Read lunyore 1 AKETSINYINGA 19 Bible Online

1 AKETSINYINGA 19 - lunyore bible

1 AKETSINYINGA 19

¹Inyuma weyaka Nahashi omuruchi wa Amoni yafwa, ne omusianiwe olangwanga Hanuni yamala abe omuruchi.

²Ma Daudi naboola mbu, “Okhwola khol'le Hanuni obulahi singa obwa samwana yali okhuukhol'la ise.” Kho Daudi yaruma abarume khu Haruni okhumulemia omwoyo khulwokhufwa khwa samwana. Olwa abarume boola Amoni ma nibatsia okhulola omuruchi Hanuni,

³abemeli besibala sia Amoni babool'la omuruchi mbu, “Opaalanga mbu olwa Daudi akhurumiye abandu bokhukhulemia omwoyo kho ahaananga oluyali khupapawo noho? Sikali mbwo tawe! Daudi abarumile hano okhwitsa okhurunilisia nende okhulambuula masilisi akali musibala sino, kho abe onyala okhusileka.”

⁴Hanuni yafumila abarume ba Daudi ma nabeka tsindefu tsiabwe, nakhalaka tsingubo tsiabwe mus'sienje ma nabakhunga.

⁵Abarume yabo bali nes'simba murwe esikali ma nibaria okhukalukha ingo. Olwa Daudi yahul'la akali nikekholekhele khubo, yabarumila ling'ana mbu bamenye Yeriko ne barachelela tawe okhwola olwe tsindefu tsiabwe tsiakhabe nitsimel'le ma nitsikhul'le.

⁶Omuruchi Hanuni halala nende Abaamoni bamanya mbu bamal'le okhuhamba Daudi obusuku, kho bamala nibarunga etsikilo tsietsahabu etsielefu amakhumi kataru natsine khulwo khukombola amakaari nende abahili bamakaari okhurula Mesopotamia yemukulu nende akandi okhurula Maaka nende Soba tsisoma tsia Siria.

⁷Bakombola amakaari kobulwani etsielefu amakhumi kataru natsibili, ne abasikari bomuruchi wa Maaka betsa nibombokha ekambi ahembi Madeba. Abaamoni nabo khandi barula mumatookho kabwe ma niberechekha okhulwana lihe.

⁸Olwa Daudi yakahul'la, yaruma Yoabu halala nabasikari bosi okhutsia mwihe okhubaseera.

⁹Abaamoni barula esioba ma nibasinjila mubukono bwabwe bwokhulwana habwinjil'lo abuhenjele Rabba elili litookho liabwe likhongo, ne abaruchi abali nibetsele okhubakhonyel'la nibabukula obukono bwabwe musibala esialamu.

¹⁰Yoabu yalola mbu abasikari babasuku betsukhila nibamuseera okhurula imbeli nende inyuma, kho yamala niyeela abasikari abalulu okhurula mu Baisiraeli ma nabara habundu aha bahengana nende Abasiria.

¹¹Abasikari bandi bosi abasikala yabara okhusinjil'lwa nende Abisai omusiani wabwe. Abisai yali okhubara mubukono okhuhengana nende Abaamoni.

¹²Yoabu yamala namubool'la mbu, “Nolola Abasiria nibandekel'langa, witse okhukhonya, ne Abaamoni nibaba nibakhulekel'langa, nanzitse okhukhonya.

¹³Okufuhale khandi obe neikholo! Chenda khulwane butinyu khulwabandu befwe nende amatookho ka Nyasaye wefwe. Ne obulalilo bwo MWAMI bwekhole.”

¹⁴Yoabu nende abasikari baabe besunda hambeli okhuseera Abasiria, nebutswa Abasiria nibelukha.

¹⁵Olwa Abaamoni balola Abasiria nibelukhanga, nabo khandi belukha okhurula khu Abisai ma nibenjila nibatsia mwitookho. Ma Yoabu nachelela Yerusalemu.

¹⁶Abasiria bamanya mbu bamal'le okhulekwa nende Abaisiraeli, kho bamala nibahinia abasikari babwe okhurula Siria ebukwe womuchela kwa Efurate ma nibabara hasi hobwemeli bwa Shobaki etswoni yabasikari ba Hadadesa omuruchi wa Soba.

¹⁷Olwa Daudi yakahul'la, yabunjikha emikanda chiabasikari ba Isiraeli bosi halala, niyambukha omuchela kwa Yorodani ma nabara mubukono obuhengana nende Abasiria. Obulwani bwachiaka

¹⁸ne Abaisiraeli nibakhunga abasikari Ba Basiria. Daudi halala nabasikari baabe beera Abasiria etsielefu tsine natsitaru abali nibelusianga amakaari kobulwani halala nabasikari abachend'anga khubilenje etsielefu amakhumi kane. Khandi beera etswoni yabasikari ba Siria olangwanga Shobaki.

¹⁹Olwa abaruchi abarukwanga nende Hadadesa balola mbu balekelwe na Baisiraeli, balomba omulembe nende Daudi ma nibahuchil'la okhuba hasi hoburuchibwe! Abasiria sibamala bahuchil'le khandi okhukhonya Abaamoni tawe.