Read lunyore 1 AKETSINYINGA 18 Bible Online

1 AKETSINYINGA 18 - lunyore bible

1 AKETSINYINGA 18

¹Olunyumakhwo omuruchi Daudi yaseera Abafilisiti ma nabaleka. Yahinia litookho lia Gatsi halala namataala kalibotokhana mubunyali bwabwe.

²Khandi yaleka abandu ba Moabu abetsa hasi woburuchibwe ma nibachaaka okhurunga obusuru khu Daudi.

³Olulondakhwo, Daudi yaseera Hadadesa owali omuruchi wa Soba olukongo lwa Siria oluli ahembi nesibala sia Hamatsi, sichila Hadadesa yali nateemanga okhubukula liloba elili Emurwe womuchele kwa Efurate.

⁴Daudi yafumila amakaari kaake akahela elefu ndala, halala nabasikari bokhutsisululi etsielefu tsine natsitaru, nende abasikari bokhuchenda khubilenje etsielefu amakhumi kabili. Yabiikha etsisululi etsihela amakaari emia ndala ne etsindi tsiosi naremaka ebilenje.

⁵Olwa Abasiria okhurula Damasiko baruma abasikari okhukhonya omuruchi Hadadesa, Daudi yabaseera ma niyeera abandu etsielefu amakhumi kabili natsibili.

⁶Ma niyombokha etsikambi tsiabasikari musibala siabwe, ne abandu besibala yisio bali hasi oburuchi bubwe ma nibarunga obusuru khuye. OMWAMI yahelesia Daudi obulechi habundu hosi.

⁷Daudi yali okhufumila ebikhumba bietsahabu ebiabemeli ba Hadadesa bali nibachinjile ma nabihila Yerusalemu.

⁸Khandi yabukula emikasa eminji okhurula mumatookho ka Tibuhatsi nende Kuni, akarukwanga nende Hadadesa. (Olunyuma Solomoni yarumikhila omukasa yiku khulwokhwombokha litangi, etsisiilo nende ebindu biosi ebialombwa khumukasa ebiarumikhilwanga mu Hekalu.)

⁹Toi omuruchi wa Hamatsi yahul'la obwa Daudi yali nalekele abasikari bosi ba Hadadesa, owali omuruchi wa Soba.

¹⁰Kho yaruma omusiani uwe Hadoramu okhusiesia omuruchi Daudi nende okhumukhupila embwo khulwokhuleka Hadadesa, owa Toi yali niyalwana n'naye hali akhenji. Yoramu yahil'la Daudi ebihanwa ebialombwa khutsahabu, khufetsa nende khumukasa.

¹¹Omuruchi Daudi yabiihana khulwo okhurumikhilwa mubwekayakayi, halala nende efetsa nende etsahabu ebiayabukula okhurula mutsimbia etsia yaleka tsino mbu: Edomu, Moabu, Amoni, Filisiti nende Amaleki.

¹²Abisai, owa mama uwe yali Seluya yalekela abandu ba Edomu mwibanda liechumbi, ma niyeera abandu etsielefu likhumi nende munane khubo.

¹³Yombokha etsikambi tsiabasikari musibala sia Edomu siosi, ne abandu bebwene iyo nibaba hasi hoburuchi bwa Daudi. OMWAMI yahelesia Daudi tsingufu tsiokhuleka buli habundu hosi.

¹⁴Daudi yamiha esibala sia Isiraeli siosi, ma nateema akanyalikha okhulola mbu abandu baabe bakhol'lwanga obulahi munjila inunji.

¹⁵Omusiani wanga Abisai olangwa Yoabu niye owali etswoni ya basikari; Yehoshafati omusiani wa Ahiludi niye omulindi wamahandiiko;

¹⁶Sadoku omusiani wa Ahitubu nende Ahimeleki omusiani wa Abiatsari nibo bali abesaalisi; Seraya yali omuhandichi wemise;

¹⁷Benaya omusiani wa Yehoyada yali omusinjil'li wabasikari abalindanga Daudi, ne abasiani bomuruchi Daudi bali netsindebe tsingali muburuchi bwa samwana.