Read lunyore 1 AKETSINYINGA 29 Bible Online

1 AKETSINYINGA 29 - lunyore bible

1 AKETSINYINGA 29

¹Daudi yabool'la abomukanda bosi mbu, “Omusiani wanje Solomoni niye owa Nyasaye yel'le, nebutswa asili omubuukha ne sialikhwo nende akamanyile tawe. Emilimo chiokhukholwa nemikhongo sichila ino sieli inyumba yabaruchi tawe, nebutswa ne Hekalu yo MWAMI Nyasaye.

²Ise ndaateema akanyala okhurechekha ebindu biokhurumikhila okhwombokha Ehekalu. Nabio biali etsahabu, efetsa, emikasa, ebichuma, emisaala, amachina kobukusi, amachina amang'inang'inu, amachina ketsirangi tsiabukhan'ne nende amachina kamarimari amenji.

³Ne okhumeeta khu yibi biosi ebiandahaana, mal'le okhuhaana etsahabu nende efetsa okhurula khumiandu chianje omwene khulwo obuyanzi obwandi n'nabwo khu Hekalu ya Nyasaye.

⁴Mal'le okhuhaana etsahabu isiyikhu eyombele etsitani emia ndala nende efetsa isiyikhu ehela ahembi etsitani etsimia tsibili namakhumi kane khulwo okhung'onia amasisi ke Ehekalu,

⁵nende ebindu biosi ebiabasitsa bamakhono balomba. Luno niwina oundi owenyanga okhumuhaanila OMWAMI namakhono masiro?”

⁶Kho nilwo olwabemeli bebilibwa, nabemeli betsinzibulo tsiosi abakhongo babasikari, abasinjil'li bemiandu chiomuruchi behaana okhuhaana

⁷ebilondakhwo bino khulwomulimo kwokhombokha Ehekalu: etsitani emia ndala namakhumi kane nakataru etsietsahabu, etsitani tsimia tsitaru namakhumi kane etsiefetsa, etsitani tsimia tsisasaba namakhumi kabili tsiomukasa nende etsitani etsielefu tsitaru netsimia tsine etsiebichuma.

⁸Yabo abali namachina kobukusi obutinyu bakahaana mwibiikhilo lie Hekalu, elialindwanga nende Yeyieli owesilibwa sia Abalawi sia Gerishoni.

⁹Abandu bali okhwehaana abene okhuhaan'na OMWAMI, ne bali nobusangali sichila ebindu ebinji biahanwa. Omuruchi Daudi khandi yali nobusangali obukali.

¹⁰Habwene yaho imbeli womukanda kwosi, omuruchi Daudi yetsoomia OMWAMI. Yaboola mbu, “OMWAMI Nyasaye wakuka wefwe Yakobo, witsoomibwe khulwe inziayo!

¹¹E OMWAMI, obukhongo nobubwo, obunyali nende oluyali, nende obulechi nobwami nebibio, sichila ebindu biosi ebili mwikulu nende khusibala nebibio, ne ibe oli omuruchi oyombele bosi, orukanga ebindu biosi.

¹²Obuhinda nende emiandu birulanga khuibe; orukanga buli esindu siosi mutsingufu tsitsio nende mubunyali bubwo, ma oli onyala okhukhola omundu wosi okhuba omukhongo khandi owetsingufu.

¹³Luno, Nyasaye wefwe, khukhupilanga embwo nikhwitsoomia eliira lilio liobukhongo.

¹⁴“Nikarali abandu banje nende ise mwene sikhuli abanyala okhukhuhelesia esindu tawe, sichila buli sindu nesihanwa okhurula khuibe, nebutswa ifwe khukhukalusiye ebili ebibio.

¹⁵Ibe umanyile E OMWAMI mbu ifwe khuli singa abaatisibwa khandi abacheni musibala singa obwa bakuka befwe balinji. Amatukhu kefwe musibala kabiranga singa esiniini, ne sikhunyala okhubula okhufwa tawe.

¹⁶E OMWAMI Nyasaye wefwe, khuler're halala emiandu yichi chiosi khulwokhwombokha Ehekalu eyokhuhaana oluyali khuliira lilio lietsienukhu, nebutswa birul'le khuibe khandi biosi nebindu bibio.

¹⁷Ndamanya oteemanga omwoyo kwa buli mundu ne osangasibwanga nende abandu besilongole. Mubwatooto nende mubusubilwa ndali okhwehaana okhuhaana yibi biosi khuibe khandi nduutsi singa obwabandu abebunjikhile hano yaba, bali nobusangali okhuleera ebihanwa khuibe.

¹⁸OMWAMI Nyasaye wa bakuka befwe Aburahamu, Isaka nende Yakobo, biikha obwehani yibu mumioyo chiabandu baabo khulwe inziayo, ma okhole abandu okhuba abasubilwa khuibe khulwe inziayo.

¹⁹Ohelesie omusiani wanje Solomoni omwoyo kwobwekombi okhukhola buli esindu siosi esiomulaka okhukhola nende khulwokhwombokha Ehekalu eya ndarechekha ebindu biosi.”

²⁰Ma Daudi nalaka omukanda kwosi mbu, “Mumwitsoomie OMWAMI Nyasaye wenywe!” Ne omukanda kwosi nikwitsoomia OMWAMI Nyasaye wabakuka babwe ma nibenama hasi khulwo khuhaana oluyali khu MWAMI khandi khumuruchi.

²¹Litukhu elialondakhwo bakhol'la OMWAMI emisango ma nibamuhan'na emisango emisambe. Nachio chiali etsichulukhi elefu ndala, amamiku elefu ndala nende ebimeme biamakondi ebikhole elefu ndala halala nebihanwa biewaini nende ebihanwa bindi ebinji ebiahebwa Abaisiraeli bosi.

²²Kho litukhu yilio abandu bali nobusangali olwa bali nibalitsanga nende okhunywa imbeli wo MWAMI. Yilu lwali olwakhabili khu Baisiraeli okhwikhasia Solomoni khundebe yoburuchi. Bamutsukhil'lakhwo amafura imbeli wo MWAMI khulwo okhumukhola omuruchi ne Sadoku niyemekhwa okhuba omwesaalisi.

²³Kho Solomoni yekhala khundebe yoburuchi eyo MWAMI yali okhuchiakia musilenje sia papa uwe Daudi. Yametekha mubuhinda ne Abaisiraeli bosi nibalonda amalako kaake.

²⁴Abemeli bosi nende abasikari kata nende abasiani ba Daudi bandi bosi besuha okhuba hasi hoburuchi bwa Solomoni.

²⁵OMWAMI yakhola Solomoni okhuba omukhongo mutsimoni tsiabandu ba Isiraeli bosi ma namukhola okhuba owoluyali okhuyomba omuruchi wosi owamihakhwo musibala sia Isiraeli.

²⁶Daudi omusiani wa Yese yamiha khu Isiraeli yosi

²⁷khulwemihika amakhumi kane. Yamiha emihika tsine natsitaru nali Heburoni ne emihika amakhumi kataru natsitaru nali Yerusalemu.

²⁸Yafwa nali nemihika eminji, omuhinda khandi omundu woluyali, ma omusiani uwe Solomoni nabukula indebe yiye yoburuchi.

²⁹Amang'ana kosi akomuruchi Daudi yakhola okhurula mukhuchaaka, okhwola mukhumal'likha kahandiikwa mubitapu bitaru ebiabaroobi bano: Samweli, Natsani nende Gadi.

³⁰Akahandikwa mubitapu yibio kamanyianga singa obwa yarukanga, singa obwa yali owetsingufu khandi nende yako kosi akekholekha khuye, khu Isiraeli nende khumahanga akali ahembi na Isiraeli.