Khutsukhiil'langa amafura obe omuruchi wa Isiraeli.’ Ma oruleyo bwangu ne orasisil'la tawe.”

⁴Kho omuroobi omubuukha uyo, natsia Ramotsi lia Gileadi.

⁵Ne olwa yoolayo, yanyoola abakhongo belihe mbekhaaye halala. Naye naboola mbu, “Ndi noburume khuibe omukhongo welihe.” Yehu namureeba. “Khuwina mwifwe?” Naye nakalusia mbu, “Khuibe, omwami.”

⁶Kho yasinjila niyenjila musikoti siomukari; ne omuroobi omubuukha tsana namutsukhiil'la amafura khumurwe namubool'la mbu, “Kano niko ako OMWAMI Nyasaye wa Isiraeli aboolanga: ‘Khutsukhil'langakhwo amafura obe omuruchi wabandu banje, Isiraeli.

⁷Olera inyumba ya Ahabu omwamiwo yosi, kho mbe onyala okhurunjia es'salia khu Yesebeli khulwa okhwira abaroobi banje nende abarumikhili banje bandi.

⁸Abolwibulo lwa Ahabu lwosi balafwa; khandi nanzire abes'saatsa bosi abeinyumba ya Ahabu abali ababuukha nende abakhulundu.

⁹Khandi ndakhola inyumba ya Ahabu ebe singa inyumba ya Yeroboamu omwana wa Nebati nende inyumba ya Baasha omwana wa Ahija.

¹⁰Yesebeli siyakhayabilwe tawe; omubili kukwe kwakhalibwe netsimbwa mulusoma lwa Yesereli.’ ” Olwomuroobi uyo yali niyakhaboola akene yako, yekula omuliango ma niyelukha.

¹¹Olwa Yehu yarula nakalukha khubakhongo basie bamureeba mbu, “Kali mbwena? Esichil'le omulalu uno nakhwitsila nisina?” Naye nababool'la mbu, “Mumanyile omundu uyo nende amang'anake obwa kali.”

¹²Nibamukalusia, “Sikhumanyile tawe, khubool'le akaabooye.” Kho nababool'la, “Yambooleye mbu, kano niko ako MWAMI aboolanga: ‘Khutsukhil'langakhwo amafura obe omuruchi wa Isiraeli.’ ”

¹³Nonoho abakhongo basie yabo nibabukula tsingubo tsiabwe ma nibatsiala hasiwe khubiniinilo, ma nibamusinjisiakhwo khu akali butswa amakhaya; nibakhupa olwika ma nibaboola mbu, “Yehu niye omuruchi!”

¹⁴Kho nilwo olwa Yehu omwana wa Yehoshafati, omwitsukhulu wa Nimishi yasiemana Yoramu. Ne Yoramu yali nasoolanga Ramotsi Gileadi halala nende Isiraeli yosi okhurula khu Hasaeli omuruchi wa Siria,

¹⁵habula omuruchi Yoramu yali nacheleye Yesereli khulwokhuhona khumafumire aka Abasiria bamufumira olwa yalwana nende Hasaeli omuruchi wa Siria. Kho Yehu nabool'la abakhongo basie mbu, “Nimuba nimuli khulubeka lwanje, omundu wosi arakhebisakhwo okhurula mwitookho lia Ramotsi lino watsia okhuchetsiyia abomwitookho lia Yesereli.”

¹⁶Ma Yehu naanina mwikaarilie, natsia Yesereli, Yoramu yaliho nasosanga. Ne Ahasia omuruchi wa Yuda yali nakongomeleyo okhukonya Yoramu.

¹⁷Ne omulindi owali nasinjiye khumunaara kwa Yesereli, yalola Yehu nende abasikaribe nibeetsanga owa yali, ma naboola mbu, “Ndutsi omukanda kwabasikari nikwitsanga.” Yoramu naye naboola mbu, “Ruma khu esululi otsie okhureeba nikali nabalina nohomba nabasuku.”

¹⁸Kho omundu we esululi natsia okhubaakan'na nabool'la Yehu mbu, “Omuruchi areebanga nikali witsanga singa omulina.” Yehu namukalusia mbu, “Yako kabula obukhala n'nawe. Nonda inyuma wanje.” Omulindi yabool'la omuruchi mbu, “Owakhurumile tsana wol'le khubo nebutswa siakalukhanga tawe.”

¹⁹Kho yaruma omurumwa owakhabili, owatsia khubo okhureeba Yehu amatelwa yako. Ne Yehu namukalusia mbu, “Yako kabula obukhala n'nawe. Nonda inyuma wanje.”

²⁰Khandi omulindi nahiil'la omuruchi amang'ana naboola mbu, “Wol'le khubo, nebutswa siakalukhanga tawe. Ne owemeleye omukanda tsana ahilanga likaarilie singa omulalu, singa butswa Yehu ahilanga.”

²¹Yoramu naboola mbu, “Kaasie likari lianje.” Nabo nibakasia likaarilie, naye nende Ahasia omuruchi wa Yuda nibarula, buli mundu mwikaarilie, nibatsia okhwakan'na Yehu. Bamunyool'la hamukunda okwalinji okwa Nabotsi Omuyesereli.

²²Olwa Yoramu yalola Yehu, yamureeba, “Witsanga khumulembe noho?” Naye nakalusia “Ni mulembe sina okwakhabayo olwa khusili nobufuma nende okhwinabila ebiniini ebia Yesebeli mamawo yachaakia?”

²³Kho Yoramu nasukhania likaarilie niyelukha nabool'la Ahasia; “Nobusiemani, Ahasia.”

²⁴Ne Yehu nakhwesa obuyingobwe netsingufutsie tsiosi, ma nalasila Yoramu olusele olwafumira m'mabekamwe hakari, ma ndufumira mumwoyokwe. Yoramu nakwa mwikaarilie ma nafwa.

²⁵Yehu nabool'la Bidikari omukhonyel'liwe mbu, “Bukula om'bilikwe, okusukune m'mukunda kwa Nabotsi Omuyesereli. Witsul'le mbu olwa ise n'nawe khwachendela khusululi nikhulondanga inyuma wa Ahabu samwana Yoramu, OMWAMI yaboola esilaka munwa sino khu Ahabu:

²⁶‘Tooto mwene ndaluutsi okhwirwa khwa Nabotsi nende okhwirwa khwabasianibe olwa beeye, ne ndakhusubisisie mbu nakhuhele esinyasio m'mukunda omutelwa kuno.’ Kho luno bukula omubili kwa Yoramu kuno ma okusukune m'mukunda kwa Nabotsi kuno khulwokhuhesia ako MWAMI yahesia.”

²⁷Olwa Ahasia omuruchi wa Yuda yalola akali nikekholekhele yako, yelukha nalonda khunjila yokhutsia khwitaala lia Betsi Hagani. Yehu naye yamulondel'la, ma nalaka abandube mbu, “Mwire naye khandi.” Nibamulasa mwikaarilie, nali khunjila ehengele Guri, esili ahembi nende litaala lia Ibileamu. Naye niyelukha natsia Megido, ma nafwilayo.

²⁸Abakhongobe nibamuchinjila mwikaarilie nibamuhila Yerusalemu, nibamuyabila mubilindwa biabaruchi, mwitookho lia Daudi.

²⁹Ahasia yachaaka okhuruka Yuda mumuhika kwelikhumi namulala okwoburuchi bwa Yoramu omusiani wa Ahabu omuruchi wa Isiraeli.

³⁰Olwa Yehu yali niyool'le Yesereli, Yesebeli yali nahuliye akali esioba.

³¹Olwa Yehu yenjila musilibwa Yesebeli yamureeba mbu, “Nomulembe okukhuler're noho, ibe Simiri[2], omwiri wo Mwamiwo?”

³²Yehu naye nachinguula tsimonitsie, nahenga mwitilisa nareeba nomwoyo omukali, “Niwina oli khulubeka lwanje.” Ne abakhongo behango homuruchi babili noho bataru nibamuhengel'la Mwitilisa.

³³Yehu nababool'la mbu, “Mumufuube hasi.” Nibamufuuba hasi; ne amatsahike kamitsukha khwisisi ne akandi nikamitsukha khutsisululi. Etsisululi nende amakaarike nikasen'na omubilikwe hasi.

³⁴Kho Yehu niyenjila munyumba, nalia nanywa. Ma naboola mbu, “Tsie mulole akomukhasi uno ouli musilaamo siobubi, m'muyabile, okhuba nomukhaana womuruchi.”

³⁵Nebutswa abandu abatsia okhumuyabila sibanyoolakhwo esindu khum'bilikwe Nisirali esihanga, amakumba kebilenje, nende akamakhono konyene.

³⁶Olwa bakalukha nibabool'la Yehu amang'ana yaka, yaboola mbu, “Kano niko ako MWAMI yaboola kakhekholekhe olwa yal'loma okhubir'ra mumurumikhiliwe Eliya Omutishibe mbu, ‘Tsimbwa tsiakhalile omubili kwa Yesebeli mulusoma lwa Yesereli.

³⁷Ne omulambokwe kwakhasasibwe singa imbolela m'mukunda okuli mulusoma lwa Yesereli, kho abuleyo owakhaboola, uno niye Yesebeli tawe.’ ”