Read lunyore 1 AKETSINYINGA 23 Bible Online

1 AKETSINYINGA 23 - lunyore bible

1 AKETSINYINGA 23

¹Olwa Daudi yali nali omusakhulu okhusila yara omusiani uwe Solomoni khundebe yobwami bwa Isiraeli.

²Daudi yaleera abemeli bosi ba Isiraeli halala nende abesaalisi bosi nende Abalawi bosi.

³Yabukula amabalo ka Balawi bosi abes'saatsa abemihika amakhumi kataru nende abayombaho. Bosi halala bali etsielefu amakhumi kataru nende munane.

⁴Daudi yahelesia Abalawi etsielefu amakhumi kabili natsine omulimo kwokhusinjil'la emilimo chie Ehekalu, Abalawi etsielefu tsisasaba okhubiikha etsirekodi nende obukhalachi bwemise,

⁵ne Abalawi bandi etsielefu tsine okhwitsoomia OMWAMI nibarumikhilanga ebirumikhilo biamayoosi ketsinyembo ebiomuruchi yahaana khumulimo yikwo.

⁶Daudi yakabula Abalawi mumikanda chitaru okhulondokhana khubilibwa biabwe: Gerishoni, Kohatsi nende Merari.

⁷Gerishoni yali nende abasiani babili: Ladani nende Shimei.

⁸Ladani yali nabasiani bataru: Yehieli, Setsani nende Yoeli.

⁹Yabo nibo abali abemeli bebilibwa biolwibulo lwa Ladani. (Shimei yali nabasiani bataru: Shelomitsi, Hasieli nende Haramu).

¹⁰Shimei yali nabasiani bane. Yahatsi, Sina, Yeushi nende Beria.

¹¹Yahatsi yali owokhuranga ne Sina naba owakhabili, nebutswa Yeushi nende Beria sibaibula abasiani abenji tawe, kho babalwa singa inyumba ndala.

¹²Kohatsi yali nabasiani bane: Amuramu, Isihari, Heburoni nende Usieli.

¹³Omusiani uwe omukhulundu, Amuramu niye owali samwana Haruni nende Musa. (Haruni nende abolwibulo lulwe bali okhwahulwa khulwo khusinjil'la ebindu ebitsienukhu khulwe inziayo, okhusamba obwali khulwo okhwekayakaya OMWAMI, okhurumikhila OMWAMI nende okhulaamila abandu tsikhabi nibarumikhilanga eliira lio MWAMI.

¹⁴Nebutswa abasiani ba Musa omundu wa Nyasaye bali okhubal'lwa mu Balawi bandi).

¹⁵Musa yali nabasiani babili: Gerishoni nende Eliasa.

¹⁶Omwemeli mubolwibulo lwa Gerishoni yali Shebueli.

¹⁷Eliasa yali nomusiani mulala yenyene, Rehabia, nebutswa olwibulo lwa Rehabia lwali nabandu abenji.

¹⁸Omusiani wakhabili wa Kohatsi olangwa Isihari yali nomusiani olangwa Shelomitsi owali omwemeli wesilibwa siabwe.

¹⁹Omusiani wakhataru wa Kohatsi olangwa Heburoni yali nabasiani bane. Mbu Yeria, Amaria, Yehasieli nende Yekameamu.

²⁰Omusiani wakhane wa Kohatsi, Usieli yali nabasiani babili: Mika nende Isishia.

²¹Merari yali nabasiani babili: Mali nende Mushi. Mali yali nabasiani babili Eliasa nende Kishi,

²²nebutswa Eliasa yafwa nasili okhunyoolakhwo omwana musiani nebutswa yali nende abakhaana. Abakhaana ba Eliasa batekhela abasiani basamwana wabwe undi olangwa Kishi.

²³Omusiani wa Merari owakhabili, Mushi yali nabasiani bataru! Mahili, Ederi nende Yeremotsi.

²⁴Bano bali abolwibulo lwa Lawi mubilibwa nende tsinyumba tsiabwe, buli siamulala niyahandikwa eliira lilie. Buli mulala khubolwibulo lulwe owemihika amakhumi kabili nende okhuyombaho, yali nende esia yakholanga mumulimokwe Ehekalu yo MWAMI.

²⁵Daudi yaboola mbu, “OMWAMI Nyasaye wa Isiraeli wahaana omulembe khubandu baabe ne ye omwene yetsa okhumenya mu Yerusalemu khulwe inziayo.

²⁶Kho luno Abalawi sinabatakhwenje okhuchinga Liheema liokhubaho khwo MWAMI nende ebindu biosi ebirumikhilwanga mukhwekayakaya tawe.”

²⁷Okhulondokhana nende aka Daudi yali okhulaka, Abalawi bosi bahandiikwanga amera okhukhola emilimo olwa balinji nibool'le emihika amakhumi kabili,

²⁸ne bahebwa okhukhola emilimo chino: Okhukhonyel'la abesaalisi okhurula mulwibulo lwa Haruni omulimo kwobwekayakayi, okhuhenga omukitsi kwe Ehekalu nende ebikoti bietsinyumba halala nokhulola mbu ebindu biosi ebitsienukhu sibilikhwo esifwabwi tawe.

²⁹Khandi bakholwa okhusinjil'la omukaati okuhanwanga khu Nyasaye, obusie oburumikhilwanga khulwo khuhaana omusango, ebibisikuti ebilombelwe sila amamela, ebihanwa biosi ebisianikhiywe, nende obusie obutsokan'nemwo amafura komuseituni, khulwo okhupima nende okhuchela ebihanwa biomuhekalu.

³⁰Khandi bali nomulimo kwokhwitsoomia OMWAMI nende okhuchinguula eliira lilie buli mukamba tsuli nende mukolooba

³¹nende lwosi olwe bihanwa bio MWAMI bisambwanga khwitukhu lie sabato, mu Lisabo lio Mwesi Omuhia nende amasabo kandi kosi. Amalako kabisibwa okhumanyia mbu na Balawi banga abenyekhanga okhukhola omulimo yikwo olwene yilwo. Abalawi bahebwa omulimo kwokhwekayakaya OMWAMI tsinyinga tsiosi.

³²Bahebwa omulimo kwokhulinda Liheema liokhubaho khwo MWAMI ne Hekalu nende okhukhonyel'la abekho babwe, abesaalisi abomulwibulo lwa Haruni, mubwekayakayi bwomu Hekalu.