Read lunyore 1 AKETSINYINGA 20 Bible Online

1 AKETSINYINGA 20 - lunyore bible

1 AKETSINYINGA 20

¹Mukhuchiaka khwomuhika, olwabaruchi bang'aya okhutsia mwihe, Yoabu yemel'la abasikari okhuseera esibala sia Amoni, nebutswa omuruchi Daudi yasikala Yerusalemu. Bafumbila litookho lia Rabba ma nibaliseera nibasasia biosi ebialimwo.

²Esiniini sia Baamoni esilangwa Moleki siali nolusimbi lwetsahabu khumurwe kwasio olwali nobusiro obuhela etsikilo amakhumi kataru natsine. Lwalikhwo namachina amanyinanyinu aka Daudi yabukula nara khulusimbi lulwe. Khandi yayaaka ebindu ebinji okhurula mwitookho.

³Yabukula abandu bomwitookho ne nabahelesia ebindu biokhutiyila. Nabio biali emisimemo, amachembe nende etsisoka. Yakhola mbwo khubandu bandi bosi bamataala ka Amoni kandi. Ma Daudi nende abasikari bandi bosi nibakalukha Yerusalemu.

⁴Olunyumakhwo, lihe liachiaka khandi nende Abafilisiti habundu halangwa Keseri. Yaka kekhola olwa Sibekai okhurula Hushahi yeera okundu ok'kufu okwalangwanga Sipai, ma Abafilisiti nibalekwa.

⁵Khandi obulwani bundi bwaliho nende Abafilisiti ma Elihanani omusiani wa Yairi niyeera Lahimi, amwabo Goliati okhurula Gatsi, owelifumo lilie liali nolubango[7] lwobusiro singa omusaala kwomulukhi wetsingubo.

⁶Khandi obulwani bundi bwali Gatsi aha khwali nende okundu ok'kufu okwali nebitere bisasaba khubuli mukhono khandi ebino bisasaba khubuli silenje. Yali owolwibulo lwe Emindu emikufu chiakhale.

⁷Kwachaaya Abaisiraeli ne Yonatsani omusiani wa Shama amwabo Daudi yali okhwira okundu ok'kufu yikwo.

⁸Bataru yaba, abeerwa nende Daudi nabandu baabe bali abolwibulo lwemindu emikufu chia Gatsi.