Read lunyore 1 AKETSINYINGA 11 Bible Online

1 AKETSINYINGA 11 - lunyore bible

1 AKETSINYINGA 11

¹Abandu ba Isiraeli bosi batsia khu Daudi aha yali Heburoni ma nibamubool'la mbu, “Ifwe khuli abelikumba lilio khandi abamatsahi kaako.

²Amatukhu kahweye, kata olwa Saulo yali nasili omuruchi wefwe, ibe wemel'la abandu ba Isiraeli okhulwana lihe, ne OMWAMI Nyasaye uwo yakhusubisia mbu wakhemel'le abandu baabe ma olabe omuruchi wabwe.”

³Kho abemeli ba Isiraeli bosi betsa khumuruchi Daudi nali Heburoni. Daudi yalomba n'nabo indakano, imbeli wo MWAMI, nabo nibamutsukhil'lakhwo amafura okhuba Omuruchi wa Isiraeli singa obwo MWAMI yali niyasubisia okhubir'ra mu Samweli.

⁴Omuruchi Daudi nende Abaisiraeli bosi batsia okhuseera litookho lia Yerusalemu. Amatukhu yako lialangwanga Yebusi ne abandu ba Yebusi abali abokhuranga okhumenya musibala yimwo bali nibasimenyelemwo.

⁵Abayebusi yabo babool'la Daudi mbu siali onyala okhwinjila mwitookho imwo tawe, nebutswa Daudi yafumila oluhinga lwa Sayuni ma nihalangwa mbu, “Litookho lia Daudi.”

⁶Daudi naboola, “Omundu wokhuranga okhwira Omuyebusi nabe omwemeli wa basikari!” Kho Yoabu, owa nyina uwe yalangwanga Seluya yemela okhutsia okhuseera ma nakholwa omukhongo wabasikari.

⁷Sichila Daudi yatsia okhumenya muluhinga, oluhinga yilwo lwalangwa mbu, “Litookho lia Daudi.”

⁸Yamala nachaaka okhwombokha litookho yilio obuhia, nachiakila elubeka lwebukwe wesikulu ahamaloba kali niketsusibwa, ne Yoabu niyombokha obuyia tsimbeka tsindi tsiosi etsie litookho.

⁹Daudi yameetekha okhuba netsingufu sielitukhu sichila OMWAMI Wokhunyala Biosi yali halala n'naye.

¹⁰Kano niko amera kabasikari ba Daudi abalulu. Halala nende abandu bandi ba Isiraeli, abasikari yabo bamukhonyel'la okhuba omuruchi, singa obwo MWAMI yali niyabasubisia, ma nibakhola lihanga lilie okhuba elietsingufu.

¹¹Owokhuranga yali Yashobeamu owesilibwa sia Hakimoni, omwemeli “Wabasikari abalulu bataru.” Yarumikhila lifumo lilie okhulwana abandu etsimia tsitaru ma nabeera bosi halala.

¹²Owakhabili khubasikari abalulu bataru yabo yali Eliesa Omusiani wa Dodo, owesilibwa sia Ahohi.

¹³Yali elubeka l'lala nende Daudi olwa balwana Abafilisiti habundu halangwa Pasi Damimu. Yali m'mukunda kweshayiri olwa Abaisiraeli bachiaka okhwilukha,

¹⁴ma ye nabandu baabe nibasinjila hakari homukunda nibalwana Abafilisiti. OMWAMI yamuhelesia obulechi obukali.

¹⁵Litukhu elala, bataru okhurula khubasikari amakhumi kataru abalulu batsia khulwanda aha Daudi yamenyanga ahembi noluhanga lwa Adulamu, ne abasikari ba Bafilisiti bali nibakhupile ekambi yabwe Mwibanda lia Refaimu.

¹⁶Olwene yilwo Daudi yali nali khusikulu esiasirwa noluhinga ne omukanda kwabasikari Bafilisiti kwali nikufumiye litaala lia Betselehemu.

¹⁷Daudi yamala ahambwe namahofu ma naboola mbu, “Siakhuha omundu wander'rakhwo amaatsi kokhunywa okhurula musitaho esili musilibwa sia Betselehemu!”

¹⁸Abasikari abalulu bataru barumikhila tsingufu okhubir'ra mukambi ya Bafilisiti, ma nibataha amaatsi okhurula musitaho ma nibahil'la Daudi. Nebutswa Daudi siyakanywa tawe. Musilenje siokhukanywa, yakasundula hasi singa omusango kwokhuhanwa khu MWAMI

¹⁹ma naboola mbu, “Ise sinyala okhunywa amaatsi yaka tawe! Kakhafwan'ne mbu ise nywetsanga amatsahi kabandu yaba abali okhura obulamu bwabwe mubutinyu!” Kho yamala nasuula okhukanywa. Yako niko amang'ana kolutswoni akabasikari bataru yabo bakhola.

²⁰Omusiani wanga Yoabu olangwanga Abisai niye owali omwemeli wabasikari abalulu “Amakhumi kataru.” Yarumikhila lifumo lilie okhulwana abandu etsimia tsitaru ma nabeera bosi ma naba oweifuuma ingali mubasikari “Amakhumi kataru.”

²¹Niye owali neifuma okhuyomba abasikari “Amakhumi kataru” ma naba omwemeli wabwe, nebutswa siyali noluyali okhuyomba “abasikari bataru tawe.”

²²Benaya Omusiani wa Yehoyada okhurula Kabuseli yali omusikari omululu. Yakhola amang'ana kolutswoni amenji akalimwo okhwira abasikari abalulu babili Abamoabu. Litukhu lindi yenjila mubuko inyinga yebarafu yali neliho, ma niyeera esimba.

²³Khandi yeera Omumisiri, okundu ok'kali kwene okuyomba etsimiita tsibili, okwali nelifumo likali. Benaya yakuseera ma nakunuula lifumo okhurula m'mukhono kukwe ma nakwira nelifumo tsana.

²⁴Yako niko amang'ana kolutswoni aka Benaya yakhola, owali mulala khubasikari abalulu “Amakhumi kataru”.

²⁵Benaya yali oweifuma mubasikari “Amakhumi kataru” yabo, nebutswa oluyalilwe silwayomba olwa “Abasikari abalulu” tawe. Daudi yamuhelesia omulimo kwokhusinjil'la abasikari baabe abamulindanga.

²⁶Abalondakhwo bano nibo abasikari bandi abeifuma: Asaheli amwabo Yoabu, Elihanani omusiani wa Dodo okhurula Betselehemu,

²⁷Shamotsi okhurula Harodi, Helesi okhurula Peleti,

²⁸Ira omusiani wa Ikeshi okhurula Tekoa, Abiesa okhurula Anatsotsi,

²⁹Sibekai okhurula Hushashi, Ilai okhurula Ahohi,

³⁰Maharai okhurula Netofa, Heledi omusiani wa Baana okhurula Netofa,

³¹Itsai omusiani wa Ribai okhurula Gibea musibala sia Benjameni, Benaya okhurula Piratsoni,

³²Hurai okhurula mwibanda elili ahembi Kaashi, Abieli okhurula Ariba,

³³Asimawetsi okhurula Bahurimu, Eliahiba okhurula Shaaloboni,

³⁴abasiani ba Hashemu okhurula Kisoni, Yonatsani omusiani wa Shage okhurula Harari,

³⁵Ahiamu omusiani wa Sakari okhurula Harari, Elifali omusiani wa Uri,

³⁶Heferi okhurula Mekerahi Ahija okhurula Peloni,

³⁷Hesiro okhurula Karimeli, Naarai omusiani wa Esibai,

³⁸Yoeli amwabo Natsani, Mibiha omusiani wa Hakuri,

³⁹Seleki okhurula Amoni, Naharai, owachinga ebilasan'nwe bia Yoabu, okhurula Beerotsi

⁴⁰Ira nende Garebu okhurula Yatiri,

⁴¹Uria Omuhiti, Sabadi omusiani wa Ahiali,

⁴²Adiria omusiani wa Shisa, (Omwemeli mubolwibulo lwa Rubeni owali nomukanda kukwe kwabasikari amakhumi kataru)

⁴³Hanani omusiani wa Maaka, Yoshafati okhurula Mitsani,

⁴⁴Usia okhurula Ashitera, Shama nende Yeyieli abasiani ba Hotsamu okhurula Aroeri,

⁴⁵Yediaeli nende Yoha abasiani ba Shimuri okhurula Tisi,

⁴⁶Elieli okhurula Mahawa Yeribai nende Yosahavia, abasiani ba Elinaamu, Itsima okhurula Moabu,

⁴⁷Elieli, Obedi nende Yaasieli okhurula Mesoba.