Read lunyore 1 AKETSINYINGA 16 Bible Online

1 AKETSINYINGA 16 - lunyore bible

1 AKETSINYINGA 16

¹Bahila Lisanduku lie Indakano mwiheema elia Daudi yali naliombokheye ma nibalira mukari ma nibahaana emisango emisambe nende emisango tsiobuhambani khu Nyasaye.

²Daudi namal'le okhuhaana emisango yitsio, yalaamila abandu tsikhabi muliira lio MWAMI

³ma nabakabul'la bosi ebiokhulia. Yahelesia buli musaatsa nende buli omukhasi mu Isiraeli omuhayila kwomukaati esitonye sieinyama isambe nende ekeki elimwo amatunde.

⁴Daudi yahula balala khu Balawi okhwemel'la obwekayakayi bwo MWAMI Nyasaye wa Isiraeli, imbeli we Lisanduku lie Indakano, khulwokhwemba nende okhwitsoomia OMWAMI.

⁵Asafu yelwa okhuba omwemeli, ne Sakaria singa omulondi uwe. Yelieli, Shemiramotsi, Yehieli, Matitsia, Eliabu, Benaya, Obedi Edomu, Yeyieli nibo abenyekhanga okhupa amalele. Asafu niye owokhukhupa amanyanga,

⁶ne abesaalisi babili Benaya nende Yahasieli nibo abokhukhupa etsitulumbete hali khase imbeli we Lisanduku lie Indakano.

⁷Olwene yilwo nilwo olwokhuranga olwa Daudi okhuhelesia Asafu nende Abalawi omulimo kwokhwemba nibetsoomianga OMWAMI.

⁸Mukhupile OMWAMI embwo, mufumie obukhongo bubwe; mubool'le amahanga akamaal'le okhukhola.

⁹Mwembe nimwitsoomia OMWAMI, muboole akebindu ebilahi ebiayakhola.

¹⁰Musangale sichila ifwe khuli abaabe; yabo bosi abamwekayakayanga basangale!

¹¹Mukhaabe MWAMI nende tsingufutsie, ma mutsilil'le okhumwekayakaya.

¹²Mwitsul'le akokhuchenya akayakhola, akamangalimwa kaake, nende obukhalachi obwa yaribula,

¹³inywe abolwibulo lwa Isiraeli omurumikhi uwe, inywe abasiani ba Yakobo owomwene yeela.

¹⁴OMWAMI ni Nyasaye wefwe; amalako kaake kali khusibala siosi.

¹⁵Murakhebil'la Indakano ya Nyasaye, eya yalomba okhubaho inziayo tawe,

¹⁶Indakano eyayalomba nende Aburahamu, lisubisio eliayalomba nende Isaka.

¹⁷OMWAMI yalomba Indakano nende Yakobo, Indakano eyakhamenye khulwe inziayo.

¹⁸Yaboola mbu “Ndikhuhelesia esibala sia Kanaani, siakhabe obulaame bubwo.”

¹⁹Abandu ba Nyasaye sibali abenji tawe, khandi bali abacheni musibala sia Kanaani.

²⁰Bachenda chendanga okhurula musibala silala okhutsia musindi, okhurula mwihanga elala okhutsia mulindi.

²¹Nebutswa OMWAMI siyalekha omundu wosi abasandie tawe; khulwo khubasinga, yatsechiyia abaruchi

²²naboola: “Murasalisiakhwo abarumikhili banje abandeela tawe; murakhatiilakhwo khubaroobi banje tawe.”

²³Mwembele OMWAMI abesibala siosi! Mulandie sielitukhu amang'ana amalahi mbu wakhuhonia ifwe.

²⁴Mulandie obukhongo bubwe khumahanga kosi, ebikholwa bibie ebikali khubandu bosi.

²⁵OMWAMI nomukhongo ne akhoyele khuhebwa oluyali lweikulu; ahebwe oluyali okhuyomba abanyasaye bandi bosi.

²⁶Abanyasaye ba mahanga kandi kosi bali butswa ebiniini, nebutswa OMWAMI yalonga likulu.

²⁷Obukhongo nende obunyali bumubotokhananga, obunyali nende obusangali bwaitsusia Ehekalu yiye.

²⁸Mwitsoomie OMWAMI inywe abandu bosi khusibala, mwitsoomie obukhongo bubwe nende obunyali bubwe.

²⁹Mwitsoomie eliira lio MWAMI liobukhongo; leere esihanwa khandi witse mu Hekalu yiye. Mwinamile omutsienukhu olwaba nalolekha;

³⁰mutechele imbeli uwe, inywe esibala siosi! Esibala siayesichikha buralilu mubukono bwasio, ne sinyala okhusimulwa tawe!

³¹Esibala nende likulu bisangale! Bool'le amahanga mbu OMWAMI nomuruchi.

³²Hoola, ibe inyanza nende biosi ebilimwo; sangala ebikuuri nende biosi ebilimwo!

³³Emisaala mumutsuru tsilakhupa liyoka liobusangali, olwa OMWAMI nayetse okhwamiha khusibala.

³⁴Khupile OMWAMI embwo sichila OMWAMI nomulahi, obuyanzi bubwe nobweinziayo.

³⁵Mumubool'le mbu, “Khuhonie, E Nyasaye Omuhonia wefwe; khubunjelesie halala; khusoole okhurula khu Abetsinzibulo, kho khube abanyala okhusangala ma khwitsoomie eliira lilio litsienukhu.”

³⁶Mwitsoomie OMWAMI Nyasaye wa Isiraeli! Mumwitsoomie luno nende inziayo! Ma abandu bosi nibaboola mbu, “Amina” ma nibetsoomia OMWAMI.

³⁷Omuruchi Daudi yara Asafu nende Abalawi basie okhutsilil'la okhuba abahenji bobwekayakayi bwahabundu he Lisanduku lie Indakano liarebwa. Benyekhanga okhukhola emilimo chiabwe habwene yaho buli litukhu.

³⁸Obedi Edomu omusiani wa Yedutsuni halala nende abasaatsa amakhumi munane besilibwa sisie benyekhanga okhumukhonya. Hosa nende Obedi Edomu nibo abasinjil'la obulindi bwesilibwa.

³⁹Omwesaalisi Sadoku nende abesaalisi basie nibo abasinjil'la omulimo kwobwekayakayi bwo MWAMI habundu hokhwekayakayila mu Gibeoni.

⁴⁰Buli mutsuli nende buli mukolooba basambilanga emisango emichima khulusambwa okhulondokhana nende obwa kahandikwa Mumalako ako MWAMI yahelesia Isiraeli.

⁴¹Habwene yaho baliho nende Hemani nende Yedutsuni nende abandi abelwa khulwokhwemba tsinyembo tsiokhwitsoomia OMWAMI khulwobuyanzi bubwe obweinziayo.

⁴²Hemani nende Yedutsuni khandi basinjil'la etsitulumbete, amanyanga nende ebindu bindi ebiakhupwanga olwe tsinyembo tsiokhwitsoomia tsiembwanga. Abandu besilibwa sia Yedutsuni basinjil'la obulindi bwebilibwa.

⁴³Ma buli mundu nakalukha ingo, khandi Daudi natsia ingo khulwo khubakhwo nende abeinzu yiye khutsinyinga ndititi.