Read lunyore 1 AKETSINYINGA 26 Bible Online

1 AKETSINYINGA 26 - lunyore bible

1 AKETSINYINGA 26

¹Buno nibwo obukabuli bwemilimo khu Balawi abarumikhanga singa abalindi be Hekalu. Okhurula musilibwa sia Kora khwali nende Meshelemaya omusiani wa Kore oweinzu ya Asafu.

²Yali nabasiani bane nabataru abahandikwa amera okhulondokhana nende emihika chiabwe: Sakaria, Yediaeli, Sebadia, Yatsinieli.

³Elamu, Yehohanani nende Eliehoenai.

⁴Yaliho khandi Obedi Edomu owa Nyasaye yalaamila tsikhabi khulwokhumuhelesia abasiani munane abahandikwa amera okhulondokhana nende emihika chiabwe: Shemaya, Yehosabadi, Yoashi, Sakari, Netsaneli,

⁵Amieli, Isakari nende Peuletsai.

⁶Omusiani wa Obedi Edomu, Shemaya yali nabasiani abali abemeli munyumba ya samwana sichila bali abandu abahela.

⁷Abasiani ba Shemaya bali Otsine, Rafaeli, Obedi nende Elisabadi. Khandi abekho babwe Elihu nende Semakia bali abandu abahela.

⁸Bosi mbwo bali abolwibulo lwa Obedi Edomu; abene yabo nende abasiani babwe nende abekho babwe bali abandu bahela khulwokhukhola omulimo yikwo. Abolwibulo lwa Obedi Edomu bosi halala bali amakhumi kasasaba nababili.

⁹Meshelemaya yali nabasiani nende abekho, abahela abandu likhumi namunane abanyala okhukhola omulimo yikwo.

¹⁰Okhurula musilibwa sia Merari yalimwo Hosa owali nabasiani bane: Shimuri, (Owa samwana yela okhuba omwemeli kata nikali siyali niye omusiani wambeli tawe),

¹¹Hilikia, Tebalia nende Sakaria. Bosi halala bali abandu likhumi nabataru abeinzu ya Hosa abalindi be Hekalu.

¹²Abalindi be Hekalu bakabulwa mumikanda mubulondokhani bwetsinyumba ne bahebwa emilimo mu Hekalu singa obwa Balawi bandi bahebwa.

¹³Buli abeinyumba, babe bati noho abenji, bakhupanga imbulu yokhwahula okhulola mbu nisilibwa sina esiabanyala okhulinda.

¹⁴Imbulu yokhulinda Esilibwa sie Ebukwe yakwila Shelemia. Ne imbulu yokhulinda Esilibwa sie Sinyolu nekwila omusiani uwe olangwanga Sakaria owali omuchetsiyi omulwenyukhu.

¹⁵Imbulu yokhulinda Esilibwa sie Enandete yakwila Obedi Edomu; ne imbulu yokhulinda inyumba yokhubiikha ebindu nekwila abasiani baabe.

¹⁶Imbulu yakwila Shupimu nende Hosa okhulinda Esilibwa Sie Masaba hasilibwa sia Shaleketsi, esili khumuhanda kwemukulu. Omulimo kwobulindi kwakabulwa mutsinyinga tsiabukhan'ne khandi etsilondananga.

¹⁷Khulubeka lwebukwe khwali nabalindi basasaba bulitukhu, esinyolu bali bane ne enandete bali bane. Abalindi bane barebwa okhulinda inyumba yokhubiikha ebindu bulitukhu, babili barebwa khubuli inyumba yokhubiikha ebindu.

¹⁸Ahembi khulubeka lwemasaba womuchitsi khwaliho nabalindi bane khumuhanda ne babili m'mukitsi mwene.

¹⁹Yibu nibwo obuloosie bwobulindi obwahebwa abesilibwa sia Kora nende abesilibwa sia Merari.

²⁰Abalawi basiabwe bandi bali okhusinjil'la libiikhilo lie Hekalu nende tsinyumba tsiokhubiikha ebihanwa ebihan'nwe khu Nyasaye.

²¹Labani mulala khubasiani ba Gerishoni, yali kukanyene emikanda chiabandu betsinyumba tsinyinji abenji nibalimwo abe inzu yomusiani uwe olangwanga Yehieli.

²²Abasiani ba Labani bandi babili bali Setsamu nende Yoeli, nabo basinjil'la libiikhilo lie Hekalu nende tsinyumba tsiokhubiikha ebihanwa.

²³Emilimo chiakabulwa khubolwibulo lwa Amuramu, Isihari, Heburoni nende Usieli.

²⁴Shebueli, owesilibwa sia Gerishoni omusiani wa Musa niye owali omwemeli wokhusinjil'la libiikhilo lie Hekalu.

²⁵Okhubir'ra m'musiani wanga Gerishoni olangwanga Eliasa, yali omwikho wa Shelomitsi. Eliasa yali samwana Rehabia owali samwana Yeshia, owali samwana Yoramu, owali samwana Sekiri, owali samwana Shelomitsi.

²⁶Shelomitsi nende abeinyumba yiye nibo abasinjil'la ebihanwa biosi ebiomuruchi Daudi, yahaananga khu Nyasaye halala nabemeli betsinyumba nende abebilibwa nende abemeli babasikari.

²⁷Babukula bilala khubindu biabayaaka mwihe ma nibabihaana birumikhilwe mu Hekalu.

²⁸Shelomitsi nende abeinzu yiye basinjil'la buli sindu siosi esiahanwa okhurumikha mu Hekalu, nibilimwo ebihanwa ebialerwa nomuroobi Samweli, nende omuruchi Saulo nende Abineri omusiani wa Neri nende Yoabu omusiani wa Seruya.

²⁹Mubolwibulo lwa Isihari, Kenani nende abasiani baabe bahebwa emilimo echili esioba we Hekalu singa abemeli nende abakhalachi bemise mu Isiraeli mwosi.

³⁰Mubolwibulo lwa Heburoni, Hashabia nende abekho baabe abahela elefu ndala netsimia tsine natsitaru, abasaatsa abeifuma indahi bahebwa okhuhenga amang'ana kosi kobwemeli bwedini nende akandi akeletanga khuburuchi bwa Isiraeli khulubeka lwemasaba wo Muchela kwa Yorodani.

³¹Yeria niye owali omwemeli wabolwibulo lwa Heburoni. Mumuhika kwamakhumi kane muburuchi bwa Daudi obuhenjelesi bwolwibulo lwa Heburoni bwakholwa ne abasikari abakufu bolwibulo yilu banyoolwa nibamenyanga Yaseri musibala sia Gileadi.

³²Omuruchi Daudi yeela abemeli betsinyumba etsielefu tsibili nende tsimia tsine natsitaru aboluyali okhurula mubekho ba Yeria ma nabahelesia omulimo kwokhusinjil'la amang'ana kobwemeli bwedini nende akoburuchi bwa Isiraeli khulubeka lwebukwe wo Muchela kwa Yorodani; esibala sia Rubeni, Gadi nende enusu yabandu ba Manase bebukwe.