Read lunyore 1 AKETSINYINGA 14 Bible Online

1 AKETSINYINGA 14 - lunyore bible

1 AKETSINYINGA 14

¹Omuruchi Hiramu wa Tiro yaruma abarume khu Daudi. Khandi yamurumila emisaala chiomusiita, abombokhi bamachina nende abafundi betsimbao khulwokhumwombokhela inyumba yoburuchi.

²Ma Daudi namanyilisia mbu OMWAMI yali namwemekhele okhuba omuruchi wa Isiraeli, khandi yali namuchinguuye muburuchibwe khulwabandu baabe Abaisiraeli.

³Daudi nali mu Yerusalemu, yateesia abakhasi abenji ma niyebula abasiani nende abakhaana abenji.

⁴Abaana balondakhwo bano Daudi yabebula nali Yerusalemu. Shamua, Shobabu, Natsani, Solomoni,

⁵Ibihari, Elishua, Elipeleti,

⁶Noka, Nefeki, Yafia,

⁷Elishama, Beeliada nende Elifeleti.

⁸Olwa Bafilisiti bahul'la mbu Daudi wemekhelwe okhuba omuruchi wa Isiraeli, abasikari babwe barula okhutsia okhumutiila. Kho Daudi yachenda nabasikari baabe okhutsia okhwakaana n'nabo.

⁹Abafilisiti boola Mwibanda lia Refaimu ma nibachaaka okhuyaaka emiandu chiabwe.

¹⁰Daudi yareeba OMWAMI mbu, “Nzie okhuseera Abafilisiti? Mbula olambelesia obulechi khubo?” OMWAMI nakalusia mbu, “Yee, baseere! Ise nzia okhukhuha obulechi.”

¹¹Ma Daudi nabaseer'ra habundu halangwanga Baali Perasimu ma nabaleka. Daudi naboola, “Nyasaye urumikhiye okhumuma obunyali bwabasikari abasuku singa omukhula kwamaatsi.” Kho habundu yaho halangwa Baali Perasimu[5].

¹²Olwa Bafilisiti belukha, balekha ebiniini biabwe inyuma, ne Daudi nalaka mbu bisambwe.

¹³Abafilisiti bakalukha bwangu mwibanda yilio nibachaaka okhuyaaka ebindu khandi.

¹⁴Daudi nareeba OMWAMI olwakhabili, naye namukalusia naboola, mbu, “Orabbaseera okhurula hano tawe, nebutswa obotokhane ma werechekhe okhubaseera okhurula elubeka lundi, ahembi nemisaala tsiebikhuuma.

¹⁵Olwa nohul'le liyoka liokhuchenda mumisaala ikulu, nobaseere sichila nambe ninjendanga imbeli wenywe okhuleka abasikari ba Bafilisiti.”

¹⁶Daudi yakhola ako MWAMI yali namulachile ma nakhunga Abafilisiti okhurula Gibeoni okhwola Keseri.

¹⁷Ifuma ya Daudi yalanda buli habundu, ma OMWAMI nakhola amahanga kosi okhuria Daudi.