Read lunyore 1 AKETSINYINGA 12 Bible Online

1 AKETSINYINGA 12 - lunyore bible

1 AKETSINYINGA 12

¹Bano nibo abandu abatsia aha Daudi yali namenyele Sikilaki olwa yali niyakhungwa alekhe okhulolekhakhwo mutsimoni tsia Saulo omusiani wa Kishi (nibo abasikari abali okhumukhonya okhulwana lihe.

²Bali nobusitsa bwokhulasa obuyingo ne bali abanyala khulasa tsisele nohomba amachina kali khumikoye nibarumikhilanga emikhono milunji nohomba emitaka. Bali abekho ba Saulo abolwibulo lwa Benjameni.)

³Abasikari yaba bali nibemeleywe nende Ahieseri nende Yoashi, abasiani ba Shemaa okhurula Gibea. Abasikari bandi bali Yesieli nende Peleti abasiani ba Asimawetsi, Beraka nende Yehu okhurula Anatsotsi,

⁴Ishimaya okhurula Kibeoni, owali omusikari omululu khandi mulala khubemeli babasikari “Amakhumi kataru”; Yeremia, Yahasieli, Yohanani nende Yosabadi okhurula Kedera,

⁵Elusai, Yerimotsi, Belia, Shemaria nende Shefatia okhurula Harifu,

⁶Elikana, Ishia, Asareli, Yoeseri nende Yoshobeamu owesilibwa sia Kora,

⁷Yoela nende Sebadia abasiani ba Yerohamu okhurula Kedori.

⁸Kano niko amera kabasikari beifuma abamanya okhulwana okhurula mulwibulo lwa Gadi abali okhweyonga nabasikari ba Daudi olwa yali nali muluhinga musitsiimi. Bali nibamanya okhulwana nende ebikhumba namafumo, bali nokhuhenga khwokhurisia singa esimba, khandi abangu mukhwilukha singa ebitsusu biomubikulu.

⁹Bali nibahebwa obukhongo mubulondokhani buno: Eseri, Obadia, Eliabu,

¹⁰Mishimana, Yeremia,

¹¹Itai, Elieli,

¹²Yohanani, Elisabadi,

¹³Yeremia nende Makiban'nai.

¹⁴Balala khubandu bolwibulo lwa Gadi bali abasikari abakhongo abasinjil'langa abandu abahela elefu ndala ne abandi bali abasikari abatu abasinjil'langa omukunda kwabandu emia ndala.

¹⁵Mumwesi kwokhuranga mumuhika mulala olwomuchela kwa Yorodani kubetsanga nikwitsuye, bambukha omuchela, nibasalania abandu abali nibamenya khutsimbeka tsiombi tsibili tsiomuchela, ebukwe nende emasaba.

¹⁶Litukhu lindi omukanda kwabandu okhurula mutsinzibulo tsia Benjameni nende Yuda batsia muluhinga aha Daudi yali nali.

¹⁷Daudi yatsia okhubabukan'na ma nababool'la mbu, “Nikali mwitsanga singa abalina bokhukhonya, mwinjisibwe hano. Mweyonge khu ifwe! Nebutswa nikali mwitsanga khulwokhuusiemana khubasuku banje, kata olwaratemele okhumusaalisia, Nyasaye wabakuka befwe alakamanya ne niye owanomuhe esinyasio.”

¹⁸Omwoyo wa Nyasaye yenjila mumulala khubo olangwanga Amasai owamala naba omusinjil'li wabasikari “Amakhumi kataru,” ma nalanjisia naboola mbu, “Daudi omwana wa Yese, khuli abandu baabo, obulechi bube khuibe, nende bosi abakhukhonyanga! Nyasaye ali khulubeka lulwo.” Daudi yabenjisia ma nabela okhuba abemeli babasikari baabe.

¹⁹Abasikari balala okhurula mulwibulo lwa Manase batsia okhubuchila Daudi olwa yali natsitsanga halala nende Abafilisiti okhulwana Saulo. Daudi siyamala akhonyel'le Abafilisiti tawe, sichila abaruchi babwe bali noburi mbu yakhabasieman'ne khu Saulo owalinji omukhongo uwe, kho bamala nibamukalusia Sikilaki aha yamenyanga.

²⁰Bano nibo abasikari abali okhurula mulwibulo lwa Manase nibatsia khulubeka lwa Daudi. Adina, Yosabadi, Yediaeli, Mikaeli, Yosabadi, Elihu nende Siletsai. Abandu yaba bali abalindi babasikari elefu ndala, mumukanda kwa Manase.

²¹Barumikhila Daudi singa abasinjil'li babasikari baabe, sichila bosi mbwo bali abasikari beifuma. Olunyuma bali abasinjil'li babasikari mumahe ka Isiraeli.

²²Ahembi sielitukhu abandu abayia bemetanga khubasikari ba Daudi okhwola olwa basikari belihe baabe basilaana okhuba abenji singa abasikari belihe lia Nyasaye.

²³Olwa Daudi yali namenyele mwitaala lia Heburoni abasikari abali nibebiikhile ebiesingo biokhulwana beyonga nende abasikari baabe khulwo khumukhonyel'la okhubukula indebe yoburuchi okhurula khu Saulo, singa obwo MWAMI yali niyabasubisia.

²⁴Okhurula mubolwibulo lwa Yuda bali abasaatsa etsielefu tsisasaba netsimia munane aberechekhele okhulwana nibali nebikhumba nende amafumo.

²⁵Abolwibulo lwa Simioni bali abasaatsa etsielefu tsine natsitaru nemia ndala abandu bekibwa, obulwani.

²⁶Abolwibulo lwa Lawi bali abandu etsielefu netsimia tsisasaba.

²⁷Ne mubene yabo yalimwo Yehoyada omwemeli wesilibwa sia Haruni owali nabandu etsielefu tsitaru netsimia tsine natsitaru.

²⁸Abekho ba Sadoku, omulwani omuhalaba, bali abandu amakhumi kabili nababili abali abemeli.

²⁹Abolwibulo lwa Benjameni, abali abesilibwa sia Saulo bali abasaatsa etsielefu tsitaru, kata mbwo abandu abenji khubolwibulo lwa Benjameni bali abasubilwa khu Saulo.

³⁰Abolwibulo lwa Efuraimu bali abasaatsa etsielefu amakhumi kabili netsimia munane, abali abasikari abalulu mubilibwa biabwe.

³¹Enusu yabandu ba Manase bali abasaatsa etsielefu likhumi namunane abandu abelwa okhwikhasia Daudi khundebe yoburuchi.

³²Abolwibulo lwa Isakari bali nabemeli tsimia tsibili halala nende abandu bali hasi wabwe. Abemeli yaba bali khumanya aka Isiraeli ekhoyele okhukhola khandi munyinga eyakakhoyele okukholelwamwo.

³³Abandu bolwibulo lwa Sabuloni bali abasaatsa etsielefu amakhumi karano abandu abahulili khandi abasubilwa, aberechekhu okhulwana abali nibekibwa okhulwan'na ebilasan'nwe bietsimbila tsiosi.

³⁴Abolwibulo lwa Nafutali bali nabemeli ehelefu halala nabasikari etsielefu amakhumi kataru natsine natsitaru abali nebikhumba nende amafumo.

³⁵Abolwibulo lwa Dani bali etsielefu amakhumi kabili namunane netsimia tsisasaba abechibwa obulwani.

³⁶Abolwibulo lwa Asheri bali etsielefu amakhumi kane aberechekha okhulwana.

³⁷Ne okhurula ebukwe womuchela kwa Yorodani khwali nabandu betsinzibulo tsia Rubeni, Gadi nende enusu yabandu bolwibulo lwa Manase abahela etsielefu emia ndala namakhumi kabili nibali nebilasanwe bietsimbila tsiosi.

³⁸Abasikari yaba bosi niberechekhele okhulwana batsia Heburoni nibenyanga okhwikhasia Daudi khundebe yoburuchi bwesibala sia Isiraeli siosi. Abandu ba Isiraeli bandi bosi bali nibahambaniye khwing'ana yili.

³⁹Bamala amatukhu kataru nibali nende Daudi nibalitsanga ebiokhulia ebiatekhwa nende Abaisiraeli basiabwe nende okhunywa.

⁴⁰Okhurula ehale mutsinzibulo etsili esinyolu singa Isakari, Sabuloni nende Nafutali, abandu betsa netsipunda, tsingamia, tsinyumbu nende etsihili nitsichinjile ebiakhulia bino, mbu: obusie, amakhuyu, ewaini nende amafura komuseituni. Khandi baleera tsing'ombe nende amakondi khulwo okhwira nende okhulia. Kano kosi kamanyianga singa Abaisiraeli bosi bali nobusangali musibala siosi.