Read lunyore 1 AKETSINYINGA 17 Bible Online

1 AKETSINYINGA 17 - lunyore bible

1 AKETSINYINGA 17

¹Omuruchi Daudi yali niyamenya munzu yiye yoburuchi. Litukhu elala yarumania amang'ana mbu omuroobi Natsani yetse. Olwa yetsa, yamubool'la mbu, “Hano ndamenya munyumba eyombokhwa nemisiita nebutswa Lisanduku lie Indakano yo MWAMI liabikhwa mwiheema.”

²Natsani namukalusia naboola mbu, “Khola kosi akali mumwoyo kukwo, sichila Nyasaye ali halala n'nawe.”

³Nebutswa obutukhu yibwo Nyasaye yabool'la Natsani mbu,

⁴“Tsia obool'le Omurumikhili wanje Daudi mbu mboolanga, ‘Ibe sioli niwe wokhunyombokhela Ehekalu yokhumenyamwo tawe.

⁵Okhurula olwa ndanunula abandu ba Isiraeli okhurula Emisiri okhwola luno sili okhumenyakhwo mu Hekalu, nebutswa menyanga khasotso mumaheema ninjendachenda habundu hosi.

⁶Mukhuchenda khwanje khwosi nabandu ba Isiraeli sindareebakhwo omwemeli wosi owandeela esiachila nibaranyombokhelakhwo ehekalu yemisiita tawe.’ ”

⁷“Kho yako obool'le omurumikhili wanje Daudi mbu ise OMWAMI Wokhunyala Biosi mubool'langa mbu, ‘Ndakhuhinia mukhwaya amakondi musiayo, nikhwahula okhuba omuruchi wabandu banje Abaisiraeli.

⁸Ndabeyenje n'nawe habundu hosi ahawatsiyenje ma nindeka abasuku baabo bosi olwe ibe wainond'enje inyuma. Ndakhakhukhole oweifuma singa abemeli bomusibala abakhongo okhusila.

⁹Khandi ndakhahelesie abandu banje ba Isiraeli habundu hokhumenya ma ndakhabasimikheho kho babe abanyala okhuba nende hango habwe abene ma sibakhanyakhanekhwo khandi tawe. Abandu ababi sibakhabakhupie esibi khandi singa babakhupianga esibi olwokhuranga tawe,

¹⁰batsilil'la okhubakhupia esibi okhurula olwa ndahula abakhalachi okhuba abemeli khubandu banje ba Isiraeli. Nebutsa yaka sinakekholekhwo khandi tawe. Khandi ndakhaleke abasukubo bosi khandi ndakhakhuhe abetsukhulu.

¹¹Olwe ibe nofwe ma noyabilwe okhutsia habakuka baabo bali, ndakhahule mulala khubasiani baabo okhuba omuruchi ma ndakhakhole obwami bubwe okhuba obwetsingufu.

¹²Ye niye owakhanyombokhele ehekalu ma ndakhalole mbu abolwibulo lulwe bamihanga inziayo.

¹³Ise ndakhabe samwanawe, naye yakhabe omusiani wanje. Sindakhahinie obukhonyi bwanje khuye singa ndahinia khu Saulo, owandali okhuhiinia khubwami kho ibe noba omuruchi tawe.

¹⁴Ndakhamukhole okhuba omuhenji wabandu banje nende lihanga lianje khulwe inziayo. Abolwibulo lulwe baliba abaruchi khulwe inziayo.’ ”

¹⁵Natsani yabool'la Daudi kosi aka Nyasaye yali namubisuliye.

¹⁶Ma omuruchi Daudi natsia Mwiheema liokhubaho khwo MWAMI, niyekhalamwo, ma nasaaya mbu, “Ise khali wina OMWAMI Nyasaye kata abeinyumba yanje bakhoya sina, akachil'le nokhwosia inyinga yino.

¹⁷Ma khandi kata luno okholanga akayombele akokhuranga; ibe wamala okhuhaana amasubisio khubolwibulo lwanje khumihika etsitsanga, ma khandi ibe OMWAMI Nyasaye umbetsanga oluyali singa omundu omukhongo.

¹⁸Nimang'ana sina aka ndakhanyala okhukhubool'la khandi. Waimanya bulahi ne umbetsanga oluyali, ise omurumikhili uwo.

¹⁹Bwali obwenyi bubwo nende obulalilo bubwo khulwo okhukhol'la yaka nende okhumanyia ako bukali bwanje mumatukhu aketsanga.

²⁰OMWAMI, abulaho omundu undi ofwana ibe; khwamanya okhurula khale mbu ibe wenyene oli Nyasaye.

²¹Libulaho lihanga lindi liosi musibala elifwana Isiraeli elia wanunula okhurula mubuhambe nende okhukhola abandu balio okhuba abandu baabo omwene. Ebindu ebikhongo khandi ebikali ebia wabakhol'la bialandia oluyali lulwo musibala siosi. Wali okhusoola abandu baabo okhurula Emisiri ma nokhunga tsinzibulo tsindi olwa Abaisiraeli bakhulondanga.

²²Wamala okhukhola Isiraeli okhuba abandu baabo khulwe inziayo, ne ibe OMWAMI wakwa Nyasaye wabwe.

²³“Ne luno E OMWAMI, Nyasaye ohesie lisubisio elia wandesuhila ise nende abolwibulo lwanje amatukhu kosi, ma okhole akawaboola wakhakhole.

²⁴Ifuma yiyo yakhabe ingali, ne abandu bakhaboole inziayo mbu, ‘OMWAMI Wokhunyala Biosi ni Nyasaye wa Isiraeli.’ Khandi wakhabiikhe obwami mubolwibulo lwanje emihika chiosi.

²⁵Ndi nende olutswoni okhusaaya amasaayo kano khuibe Nyasaye wanje sichila ibe waimbisul'la yaka kosi khu ise, omurumikhili uwo, ma wambool'la mbu naweele abolwibulo lwanje okhuba abaruchi.

²⁶Ibe OMWAMI oli Nyasaye ma umal'le okhulaka lisubisio liokhuchenya yili khu ise.

²⁷Khureebanga olaamile abolwibulo lwanje tsikhabi kho babe abanyala okhutsilil'la okhunyoola esirenda sisio. Ibe OMWAMI wamala okhusubisia yaka, ne tsikhabi tsitsio tsilaba khubolwibulo lwanje inziayo.”