Read lunyore 1 AKETSINYINGA 4 Bible Online

1 AKETSINYINGA 4 - lunyore bible

1 AKETSINYINGA 4

¹Bano nibalala khubolwibulo lwa Yuda: Peresi, Hesironi Karimi, Huri nende Shobali.

²Shobali yali samwana Reaya ne Reaya yebula Yahatsi owali samwana Ahumai nende Lahadi. Abene yaba bali abebilibwa bia Sora.

³Bano nibo abasiani ba Etamu: Yesereli, Ishima, nende Idibashi halala nomukhaana wabwe owalangwa Haseleliponi.

⁴Penueli yali samwana Kedori, ne Eseri naye naba samwana Husha. Yabo bali abasiani ba Huri owali omusiani wa Efuratsi omukhulundu. Nibo abachiakia litookho lia Betselehemu.

⁵Ashuru, owachaakia litaala lia Tekoa, yali nabakhasi babili, Hela nende Naara.

⁶Ashuru nende Naara bebula abasiani bane: Ahusamu, Heferi, Temeni nende Haahashitari.

⁷Ashuru nende Hela bebula abasiani bataru: Seretsi, Isihari nende Etsinani.

⁸Kosi yali samwana Anubi nende Sobeba, khandi nibo abakuka nyene abaana ba Ahariheli Omusiani wa Haramu.

⁹Yaliho omundu walangwa Yabesi owali niyahebwa oluyali okhuyomba abeinzu yabwe bosi. Nyina yali okhumukulikha eliira Yabesi[1] sichila olwa yamwibula yatsunwa okhusila.

¹⁰Nebutswa Yabesi yasaaya khu Nyasaye wa Isiraeli, naboola mbu, “Umbelesie tsikhabi Nyasaye, ma umbelesie liloba likali. Obe halala n'nase ma unzikal'le khumang'ana kosi amabi akanyala khunder'ra linyakhano.” Ne Nyasaye yamuhelesia kosi akayareeba.

¹¹Kalebu, amwabo Shuha, yali nomusiani owalangwa Mehiri. Mehiri yali samwana Eshitoni,

¹²owali nabasiani bataru. Nabo bali Betsirafa, Pasea nende Tehina. Tehina niye owachaakia litookho lia Nahashi. Abolwibulo lwabandu yaba bamenyanga habundu halangwa Raka.

¹³Kenasi yebula abasiani babili: Otsinieli nende Seraya. Otsinieli naye khandi yali nabasiani babili: Hatsatsi nende Meonotsai.

¹⁴Meonotsai yali samwana Ofura. Seraya yali samwana Yoabu owachaakia Libona liabandu Ababaatsi, ahabandu bosi abasitsa bali.

¹⁵Kalebu omusiani wa Yefune yebula abasiani bataru: Iru, Ela nende Naamu. Ne Ela yali samwana Kenasi.

¹⁶Yahaleleli yebula abasiani bane: Sifu, Sifa, Tiria nende Asareli.

¹⁷Abasiani ba Esira bali Yetseri, Meredi, Eferi nende Yaloni. Meredi yateesia Bitsia omukhaana womuruchi we Misiri, ne yebula n'naye Miriamu nende abasiani babili Shamai nende Ishiba. Ishiba niye owachaaka litaala lia Eshitemoa.

¹⁸Meredi yateesia omukhasi okhurula mulwibulo lwa Yuda ma nibebula abasiani bataru, Yeredi owachaakia litaala lia Kedori; Heberi, owachaakia litaala lia Soko; nende Yekutsieli owachaakia litaala lia Sanoa.

¹⁹Hodia yateesia mbotsonyene Nahamu. Abolwibulo lulwe nibo abachiakia esilibwa sia Karimu, abamenyanga mwitookho lia Keila, khandi nende esilibwa sia Maakatsi, abamenyanga mwitaala lia Eshitemoa.

²⁰Shimoni yebula abasiani bane: Amoni, Rina, Benihanamu nende Tiloni. Ishi yebula abasiani babili: Sohetsi nende Benisohetsi.

²¹Shela yali mulala khubasiani ba Yuda. Olwibulo lulwe lwalimwo bano: Eri, owachaakia litaala lia Leka; Laada, owachaakia litaala lia Maresha; abesilibwa siobunabi bwetsingubo tsiekatani, abamenyanga mwitaala lia Betsi Ashibea;

²²Yokimu nende abandu abamenya mwitaala lia Koseba; nende Yoashi nende Sarafu abateesia abakhaana okhurula Moabu, ma nibetsa okhumenya Betselehemu. (Amang'ana kabolwa kano namakhulu nabutselele.)

²³Bali abalongi betsindabu nibarumikhilanga omuruchi ne nibamenya mwitaala lia Netaimu nende Kedera.

²⁴Simioni yebula abasiani barano: Nemueli, Yamini, Yaribu, Sera nende Shauli.

²⁵Omusiani wa Shauli yalangwa Shalumu, ne omwitsukhulu uwe sialangwa Mibisamu ne es'soni sisie yalangwa Mishima.

²⁶Ne okhuchiakila khu Mishima obulondokhani bwobwibulani bwabwe bwali okhubir'ra mu Hamueli, Sakuri nende Shimei.

²⁷Shimei yali nabasiani basasaba nende abakhaana basasaba, ne abeinyumba yiye sibaibula abaana abenji tawe, kho olwibulo lwa Simioni silwabambukha singa olwibulo lwa Yuda tawe.

²⁸Okhwola mumatukhu komuruchi Daudi yali niyamihanga, abolwibulo lwa Simioni bamenyanga mumataala kano: Berisheba, Molada, Hasarishua,

²⁹Biliha, Esemu, Toladi,

³⁰Betsueli, Horima, Sikilaki,

³¹Betsi Marikabotsi, Hasarisusimu, Betsibiri, nende Shaaraimu.

³²Khandi bamenya mumataala kandi akahela karano. Nako ngakano, Etamu, Ainu, Rimoni, Tokeni nende Ashani,

³³halala namataala akali ahembi n'nako okhustsia okhwola khwitaala lia Baalatsi elili hakari wenandete nende emasaba. Kano namang'ana akababiikha mubuhandike khuketsinzibulo tsiabwe nende ahabamenyanga.

³⁴Abandu balondakhwo bano nibo abali abemeli bebilibwa biabwe: mbu Meshobabu, Yamuleki, Yosha omusiani wa Amasia, Yoeli.

³⁵Yehu (omusiani wa Yoshibia, Omwitsukhulu wa Seraya, es'soni sia Asieli),

³⁶Elioenai, Yakoba, Yeshohayia, Asaya Adieli, Yesimieli,

³⁷Benaya Sisa (omusiani wa Shifi, omwitsukhulu wa Aloni, es'soni sia Yedaya, owali omusiani wa Shimuri owolwibulo lwa Shemaya.)

³⁸Abandu bamera kabwe kakharalwa yabo nibo abali abemeli bebilibwa biabwe ne abandu bolwibulo lwabwe bali okhumeetekha okhusila.

³⁹Kho babukula liloba elubeka lwemasaba okhwola habundu halangwa Kedori, ne nibaaya amakondi kabwe mwibanda elili ebukwe welitaala elia bamenyangamwo.

⁴⁰Banyoola obwayilo bweliloba lilahi ebwene yiyo musibala siobweyangu, esiralimwo liyoka khandi esiomulembe. Abandu abamenyanga musibala yisio olwokhuranga bali abolwibulo lwa Hamu.

⁴¹Mumatukhu komuruchi Hesekia wa Yuda, abandu bamera kabwe kahandiikilwe hekulu yabo batsia Kedori ma nibasambula amaheema nende tsinyumba tsiabandu abali nibamenya musibala yimwo. Bakhungania abandu abamenyangamwo ma nibabukula esibala tsana okhuba esiabwe likali sichila obweyangu bwobwayilo bwamakondi bwali obukali.

⁴²Abandu bandi etsimia tsirano abolwibulo lwa Simioni batsia elubeka lwebukwe wa Edomu. Bemel'lwa nende abasiani ba Ishi bano: Pelatia, Nearia, Refaya nende Usieli.

⁴³Ebwene yiyo beera Abaamaleki abali nibasikala, ma bamenyanga musibala yisio okhurula olwene yilwo.