Read lunyore 1 AKETSINYINGA 10 Bible Online

1 AKETSINYINGA 10 - lunyore bible

1 AKETSINYINGA 10

¹Abafilisiti balwana lihe nende Abaisiraeli khusikulu sia Kiliboa. Abaisiraeli abenji bali okhwir'rwa habwene yaho, ne abasikala belukha.

²Nebutswa Abafilisiti balondel'la Saulo nabasianibe. Bamala nibanyoola abasianibe bataru, Yonatsani, Abinadabu nende Malikishua ma nibabeera.

³Obulwani bwali obululu aha Saulo yali nali ne olwa yalaswa nolusele lwabasuku, lwamusalisia obubi okhusila.

⁴Kho Saulo yabool'la omubuukha wamuchinjilanga ebilasan'nwe mbu, “Tsomola olukanga lulwo ma unzire, khase Abafilisiti abanasibala yaba bakhanzekhel'la.” Nebutswa Omusiani omubuukha uyo yali noburi obukali khulwo okhukhola mbwo. Kho Saulo yabukula olukanga lulwe omwene ma niyeyira n'nalwo.

⁵Olwa omubuukha uyo yalola Saulo nafwiye, naye khandi yefumira nolukanga lulwe omwene ma nafwa.

⁶Ma Saulo nende abasiani baabe bataru nibafwa halala kho sialikhwoho owolwibulo lulwe owamiha khandi tawe.

⁷Olwa Baisiraeli abamenya Mwibanda lia Yesereli bahul'la mbu abasikari bali okhwilukha ne Saulo nabasiani baabe bamal'le khwirwa, barula mwitaala liabwe ma nibelukha. Abafilisiti betsa ma nibamenya mumataala tsana.

⁸Litukhu elialondakhwo, lihe niliweye, Abafilisiti batsia okhuyaaka ebindu biabandu abali nibeer'rwe, kho banyoola omubili kwa Saulo nende echiabaana baabe nichilambiye khusikulu sia Kiliboa.

⁹Bakhalaka omurwe kwa Saulo, nibamunabuula ebilasan'nwe bibie ma nibaruma abandu n'nabio musibala sia Filisiti siosi okhulandia amang'ana amalahi khubiniini biabanyasaye babwe nende khubandu babwe.

¹⁰Bara ebilasan'nwe bia Saulo mundala khutsihekalu tsiabwe ne nibasunga omurwe kukwe muhekalu yomunyasaye wabwe olangwanga Dakoni.

¹¹Olwabandu ba Yabeshi mu Gileadi bahul'la aka Bafilisiti bali nibakhol'le khu Saulo,

¹²abasaatsa beikholo batsia okhwenda omubili kwa Saulo nende echiabasiani baabe nibachihila Yabeshi. Bachiyabila has'sina siomusaala kwolufuri ma nibahonga okhulia khulwa amatukhu kane nakataru okhumanyia mbu bekhuulanga.

¹³Saulo yali okhufwa sichila siyali omusubilwa khu Nyasaye tawe. Yali okhusuula khulonda ako MWAMI yamulaka; yateema okhunyoola obwibaali khulwo okhureeba amang'ana khumisambwa,

¹⁴obukhala bwa yakhamureebele OMWAMI. Khulweyako OMWAMI yali okhumwira ma nahaana oburuchi bwesibala khu Daudi omusiani wa Yese.