Read lunyore 1 AKETSINYINGA 27 Bible Online

1 AKETSINYINGA 27 - lunyore bible

1 AKETSINYINGA 27

¹Buno nibwo obuloosie bwabemeli betsinyumba tsia Isiraeli nende abemeli bebilibwa abahenganga obukholi bwemilimo chielihanga. Buli mwesi khumuhika, omukanda kwabandu babukhan'ne okhuhela etsielefu amakhumi kabili natsine kwali khumilimo nikwemeleywe nomukali wa mahe womwesi yikwo.

²Owasinjil'la omukanda kwokhuranga, mumwesi kwokhuranga yali Yashobeamu omusiani wa Sabudieli. Omukanda yikwo kwalimwo abandu etsielefu amakhumi kabili natsine.

³Yali owolwibulo lwa Peresi khandi omukali wabasikari bomwesi kwokhuranga.

⁴Owasinjil'la omukanda kwakhabili mumwesi kwakhabili yali Dodai, owomulwibulo lwa Anohi. Mikilotsi niye owali omulondi uwe. Omukanda yikwo kwali nabandu etsielefu amakhumi kabili natsine.

⁵Omusinjil'li womukanda kwakhataru mumwesi kwakhataru yali Benaya omusiani womwesaalisi Yehoyada. Niye owali omwemeli ne abandu etsielefu amakhumi kabili natsine bali mumukanda yikwo.

⁶Huyo niye Benaya owali omukufu mubandu amakhumi kataru ne yayombakhwo amakhumi kataru yabo. Omusiani uwe Amisabadi niye owabukula obukono bubwe singa omwemeli.

⁷Omusinjil'li womukanda kwakhane mumwesi kwakhane yali Ashaeli omusiani wanga Yoabu. Omusiani uwe Sebadia yabukula obukono bubwe singa omwemeli, ne yali nabandu etsielefu amakhumi kabili natsine mukanda kulwe.

⁸Omusinjil'li womukanda kwakharano mumwesi kwakharano yali Shamuhutsi owolwibulo lwa Isihari. Yali nabandu etsielefu amakhumi kabili natsine m'mukanda kukwe.

⁹Omusinjil'li wakhasasaba mumwesi kwakhasasaba yali Ira omusiani wa Ikeshi okhurula Tekoa. Naye yali nabandu etsielefu amakhumi kabili natsine m'mukanda kukwe.

¹⁰Omusinjil'li womukanda kwakhane nakhataru mumwesi kwakhane nakhataru yali Helesi owolwibulo lwa Efuraimu okhurula Peloni. Yali nabandu etsielefu amakhumi kabili natsine m'mukanda kukwe.

¹¹Omusinjil'li womukanda kwamunane mumwesi kwa munane yali Sibekai okhurula Hushahi (yali owesilibwa sia Sera, musibala sia Yuda). Yali nabandu etsielefu amakhumi kabili natsine m'mukanda kukwe.

¹²Omusinjil'li womukanda kwakharano nakhane mumwesi kwakharano nakhane yali Abieseri okhurula musibala siolwibulo lwa Benjameni. Yali nabandu etsielefu amakhumi kabili natsine m'mukanda kukwe.

¹³Omusinjil'li womukanda kwelikhumi mumwesi kwelikhumi yali Maharai okhurula Metofa yali owesilibwa sia Sera. Yali nabandu etsielefu amakhumi kabili natsine m'mukanda kukwe.

¹⁴Omusinjil'li womukanda kwelikhumi nal'lala mumwesi kwelikhumi nal'lala yali Benaya okhurula Piratsoni musibala siolwibulo lwa Efuraimu. Yali nabandu etsielefu amakhumi kabili natsine m'mukanda kukwe.

¹⁵Omusinjil'li womukanda kwelikhumi nakhabili mumwesi kwelikhumi nakhabili yali Helidai okhurula Netofa, okhurula munyumba ya Otsinieli. Yali nabandu etsielefu amakhumi kabili natsine m'mukanda kukwe.

¹⁶Kano niko amera kabandu abaamihanga Isiraeli! Abolwibulo lwa Rubeni barukungwa nende Eliasa Omusiani wa Sikiri; Aba Simioni barukwanga nende Shefatia omusiani wa Maaka.

¹⁷Abalawi barukwanga nende Hasahabia omusiani Kemueli; Aba Haruni barukwanga nende Sadoku.

¹⁸Aba Yuda barukwanga nende Elihu omusiani wanga Daudi. Aba Isakari barukwanga nende Omuri omusiani wa Mikaeli.

¹⁹Aba Sabuloni barukwanga nende Ishimaya omusiani wa Obadia; Aba Nafutali barukwanga nende Yerimotsi omusiani wa Asieireli.

²⁰Aba Efuraimu barukwanga nende Hoshea omusiani wa Asasia. Enusu yabandu ba Manase barukwanga nende Yoeli omusiani wa Padaya, mu Gileadi.

²¹Enusu yindi yabandu ba Manase barukwanga nende Ido omusiani wa Sakaria. Aba Benjameni barukwanga nende Yaasieli omusiani wa Abineri.

²²Aba Dani barukwanga nende Asareli omusiani wa Yerohamu. Yabo nibo abali abaruchi khutsinzibulo tsia Isiraeli.

²³Daudi siyabukula amabalo kabandu abasili okhuhela emihika amakhumi kabili tawe sichila OMWAMI yali niyabasubisia yakhenjiyie abandu ba Isiraeli singa tsinyinyini tsiokhwikulu.

²⁴Yoabu owa nyina yalangwa Seluya, yachaaka okhubukula amabalo nebutswa siyamala amabalo yako tawe. Nyasaye yahaana esinyasio khu Isiraeli khulwa amabalo kene yako, ma obubali bwene yibwo sibwahandiikwa mubitapu biomuruchi Daudi tawe.

²⁵Asimawetsi omusiani wa Adieli niye owasinjil'la tsinyumba tsiokhubiikha emianduchiomuruchi. Yonatsani omusiani wa Usia niye owasinjil'la tsinyumba tsiokhubiikhwamwo ebindu etsiali esioba mumatookho, mumataala, mutsingongo nende muminaara.

²⁶Esiri omusiani wa Kelubu niye owasinjil'la abalimi bom'mukunda.

²⁷Shimei okhurula Rama niye owasinjil'la emikunda chiemisabibu. Sabudi okhurula Shefamu niye owasinjil'la emisabibu khulwokhulomba ewaini.

²⁸Baali Hanani okhurula Kederi niye owasinjil'la emisaala chiomuseituni nende echiemikhuyu echiali elubeka lwemasaba lwebikulu. Yoashi niye owasinjil'la okhuhanwa khwamafura komuseituni.

²⁹Shiturai okhurula Saharoni niye owasinjil'la tsing'ombe etsiayanga musipaapi sia Sharoni. Shafati omusiani wa Adilai niye owasinjil'la tsing'ombe etsiali mumabanda.

³⁰Obili okhurula Eshimaeli niye owahenga tsing'amia. Yehideya okhurula Meronotsi niye owasinjil'la etsipunda.

³¹Yasisi Omuhakiri niye owasinjil'la esiayo siamakondi nende tsimbusi. Yaba bosi nibo abasinjil'la emianduchiomuruchi Daudi.

³²Yonatsani samwana Daudi undi yali omuchetsiyi omulwenyukhu khandi owasoma. Ye nende Yahieli omusiani wa Hakimoni nibo abasinjil'la obusomi bwabaana bomuruchi.

³³Ahitsofeli yali omuchetsiyi womuruchi. Hushai, okhurula Ariki yali omulina womuruchi khandi omuchetsiyi uwe.

³⁴Olwa Ahitsofeli yali nafwiye, Abiatsari nende Yehoyada omusiani wa Benaya nibo abamala nibaba abachetsiyi bomuruchi, ne Yoabu naba etswoni osinjiliye amahe kosi.