Read lunyore 2 AKETSINYINGA 1 Bible Online

2 AKETSINYINGA 1 - lunyore bible

2 AKETSINYINGA 1

¹Solomoni omusiani wa Daudi yaralila mu bwami bubwe khu Isiraeli, ne OMWAMI Nyasayewe namulaamila ikhabi ma namukhola owetsingufu okhusila.

²Omuruchi Solomoni yalaka abemeli bosi abasinjiliye abasikari elefu ndala nende abasinjiliye abasikari emia ndala, halala nabakhongo bosi abali mu Isiraeli, nabemeli bebilibwa nende abandu bandi bosi,

³mbu batsie n'naye habundu hokhwekayakayila ahali Gibeoni. Batsiayo sichila niho ahe liheema liokhubahokhwo MWAMI liali niliareebwa, elia Musa omurumikhili wo MWAMI yali niyalomba olwa yali musitsiimi. (

⁴Nebutswa Daudi yali niyahinia Lisanduku lie Indakano okhurula Kiriatsi Yearimu niyalihila Yerusalemu ma niyalira mwiheema elia yali niyaliombokhela.)

⁵Khandi olusambwa lwomukasa olwa Besaleli omusiani wa Uri owali omwitsukhulu wa Huri yali niyalomba lwali Gibeoni imbeli we Liheema liokhubaho khwo MWAMI. Omuruchi Solomoni halala nabandu bosi bekayakayila OMWAMI ebwene iyio.

⁶Nali imbeli we Liheema, omuruchi yekayakaya OMWAMI khulwokhuhaana emisango khulusambwa lwomukasa. Yali nende emiruko elefu ndala etsiali okhwirwa ma nichisambilwa khulusambwa nichili emichima.

⁷Obutukhu yibwo Nyasaye yabisukha khu Solomoni ma namureeba mbu, “Nisina esia wakhenya khuhelesia?”

⁸Solomoni nakalusia naboola, “Buli lwosi wamanyisienge obuyanzi ubukali khu papa wanje Daudi, ma luno umbuchiliye okhuba omuruchi musilenje sisie.

⁹Kho E OMWAMI Nyasaye, hesia lisubisio eliawasubisia papa wanje. Ibe unyemekhele okhwamiha abandu abenji okhusila abaranyala okhubalwa,

¹⁰Khulwe yako umbelesie obuchesi nende obumanyi obwa ngwananga okhuba n'nabwo khulwo khwamiha abandu yaba. Nikarali mbwo, ise ndakhanyala mbwena okhwamiha abandu baabo abenji yaba?”

¹¹OMWAMI nakalusia Solomoni namubool'la, “Wahuye ling'ana lilahi. Musilenje esia wakharebele emiandu kata obuhinda kata ifuma, kata okhwirwa khwabasuku baabo nohomba kata okhumeetwa amatukhu khubulamu bubwo, ibe urebele obuchesi nende obumanyi kho obe onyala okhwamiha abandu banje, aba ndali okhukhwemekha mbu obe omuruchi wabwe.

¹²Nzia okhukhuhelesia obuchesi nende obumanyilisi. Khandi okhumeetakhwo, nzia okhukhuhelesia emiandu eminji nende obuhinda, nende ifuma eyombele eyomuruchi undi wosi yalikhwo n'nayo nohomba yakhabekhwo n'nayo.”

¹³Kho omuruchi Solomoni yarula[1] habundu hokhwekayakayila mu Gibeoni, ahe liheema likhubaho khwo MWAMI liali ma nakalukha Yerusalemu. Ebwene iyio niho ahayamihila Isiraeli.

¹⁴Solomoni yabunjikha halala amakaari kelihe nende etsisululi. Yali namakaari elefu ndala nende tsimia tsine, halala netsisululi tsielihe etsielefu likhumi natsibili etsia yara mu Yerusalemu ne akandi kosi nakara mumatookho lukano lukano.

¹⁵Mumatukhu koburuchibwe, etsahabu nende efetsa biali ebing'ayu singa amachina mu Yerusalemu ne emisiita chiali eminji okhusila singa emikhuyu chiomubulimo.

¹⁶Abandu bokhuhoonia ebindu biomuruchi nibo abakulanga etsisululi etsiarulanga Emusiri nende Kilikia.

¹⁷Khandi okhukula amakaari okhurula Emisiri. Bahelesianga abaruchi ba Bahiti nende aba Basiria etsisululi nende amakaari kelihe, ne bakusianga buli likaari ebitonye biefetsa tsimia tsisasaba ne buli esululi, bakusianga ebitonye biefetsa emia ndala namakhumi karano.