Read lunyore 2 AKETSINYINGA 10 Bible Online

2 AKETSINYINGA 10 - lunyore bible

2 AKETSINYINGA 10

¹Rehoboamu yatsia Shekemu, ahabandu bosi ba Isiraeli eyesinyolu bali nibebunjikhile mbu akholwe omuruchi.

²Olwa Yeroboamu omusiani wa Nebati, owali niyelukhila Emisiri khulwo okhwebisa mutsimoni tsia Solomoni yakahul'la, yamala achelele ingo wabwe.

³Abandu betsinzibulo tsia Isiraeli yesinyolu bamulanga, ma bosi nibatsia khu Rehoboamu nibamubool'la mbu,

⁴“Papawo Solomoni yali okhukhutukha emisiko emisiro. Nawe noba niwakhanguyia emisiko yitsi ma okhole obulamu okhuba obulahi nefwe khulaba abandubo abahulili.”

⁵Rehoboamu nabakalusia mbu, “Mumbelesie obweyangu nganakane ling'ana yili ma namukalukhe inyuma wamatukhu kataru.” Kho abandu yabo barula khuye.

⁶Omuruchi Rehoboamu yatsia okhureeba obuchetsiyi khubasakhulu abali abachetsiyi ba Solomoni samwanawe. Kho yabareeba mbu, “Ni ng'ana sina eliamunyala okhukhonya n'nalio elia ndakhakalusia abandu yaba?”

⁷Abasakhulu nabo nibamukalusia mbu, “Noba nokhol'la abandu bano obulahi, ne nobayanzisia khulwo khubabool'la amang'ana amalahi, balabetsanga abahulili hasiwo.”

⁸Nebutswa Rehoboamu yachaayilisia amang'ana kobuchetsiyi bwabasakhulu yabo ma natsia khubabuukha aba yakhula n'nabo ma abali nibali abachetsiyi baabe.

⁹Kho yabareeba mbu, “Nisina esia munzibaal'langa okhukhola? Ni ng'ana sina elia ndakhabool'la abandu yaba abareebanga mbu nyanguyie ebisiro biabwe?”

¹⁰Ababuukha yabo bamukalusia nibaboola, “Kano niko akokwana okhubabol'la: ‘Esitere sianje esitititi nes'siro okhuyomba esisienje sia papa wanje.

¹¹Kho lole, papa wanje yamutukha emisiko emisiro, nase nanzikhole emisiro okhubira yaho. Ye yamukhupaka nolusaala, nase namunywekhe nesiboko sieingubu!’ ”

¹²Inyuma wamatukhu kataru Yeroboamu halala nabandu bosi bakalukha khumuruchi Rehoboamu, singa obwa Rehoboamu yali nabalachile.

¹³Omuruchi yachaayilisia amang'ana kobuchetsiyi kabasakhulu ma nalul'la abandu yabo

¹⁴singa ababuukha bali nibamuchetsihisie. Yababool'la mbu, “Papa wanje yamutukha emisiko emisiro, nase nanzikhole emisiro okhubira yaho. Ye yamukhupa nolusaala, nase namunywekhe nesiboko sieingubu!”

¹⁵Kali akobulalilo bwo MWAMI Nyasaye okhuhesia aka yali niyabool'la Yeroboamu omusiani wa Nebati okhubir'ra mumuroobi Ahija wa Shilo. Yisi nisio esiachila omuruchi narahendela amang'ana kabandu.

¹⁶Olwabandu balola mbu omuruchi usuuye okhubahulila, bahanzukha nibaboola mbu, “Khwibil'le aka Daudi nende abeinzuye! Abandu ba Isiraeli mutsie ingo! Lekhe Rehoboamu yehengelesie omwene!” Kho abandu ba Isiraeli bakhola indiri

¹⁷ne nibalekha Rehoboamu singa omuruchi wabandu abamenyanga mulusoma lwa Yuda bonyene.

¹⁸Ma Rehoboamu naruma Adoniramu owali omusinjil'li wemilimo emitinyu okhutsia khu Baisiraeli, nebutswa bamulasa namachina ma nibamwira. Khulwako, Rehoboamu yelukha tsimbilo niyenjila mwikaari lilie ma niyelukha natsia Yerusalemu.

¹⁹Okhurula olwene yilwo abandu belihanga liesinyolu lia Isiraeli babetsanga neindiri khubaruchi bolubamba lwa Daudi.