Read lunyore 1 AKETSINYINGA 21 Bible Online

1 AKETSINYINGA 21 - lunyore bible

1 AKETSINYINGA 21

¹Setani yenya okhuleera amanyakhano khu Baisiraeli, kho yachila Daudi nabukula amabalo kabandu.

²Daudi nalaka Yoabu nende abemeli bandi babasikari mbu, “Tsie musibala siosi sia Isiraeli okhurula khundulo khwelubeka l'lala okhwola khundulo khwelubeka lundi ma mubale abandu. Nyenyanga manye nabandu banga abalimwo.”

³Nebutswa Yoabu yakalusia omuruchi naboola mbu, “OMWAMI Nyasaye nayanza yenjiyie abandu ba Isiraeli hali emia ndala okhuyomba obwa bali luno! Omwami, yaba nabarumikhili baabo bosi. Busina wenyanga okhubabasia ma okhole abandu bosi okhuba nesikha?”

⁴Nebutswa omuruchi yahachia Yoabu okhukhola akalachile. Yoabu yarula natsia, nachenda musibala siosi sia Isiraeli ma nakalukha Yerusalemu.

⁵Yahaana amabalo kabasaatsa bosi abanyala okhulwana lihe. Bali abasaatsa emilioni ndala netsielefu emia ndala mu Isiraeli ne mu Yuda bali abasaatsa etsielefu tsimia tsine namakhumi kane nakataru.

⁶Nebutswa siyabala abolwibulo lwa Lawi nende Benjameni tawe sichila lilako liomuruchi siliamuyanzisia tawe.

⁷Nyasaye siyayanzisibwa nende okhubalwa yikhwo tawe kho yahaana esinyasio khu Isiraeli.

⁸Daudi nabool'la Nyasaye mbu, “Mal'le okhukhola tsimbi tsingali okhusila khulwo okhukhola yaka. Yanza umbeele. Khol'le amang'ana koluhingwa.”

⁹Ma OMWAMI nabool'la Gadi, owali omuroobi wa Daudi mbu,

¹⁰“Tsia obool'le Daudi mbu muhetsanga ebindu bitaru yeelekhwo silala. Namukhol'le esianabe niyel'le.”

¹¹Gadi yatsia khu Daudi namubool'la ako MWAMI yali nabooye, ma namureeba mbu, “Wakhenyakhwo esili hena?

¹²Emihika chitaru etsieinzala? Nohomba emiesi chitaru echiokhwilukha okhurula khu mahe kabasuku? Nohomba amatukhu kataru ako MWAMI akhuseere nende olukanga nende okhurumila amakhupako musibala sisio narumikhilanga om'malaika uwe okhuleera okhufwa musibala sia Isiraeli siosi? Nikalusio sina eliambil'la OMWAMI?”

¹³Daudi nakalusia Gadi naboola mbu, “Ndi musibi esikali! Nebutswa sinyenya okhuhebwa esinyasio nabandu tawe. Lekha OMWAMI mwene abe niye oumbelesia esinyasio, sichila ali netsimbabasi.”

¹⁴Kho OMWAMI yaruma likhupako khubandu ba Isiraeli, ma abandu etsielefu amakhumi kane nende kataru nibafwa.

¹⁵Ma khandi OMWAMI naruma om'malaika okhusasia Yerusalemu nebutswa yakalukhania inganakani yiye ma nabool'la om'malaika mbu, “Lekha! Yako kahel'le!” Om'malaika yali nasinjiye halutse lwa Arauna omuyebusi.

¹⁶Daudi yalola Om'malaika nasinjiye hakari m'miya, natil'le olukanga lulwe m'mukhonokwe, niyerechekhele okhusasia Yerusalemu. Ma Daudi halala nabemeli bandi, bosi abali nibebiikhile tsingubo tsiamatasi benama obweni bwabwe nibwetilanga hasi.

¹⁷Daudi yasaaya naboola mbu, “E Nyasaye nise okhol'le obubi. Nise olachile mbu abandu babalwe. Abandu abatakha yaba bakhol'le sina? OMWAMI Nyasaye wanje haana esinyasio khu ise nende abeinzu yanje, ne obeele abandu baabo!”

¹⁸Om'malaika wo MWAMI nabool'la Gadi alake Daudi atsie okhwombokhela OMWAMI olusambwa halutse lwa Arauna.

¹⁹Daudi yahuchil'la ako MWAMI yaboola ma natsia singa obwa Gadi yali namubooleye.

²⁰Habwene yaho, halutse lwa Arauna, abasiani bane ba Arauna halala n'naye bali nibahuulanga ingano, ne olwa balola Om'malaika belukha nibebesa.

²¹Olwa Arauna yalola omuruchi Daudi niyetsanga; yarula halutse ma niyenama obweni bubwe nibwetila hasi.

²²Daudi namubool'la, “Ngusia olutse lulwo yilu kho mbe onyala okhwombokhelaho OMWAMI olusambwa okhwikal'la olumbe. Nakhuurunge obukusi bwaho hosi.”

²³Arauna naboola mbu, “Bukula omwami, ma okhole akawenyanga okhukhola. Etsihili tsiokhusambwa singa omusango khulusambwa nzietsi, ne tsimbao tsiokhuhila khulwo khurumikhila singa tsikhwi nzietsi, khandi ingano khulwo khurumikhila singa tsikhwi nzietsi, khandi tsimbao khulwo khuhana esihanwa nzieyi. Biosi khuhetsanga.”

²⁴Nebutswa omuruchi Daudi yamukalusia naboola, “Tawe, nzia okhukhurunga obukusi bwabio bwosi. Sindakhahaanakhwo esihanwa khu MWAMI esindu esisili esisio tawe, esie ise rakul'le amapesa tawe.”

²⁵Ne yamala narunga Arauna ebitonye bietsahabu etsimia tsisasaba khulwo olutse yilwo.

²⁶Yombokhelaho OMWAMI olusambwa ma nahaana emisango chiokhusambwa nende emisango chiobuhambani. Daudi yasaaya, ne OMWAMI yakalusia amasaayo kaake khulwo khuruma omul'lo okhurula mwikulu okhusamba emisango echiali khulusambwa.

²⁷OMWAMI yabool'la om'malaika abiikhi olukanga lulwe, ne om'malaika yakhola mbwo.

²⁸Daudi yalola mbu OMWAMI yali okhukalusia amasaayo kaake, kho yamala nahaana emisango khulusambwa olwali halutse lwa Arauna.

²⁹Liheema liokhubaho khwo OMWAMI, elia Musa yali niyalomba olwa bali musitsiimi nende olusambwa lwemisango chiasambilwangakhwo, biali nibisili habundu hokhwekayakayila mu Gibeoni olwene yilwo.

³⁰Nebutswa Daudi siyayenya okhutsiayo khulwo okhwekayakaya Nyasaye tawe, sichila yali nali noburi khulukanga lwom'malaika wo MWAMI.