Read lunyore 1 AKETSINYINGA 13 Bible Online

1 AKETSINYINGA 13 - lunyore bible

1 AKETSINYINGA 13

¹Omuruchi Daudi yali okhuhuchilisania nende abemeli bosi abasinjil'langa abasikari elefu ndala nende abasinjil'langa abasikari emia ndala.

²Ma Daudi nalandia ling'ana khubandu ba Isiraeli bosi mbu, “Inywe nimwakhahuchil'la khandi nikakhaba nobulalilo bwo MWAMI Nyasaye wefwe, chende khurume abarumwa khubandu befwe bandi bosi nende khubesaalisi halala nende Abalawi abali mumataala mbu betse khwakan'ne n'nabo hano.

³Ma khutsie okhwenda Lisanduku lie Indakano ka Nyasaye eliali okhwanzukhilwa mumatukhu ka Saulo yali nali omuruchi.”

⁴Abandu bali okhusangasibwa nende lipaalo yilio ma nibalihuchil'la.

⁵Ma Daudi nabunjikha abandu bosi ba Isiraeli okhurula musibala siosi, okhurula khulwakho lwesibala sie Misiri esili enandete okhwola khulung'anyi lwa Hamatsi elubeka wesinyolu khulwo okhutsia okhwenda Lisanduku lie Indakano okhurula Kiriatsi Yearimu okhulihila Yerusalemu.

⁶Daudi nende abandu batsia khwitookho lia Baala akali okhuboola mbu, Kiriatsi Yearimu musibala sia Yuda khulwokhwenda Lisanduku lie Indakano ya Nyasaye eliahandikwakhwo eliira lio MWAMI Wokhunyala Biosi, owolurubalwe luli ikulu webilonge bietsimbaha.

⁷Babukula Lisanduku lie Indakano okhurula munyumba ya Abinadabu ma nibalira khwikaari liyia. Usa nende Ahio bemel'la likaari yilio,

⁸olwa Daudi nende abandu bandi bosi basalama nende obunyali bwosi khulwokhuhaana oluyali khu Nyasaye. Bali okhwemba nende okhukhupa ebindu biokhuhana amayoosi mbu: amatungu, amalele, ebikuti, amanyanga nende ebisilili.

⁹Olwaboola halutse lwa Kidoni, etsihili etsiali nitsichinjile Lisanduku tsiesikar'ra ma Usa nanyiila omukhono kukwe khulwo okhuletel'la Lisanduku lie Indakano.

¹⁰Nonoho OMWAMI yatiil'la Usa lileko ma namwira khulwokhutiila khwisanduku. Yafwila habwene yaho imbeli wo MWAMI.

¹¹Kho habundu yaho hakulikhwa eliira mbu Peresi Usa[4], okhurula olwene yilwo. Daudi yali nelileko sichila OMWAMI yali nahelesisie Usa esinyasio mwilekolie.

¹²Kho Daudi yali noburi khu Nyasaye ma naboola mbu: “Ndakhahila mbwena Lisanduku lie Indakano ingo?”

¹³Khulwako Daudi siyatsia ne Lisanduku lie Indakano Yerusalemu tawe. Nikarali yalilekha munyumba yomundu olangwana Obedi Edomu omwibule wa Gatsi.

¹⁴Lisanduku lie Indakano liamenya munzu ya Obedi Edomu khulwemiesi chitaru ne OMWAMI yalaama tsikhabi khubeinzu ya Obedi Edomu nende khubindu biosi ebia bali n'nabio.