Read lunyore 1 AKETSINYINGA 15 Bible Online

1 AKETSINYINGA 15 - lunyore bible

1 AKETSINYINGA 15

¹Daudi namal'le okhwombokha tsinyumba tsitsie mwitookholie, yali okhurechekha hokhwombokha liheema lie Lisanduku lie Indakano ya Nyasaye.

²Daudi yamala naboola mbu, “Abalawi bonyene nibo abachinga Lisanduku lie Indakano, sichila nibo abo MWAMI yahula okhulichinga nende okhumurumikhila khulwe inziayo.”

³Daudi yalanga Abaisiraeli bosi okhwitsa Yerusalemu olwa baba nibaleeranga Lisanduku lie Indakano habundu aha yali nalirechekheye.

⁴Khandi yarumania amang'ana mbu abolwibulo lwa Haruni nende Abalawi betse.

⁵Owetsa Okhurula mubesilibwa sia Kohatsi yali Urieli. Yali omusinjil'li wabandu emia ndala namakhumi kabili abolwibulo lulwe.

⁶Okhurula musilibwa sia Merari owetsa yali Asaya. Naye, yasinjil'la abandu tsimia tsibili namakhumi kabili.

⁷Okhurula musilibwa sia Gerishoni owetsa yali Yoeli. Naye yasinjil'la abandu emia ndala namakhumi kataru.

⁸Okhurula musilibwa sia Elisafani, owetsa yali Shemaya. Naye yasinjil'la abandu tsimia tsibili.

⁹Okhurula musilibwa sia Heburoni, owetsa yali Elieli. Naye yasinjil'la abandu amakhumi munane.

¹⁰Okhurula musilibwa sia Usieli owetsa yali Aminadabu. Naye yasinjiliye abandu emia ndala nelikhumi nababili.

¹¹Daudi yalanga omwesaalisi Sadoku nende Abiatsari halala na Balawi basasaba. Abalawi tsana bali: Urieli, Asaya, Yoeli, Shemaya, Elieli nende Aminadabu.

¹²Daudi yabool'la Abalawi mbu, “Inywe muli abemeli bebilibwa bia Abalawi. Mwetsienule khandi mutsienule Abalawi basienywe, kho mube abanyala okhuleera Lisanduku lie Indakano yo MWAMI Nyasaye wa Isiraeli habundu ahandali okhulirechekhela.

¹³Sichila simwabeyeho olwa liachinjilwe olwokhuranga, OMWAMI Nyasaye yakhuheye esinyasio khulwokhubula okhumwekayakaya singa obwa kenyekhanga.”

¹⁴Abesaalisi nende Abalawi nibetsienula kho babe abanyala okhuchinga Lisanduku lie Indakano yo MWAMI Nyasaye wa Isiraeli.

¹⁵Abalawi balichinjila khumisaala khumabeka kabwe singa obwo MWAMI yali niyalaka okhubir'ra mu Musa.

¹⁶Daudi yalaka abemeli ba Balawi beele Abalawi mumikhoosi chiabukhan'ne khulwo okhwemba tsinyembo tsiobusangali, nende okhukhupa amalele, obukhana nende ebilili.

¹⁷Kho Abalawi beela Hemani omusiani wa Yoeli; nende Asafu omusiani wa Berekia womusilibwa siabwe nende Etsani omusiani wa Kushala okhurula musilibwa sia Merari.

¹⁸Ne halala n'nabo, abaana babwe balondel'lakhwo mubukali bali, Sakaria, Yasieli, Shemiramotsi, Yahieli, Uni, Eliabu, Benaya, Maseya Matitsia, Elifelehu, Mikineya, nende Obedi Edomu nende Yelieli. Yabo bali abalindi bebilibwa.

¹⁹Abembi bano, mbu; Hemani, Asafu, nende Etsani nibo abanakhupe litungu liomukasa.

²⁰Sakaria, Yasieli, Shemiramotsi, Yehieli, Uni, Eliabu, Maseya nende Benaya nibo abanabakhupe amalele kamayoosi keikulu.

²¹Ne Matitsia, Elifelehu, Mikineya, Obedi Edomu, Yayieli nende Asasia, nibo abokhukhupa amalele mumayoosi kehasi.

²²Kenani, omwemeli wobwembi bwa Abalawi niye owemel'la tsinyembo, yikwo kwali omulimo kukwe sichila yali omusitsa wetsinyembo.

²³Berekia nende Elikana nibo abali abalindi be Lisanduku lie Indakano.

²⁴Shebania, Yoshafati, Natsanieli, Amasai, Sakaria, Benaya nende Eliasa omwesaalisi nibo abali okhukhupa etsitulumbete imbeli we Lisanduku lie Indakano. Obedi Edomu nende Yehia khandi nabo bahulwa okhulinda Lisanduku lie Indakano.

²⁵Ma omuruchi Daudi halala nabemeli ba Isiraeli nende abemeli babasikari nibatsia munyumba ya Obedi Edomu okhwenda Lisanduku lie Indakano, ne bali nomwekhoyo omukali.

²⁶Bali okhuhaana Omusango khu MWAMI okwetsichulukhi tsine natsitaru nende amakondi kane nakataru sichila Nyasaye yali nakhonyele Abalawi abali nibachinjile Lisanduku lie Indakano.

²⁷Daudi yali niyebikhile ekanzu eyanabwa khu ingubo yekatani inyukhe; khandi abembi bali nibebiikhile tsingubotsie katani kata Kenani omwemeli wabwe halala nende Abalawi bosi abali nibachinjile Lisanduku. Daudi yali niyebikhile efoti[6] eyalombwa khukatani.

²⁸Khulwe yako Abaisiraeli bosi batsia halala nende Lisanduku lie Indakano okhwola Yerusalemu nibakhupanga liyoka liobusangali, amayoosi ketsitulumbete, ebisiliba, nende amanyanga netsinyembo tsia malele.

²⁹Olwe Lisanduku liali nilileerwanga mwitookho, Mikali omukhaana wa Saulo yahengela mwitilisa ne nalola omuruchi Daudi nasiebanga nende okhuruuma khulwo busangali, ma namuchaaya mumwoyo kukwe.