Read lunyore 1 AKETSINYINGA 28 Bible Online

1 AKETSINYINGA 28 - lunyore bible

1 AKETSINYINGA 28

¹Daudi yalaka abemeli ba Isiraeli bosi okhwebunjikha halala mu Yerusalemu. Kho abemeli bosi betsinzibulo, halala nabemeli bosi abahenganga emilimo chielihanga, nabemeli bebilibwa, nabasinjil'li bemiandu nende emiruko chiomuruchi halala nabasiani baabe, okhusila muno, abemeli bosi behango homuruchi nende abasikari bosi bebunjikha Yerusalemu.

²Daudi yasinjila imbeli wabwe ma nababool'la amang'ana kano: “Abawefwe nende abandu bomusibala sianje, huyie akamboola. Ndenya okhwombokhela Lisanduku lie Indakano inyumba indinyu omwa Nyasaye wefwe amenyanga. Ndarechekha ebindu biokhwombokha Ehekalu khulwo okhuhelesia OMWAMI oluyali,

³nebutswa yangaya okhwombokha sichila ndi omusikari khandi ndaratsia amatsahi amenji.

⁴OMWAMI Nyasaye wa Isiraeli yanzela ise nende abolwibulo lwanje okhuruka Isiraeli khulwe inziayo. Yeela olwibulo lwa Yuda okhuhaana abemeli ne okhurula mubolwibulo yilwo, yeela inyumba ya papa wanje. Mubomunyumba mwa papa wanje bosi yali okhuyanzisibwa okhumbukula ise ma niyanyemekha okhuba omuruchi khu Isiraeli yosi.

⁵Yambelesia abasiani abenji ne mubene yabo bosi yeela Solomoni okhuruka Isiraeli, lihanga lio MWAMI.

⁶“OMWAMI yambool'la mbu ‘Omusiani uwo Solomoni niye owakhombokhe Ehekalu yanje. Ndamala okhumwela okhuba omusiani wanje, ne nase ndakhabe papa uwe.

⁷Ndakharalisie oburuchibwe okhuhindila inziayo nikakhaba yakhatsilil'la okhulonda amalako kanje kosi bulahi singa obwakholanga luno!’

⁸“Kho luno, abandu banje, imbeli wa Nyasaye wefwe nende omukanda kwa Isiraeli kwosi okuli abandu ba Nyasaye, mulakanga mulonde buli siesindu esio MWAMI Nyasaye wefwe yakhulaka okhukhola, kho mube abanyala okhutsilil'la okhumenya musibala esilahi yisi khandi mube abanyala okhusihaana khutsinzibulo etsitsanga khulwe inziayo.”

⁹Ma Daudi nabool'la Solomoni mbu, “Omusiani wanje, khulakanga ohuchil'le Nyasaye wa papa uwo ma omurumikhile nomwoyo kukwo kwosi nende amapaalo kaako kosi. Nyasaye wamanya tsinganakani tsiefwe halala nende obunaayi bwefwe. Ibe niwakhatsia khuye alakhuhuchil'la, nebutswa niwakharula khuye, alakhwanzukhila khulwe inziayo.

¹⁰Ibe witsul'le mbu OMWAMI wakhwahula mbu omwombokhele Ehekalu yiye inzienukhu. Luno otsiombokhe — ne okhole mbwo nesinani.”

¹¹Kho Daudi yahelesia omusiani uwe Solomoni olupapulo olwang'olwakhwo obwe Ehekalu yenyekhanga efwane, obwebikoti biokhubiikhamwo emiandu, nende obwebikoti bindi biosi halala nende esikoti sia Habundu Hatsienukhu Okhusila ahe tsimbi tsilekhelwanga bienyekhanga bilombwe.

¹²Kata khandi yamubool'la akandi kosi akali munganakani yiye singa akomuchitsi nende tsinyumba tsiokhubotokhana omuchitsi nende ebikoti biokhubiikhamwo ebindu ebirumikhanga mu Hekalu nende ebihanwa ebihanwanga khu MWAMI.

¹³Daudi yamuhelesia obuloosie bwoburumikhi bwabesaalisi nende Abalawi okhukhola emilimo mu Hekalu nende obwokhulinda ebindu ebirumikhanga mu Hekalu.

¹⁴Khandi yamubool'la obusiro bwefetsa nende obwetsahabu eyenyekhanga erumikhe okhulomba ebindu ebirumikhanga mu Hekalu,

¹⁵nende obusiro bwokhulomba buli etaya nende esihani sietsitaya,

¹⁶khulwe emesa yetsahabu nende buli emesa yefetsa okhwemikaati echihanwanga khu MWAMI Nyasaye.

¹⁷Khandi yahaana amebaalo khu kobusiro bwetsahabu isiyikhu eyenyekhanga elombelwe etsihuma, etsisahani, nende etsichupa, obusiro bwefetsa nende etsahabu bwokhulombwakhwo etsibakuli

¹⁸nende obusiro bwetsahabu yokhulombwakhwo olusambwa lwokhusambila khwobwali nende obusiro bwokhurumikhila okhulomba likaari liebilonje bietsimbaha etsiafunikhanga Lisanduku lie Indakano.

¹⁹Daudi yaboola mbu, “Yaka kosi kali mubuloosie obwahandikwa okhulondokhana nende ako MWAMI mwene yalaka mbu ngakhole.”

²⁰Daudi yabool'la omusiani uwe Solomoni mbu, “Okhulumame ma obe nesinani. Ochiake omulimo ne orakhahuchil'la omundu okhukhwikal'la tawe. OMWAMI Nyasaye owe ise rumikhilanga nabe n'nawe. Sinakhulekhe tawe okhwola olwa nobe nomal'le okhukhola emilimo chiokhutiya khu Hekalu.

²¹Abesaalisi nende Abalawi bamal'le okhukabul'lwa emilimo chiokhukhola mu Hekalu. Abakholi bemilimo chiobusitsa etsiabukhan'ne berechekhele okhukhukhonya ne abandu bosi halala nabemeli babwe bali hasi hoburuchi bubwo.”