Read lunyore 1 AKETSINYINGA 9 Bible Online

1 AKETSINYINGA 9 - lunyore bible

1 AKETSINYINGA 9

¹Abandu bosi ba Isiraeli bali okhuhandikwa amera okhulondokhana netsinyumba tsiabwe ne amera yako kahandiikwa musitapu sia Abaruchi ba Isiraeli. Abandu ba Yuda bali nibatisibwa okhutsia Babulonia singa esinyasio khutsimbi tsiabwe.

²Abokhuranga okhukalukha okhumenya mumikunda chiabwe nende mumatookho kabwe, balimwo Abaisiraeli halala nabesaalisi, Abalawi, nende abakholi bo Muhekalu.

³Abandu okhurula mutsinzibulo tsia Yuda, Benjameni, Efuraimu nende Manase batsia okhumenya Yerusalemu.

⁴Abolwibulolwomusiani wa Yuda Olangwa Peresi bali nomwemeli wabwe owalangwa Utsai, omusiani wa Amihudi omwitsukhulu wa Omuri. Abandu be inyumba yiye bandi bali Imuri nende Bani.

⁵Abolwibulolwomusiani wa Yuda undi ulangwa Shilo bali nomwemeli wabwe olangwanga Asaya, owali omwemeli weinyumba yabwe.

⁶Abolwibulolwomusiani wa Yuda undi olangwanga Sera bali nomwemeli wabwe olangwa Yeweli.

⁷Abandu bolwibulo lwa Yuda bosi halala bali tsimia tsisasaba namakhumi tisa. Nabo bali: Salu Omusiani wa Meshulamu, owali omusiani wa Hodawia, ne Hodowia yali omusiani wa Hasenua.

⁸Ibineya omusiani wa Yerohamu; Ela omusiani wa Usi, nende omwitsukhulu wa Mikiri. Meshulamu omusiani wa Shefatia owali omusiani wa Reueli, omusiani wa Ibiniya.

⁹Khwali nabandu etsimia tsirano natsine na makhumi karano nabasasaba abolwibulo lwa Benjameni abamenyanga Yerusalemu. Abandu bamera kabwe karal'lwe hekulu yabo bali abemeli betsinyumba tsiabwe.

¹⁰Abesaalisi bali: Yedaya, Yehoyaribu, Yakini.

¹¹Halala nende Asaria omusiani wa Hilikia, omusiani wa Meshulamu, owali omusiani wa Sadoku, owali omusiani wa Merayotsi, owali omusiani wa Ahitubu, owali omusinjil'li we Hekalu ya Nyasaye.

¹²Adaya omusiani wa Yerohamu, owali omusiani wa Pashuri, owali omusiani wa Malikiya nende Maasai omusiani wa Adieli, owali omusiani wa Yahisera, owali omusiani wa Meshulamu, owali omusiani wa Meshilemitsi, owali omusiani wa Imeri.

¹³Abesaalisi abali abemeli betsinyumba tsiabwe bosi halala bali elefu ndala tsimia tsine natsitaru namakhumi kasasaba. Bali abandu abanyala khukhola emilimo chiabwe, nibo abasinjil'la emilimo chiobutiyi mu Hekalu ya Nyasaye.

¹⁴Abalawi abamenyanga Yerusalemu bali Shemaya omusiani wa Hashubu, owa balala khubakuka baabe bali Asirikamu nende Hashabia abesilibwa sia Merari. Bakibakari, Hereshi nende Galali.

¹⁵Abalawi bandi bali Bakibakari, Hereshi, Galali, nende Matania omusiani wa Mika owabakuka baabe bali Sikiri nende Asafu.

¹⁶Halala nende Obadia omusiani wa Shemaya, owabakuka baabe balala bali Galali nende Yedutsuni. Ma nende Berekia omusiani wa Asa Omwitsukhulu wa Elikana abamenyanga mwitaala lia Netofa.

¹⁷Abalondakhwo bano nabalindi be Hekalu abamenyanga Yerusalemu: Shalumu, Akubu, Talimoni, nende Ahimani. Shalumu niye owali omwemeli wabwe.

¹⁸Okhwola mumatukhu yako abandu bebilibwa yibio bali nibarebwa habwinjil'lo bwesilibwa siomuruchi esili elubeka webukwe. Hambelikhwo balindanga ebilibwa binjilanga mukambi ya Balawi.

¹⁹Shalumu, omusiani wa Kore ma omwitsukhulu wa Ebisafu, halala nabasiani babwe bolwibulo lwa Kora nibo abareebwa okhulindi esilibwa sie Liheema liokhubaho khwo MWAMI, singa obwabakuka babwe balinji abalindi be Liheema lio MWAMI.

²⁰Fenihasi omusiani wa Eliasa niye owalinji omusinjil'li wabwe ne OMWAMI yalinji n'naye.

²¹Sakaria omusiani wa Meshelemaya yalikhwo omulindi habwinjil'lo bwe Liheema liokhubaho khwo MWAMI.

²²Bosi halala bali abasaatsa etsimia tsibili nende likhumi nababili abelwa okhulinda obwinjil'lo nende ebilibwa. Bali okhuhandikwa amera okhulondokhana nende amataala kabamenyangamwo. Omuruchi Daudi nende omuroobi Samweli NIBO abali Okhura abakuka babwe mumilimo chiobusubiliwa yitsi.

²³Bo nende abetsinzibulo tsiabwe batsilil'la okhulinda ebilibwa bie Ehekalu.

²⁴Khwali nesilibwa khu buli lubeka lwe LiheEma, mbu: esinyolu, enandete, ebukwe nende emasaba ne buli silibwa siali nomulindi osinjiliye abandi.

²⁵Abalindi yaba bakhonyel'lwanga nende abekho babwe abali nibamenya mumataala kabwe ne bongulananga khulwo khukhola obulindi yibwo inyuma wamatukhu kane nakataru.

²⁶Abalindi bane abakhongo bali abolwibulo lwa Balawi ne nibo abali nomulimo kwokhuhenga amang'ana kosi akobulindi. Khandi nibo abali nomulimo kwokhulinda ebikoti bio Muhekalu nende emianduchiosi chio Muhekalu.

²⁷Bamenyanga ahembi nende Ehekalu sichila kwali omulimo kwabwe okhulinda Ehekalu nende okhwikula ebilibwa buli mukamba tsuli.

²⁸Abalawi bandi bahenga ebindu ebiarumikhilwanga mubwekayakayi. Babihananga okhutsia esioba khandi babibukulanga okhubiikha olwa bikalukha.

²⁹Abandi bahenganga ebindu ebitsienukhu bio Muhekalu, nende obusie, ewaini, amafura komuseituni, obwali, nende obusakisaki.

³⁰Nebutswa omulimo kwokhutsokania obusakisaki kwali okwa abesaalisi bonyene.

³¹Omulawi owalangwa Matitsia, omusiani wa Shalumu owokhuranga owesilibwa sia Kora niye owakholanga omulimo kwokhutekha ekeki eyahanwanga khu MWAMI.

³²Abesilibwa sia Kohatsi nibo abatekhanga omukaati omutsienukhu kwo Muhekalu buli litukhu lie Sabato.

³³Abalawi bandi basinjil'langa omulimo kwetsinyembo mu Hekalu. Abemeli betsinyumba yitsi bamenyanga mutsinyumba tsindi tsie Hekalu ne sibakholangakhwo omulimo kundi tawe, sichila balinji abokhulangwa khumilimo om'basu nende obutukhu.

³⁴Abandu bamera kabwe karal'lwe hekulu yabo bali abemeli mutsinyumba tsia Abalawi, singa obwobwibulani bwa abakuka babwe bwali. Bali abemeli abamenyanga Yerusalemu.

³⁵Yeyieli, yachaakia litookho lia Gibeoni ma namenyamwo. Omukhasiwe yalangwanga Maaka.

³⁶Omusianiwe omukhulundu yalangwanga Abudoni ne abasiani baabe bandi bali; Suri, Kishi, Baali, Neri, Nadabu,

³⁷Gedori, Ahio, Sakaria nende Mikilotsi

³⁸owali samwana Shimea. Abakuka babwe bamenyanga mu Yerusalemu ahembi nende abetsinyumba tsindi tsiesilibwa siabwe.

³⁹Neri yali samwana Kishi ne Kishi naba samwana Saulo. Saulo yali nabasiani bane: Yonatsani, Malikishua, Abinadabu, nende Eshibaali.

⁴⁰Yonatsani yali samwana Meribubaali, owali samwana Mika.

⁴¹Mika yali nabasiani bane: Pitsoni, Meleki, Tarea nende Ahasi.

⁴²Ahasi yali samwana Yera, naye niyebula abasiani bataru: Alemetsi, Asimawetsi, nende Simiri. Simiri yali samwana Mosa,

⁴³owali samwana Binea, owali samwana Refaya, owali samwana Eleasa, owali samwana Aseli.

⁴⁴Aseli yali nabasiani basasaba: Asirikamu, Bokeru, Eshimaeli, Shearia, Obadia nende Hanani.