Read lunyore 1 AKETSINYINGA 24 Bible Online

1 AKETSINYINGA 24 - lunyore bible

1 AKETSINYINGA 24

¹Emikanda chiabasiani ba Haruni chiali singa mbu: Haruni yali nabasiani bane. Nadabu, Abihu, Eliasa nende Itsamari.

²Nadabu nende Abihu bafwa samwana nasili okhufwa, ma sibalekhakhwo abaana bosi tawe; kho abasiani babwe Eliasa nende Itsamari nibakholwa abesaalisi.

³Omuruchi Daudi yali okhubiikha abolwibulo lwa Haruni mumikanda okhulondokhana nende emilimo echia bakholanga. Sadoku, owolwibulo lwa Eliasa nende Ahimeleki owolwibulo lwa Itsamari bali okhukhonya Daudi okhubakabula.

⁴Abolwibulo lwa Eliasa bakabulwa mumikanda likhumi na chisasaba, ne abolwibulo lwa Itsamari bakabulwa mumikanda munane; yaka kali mbwo sichila khwali nabemeli bes'saatsa abenji munyumba ya Eliasa.

⁵Bali okhubaloosia mumikanda khulwo khukhupa imbulu nende abemeli bomu Hekalu nende abemeli bemioyo mutsinyumba tsiosi tsibili mubolwibulo lwa Eliasa nende abolwibulo lwa Itsamari.

⁶Abolwibulo lwa Eliasa nende abolwibulo lwa Itsamari bakhupilwanga imbulu khumatukhu kabukhan'ne. Ne omuhandichi wa Balawi Shemaya omusiani wa Netsaneli, yabahandikanga amera imbeli womuruchi, nabemeli baabe, nomwesaalisi Sadoku, nende Ahimeleki omusiani wa Abiatsari, nende abemeli bomulimo kwobwesaalisi nende abemeli wa bebilibwa bia Balawi bosi singa abakobokheli.

⁷Imbulu yakhupwa khutsinyumba amakhumi kabili natsine yabara mubulondokhani buno: Eyokhuranga yakwila Yehoyaribu ne eyakhabili nekwila Yedaya.

⁸Eyakhataru nekwila Harimu, eyakhane nekwila Sehorimu,

⁹eyakharano nekwila Malikiya, eyakhasasaba nekwila Miyamini,

¹⁰eyakhane nakhataru nekwila Hakosi, eya munane nekwila Abiya,

¹¹eya kharano nakhane nekwila Yeshwa, eye likhumi nekwila Shekania,

¹²eye likhumi nal'lala nekwila Eliashibu, eye likhumi nakhabili nekwila Yakimu,

¹³eye likhumi nakhataru nekwila Huppa, eye likhumi nakhane nekwila Yeshebeabu,

¹⁴eye likhumi nakharano nekwila Bilika, eye likhumi nakhasasaba nekwila Ima,

¹⁵eye likhumi nakhane nakhataru nekwila Hesiri, eye likhumi namunane nekwila Hapisesi,

¹⁶eye likhumi nakharano nakhane nekwila Petsahia, eya amakhumi kabili nekwila Yehesikeli,

¹⁷eya amakhumi kabili nal'lala nekwila Yakini, eya amakhumi kabili nakhabili nekwila Kamuli,

¹⁸eya makhumi kabili nakhataru nekwila Delaya, ne eya amakhumi kabili nakhane nekwila Maasia.

¹⁹Abandu yabo bali okhuhandikwa amera kabwe mubulondokhani bwokhurumikha mu Hekalu yo MWAMI okhweletana khumalako aka kuka wabwe Haruni yahandika singa MWAMI Nyasaye wa Isiraeli yali niyamulaka.

²⁰Bano nibo abemeli bandi abolwibulo lwa Lawi: Yehideya yali owolwibulo lwa Amuramu okhubir'ra mu Shebueli;

²¹Isihia, owolwibulo lwa Rehabia;

²²Yahatsi, owolwibulo lwa Isihari okhubir'ra mu Shelomitsi;

²³Yeria, Amaria, Yehasieli nende Yekameamu, abasiani ba Heburoni, okhulondokhana nemihika chiabwe;

²⁴Shamiri, owolwibulo lwa Usieli okhubir'ra mu omusiani wanga Mika;

²⁵Sakaria, owolwibulo lwa Usieli okhubir'ra mu Isihari, musiani wanga Mika;

²⁶Mahila, Mushi nende Yaasia abolwibulo lwa Merari.

²⁷Yaasia yali nabasiani bataru: Shohamu, Sakuri nende Ibiri.

²⁸Mahili yali nabasiani babili: Eliasa nende Kishi. Eliasa sialikhwo nomusiani wosi tawe.

²⁹Kishi yali nomusiani mulala owalangwa mbu Yerahimeli.

³⁰Mushi yali nabasiani bataru: Muhili, Ederi nende Yeremotsi. Yabo nibo abali abolwibulo lwa Balawi mutsinyumba tsiabakuka babwe.

³¹Omwemeli wa buli inyumba nende mulala khubasiani babwe bakhupilwangakhwo imbulu yokhwahula okhukhola omulimo, singa obwa abekho babwe, abesaalisi bolwibulo lwa Haruni bakhupilwanga. Omuruchi Daudi, Sadoku, Ahimeleki halala nabemeli betsinyumba tsiabesaalisi nende etsia Balawi bali abakobokheli.