Read lunyore 1 AKETSINYINGA 22 Bible Online

1 AKETSINYINGA 22 - lunyore bible

1 AKETSINYINGA 22

¹Ma Daudi naboola, “Hano niho ahe Ehekalu yo MWAMI Nyasaye yakhabe. Ne yilu nilwo olusambwa olwabandu ba Isiraeli banyala okhuhan'nakhwo emisango emisambe.”

²Omuruchi Daudi yalaka abandu abacheni bosi abamenyanga musibala sia Isiraeli, betse halala bosi ma nabahelesia emilimo chiokhukhola. Abalala khubo babaatsa amachina khulwokhwombokha Ehekalu.

³Yahaana ebichuma ebinji khulwokhulomba emisimali nende ebitil'lo biebilibwa bietsimbaho nende omukasa omwinji okurakhanyala okhupimwa.

⁴Yaloosia nende abandu ba Tiro nende Sidoni okhumuleer'ra emisaala chiomusiita eminji.

⁵Daudi yaboola mumwoyo masilisi mbu, “Ehekalu yomwana wanje Solomoni yakhombokhe okhwola ebe eyeing'ono khandi eyoluyali musibala siosi. Nebutswa Solomoni asili omubuukha khandi asili okhumanya amang'ana amenji, khe okhwola ise murechekhele ebiokhurumikhila khuyo!” Kho Daudi yarechekha ebindu biokhwombokhela Ehekalu nasili khufwa.

⁶Daudi yarumania omusiani uwe Solomoni alangwe ma namulaka yombokhele OMWAMI Nyasaye wa Isiraeli Ehekalu.

⁷Ma Daudi namubool'la mbu, “Omwana wanje ise ndenyanga okhwombokhela OMWAMI Nyasaye wanje Ehekalu.

⁸Nebutswa OMWAMI yambool'la mbu ise ndayiira abandu abenji khandi ndalwana amahe amenji. Khulwe yako khulwa amatsahi amenji akandaratia, OMWAMI sahuchil'langa mwombokhele Ehekalu tawe.

⁹Nebutswa OMWAMI yali okhumbelesia lisubisio niyambool'la mbu ‘Ibe wakhebule omusiani, owakhamihe mumulembe. Ndakhamuhelesie omulembe hakari wabasuku baabe bosi. Eliira lilie liakhabe Solomoni, ne mumatukhu kobwami bubwe ndakhahelesie Isiraeli omulembe nende obuhuulukhi.

¹⁰Yakhanyombokhele Ehekalu. Yakhabe omwana wanje nase ndakhabe samwana. Abeinyumba yiye bakhamihe Isiraeli khulwe inziayo.’ ”

¹¹Daudi natsilil'la okhumuboola mbu, “Luno Omusiani wanje, OMWAMI Nyasaye uwo abe n'nawe ma khandi ahesie lisubisio lilie khuibe mbu omwombokhele Ehekalu.

¹²Khandi OMWAMI Nyasaye uwo akhuhelesie amapaalo nende obuchesi kho obe onyala okhwamiha Isiraeli okhulondokhana nende Amalako kaake.

¹³Niwakhalonda amalako kosi ako MWAMI yahelesia Musa khulwa Abaisiraeli okhulonda, wakhaba nol'lahi. Obe nesinani nende oburalilu ma orakhalekha esindu siosi sikhurisie tawe.

¹⁴Mal'le okhubiikha etsahabu eyomba etsitani etsielefu tsitaru netsimia tsine khandi efetsa eyombele etsitani etsielefu amakhumi kataru natsine khulwo khurumikhilwa okhwombokha Ehekalu. Okhumeetakhwo, khuli nebichuma nende emikasa eminji echiorabbala. Khandi ndi nende emisaala halala namachina, nebutswa okhwola onyoole ebindi okhumeetakhwo.

¹⁵Ibe oli nabakholi abenji. Khuli nende abasaatsa bokhutiya mutsikware tsiamachina, khuli nende abombokhi nende ababaatsi betsimbao kata nende abakholi bamakhono abenji abanyala okhutiya emilimo chiabukhan'ne.

¹⁶Banyala okhutiya nibarumikhilanga etsahabu, efetsa omukasa nende ebichuma. Luno chiaka omulimo, ne OMWAMI abe n'nawe.”

¹⁷Daudi yalaka abemeli bosi ba Isiraeli okhukhonyana nende Solomoni.

¹⁸Daudi yaboola mbu, “OMWAMI Nyasaye wenywe yabeyenje n'nenywe ma wamuhelesia omulembe tsimbeka tsiosi. Yali okhuchila nindeka tsinzibulo tsiosi etsiamenyanga musibala muno, ne luno abandu bamwo bali hasi hamalako kenywe nende ako MWAMI.

¹⁹Luno murumikhile OMWAMI Nyasaye wenywe nende omwoyo kwenywe kwosi nende amapaalo kenywe kosi. Chiake okhwombokha Ehekalu, kho mube onyala okhubiikhamwo Lisanduku lie Indakano yo MWAMI, nende ebindu bindi biosi ebitsienukhu ebirumikhilwanga mukhwekayakaya.”