Read lunyore 2 AKETSINYINGA 11 Bible Online

2 AKETSINYINGA 11 - lunyore bible

2 AKETSINYINGA 11

¹Olwomuruchi Rehoboamu yoola Yerusalemu, yabunjikha halala abasikari abalulu etsielefu emia ndala namakhumi munane okhurula mulwibulo lwa Benjameni nende Yuda. Yachoomanga okhuseera lihe nabandu betsinzibulo tsiesinyolu mbu yekalusisie obwami khubo.

²Nebutswa OMWAMI yabool'la omuroobi Shemaya

³atsie okhubool'la omuruchi Rehoboamu nende abandu ba Yuda na Benjameni mbu,

⁴“Muraseera Abaisiraeli basienywe tawe. Mwitse ingo wenywe inywe mwesi. Akali okhwekhola nakobulalilo bwanje.” Bamala nibalonda lilako lio MWAMI ne sibaseera Yeroboamu tawe.

⁵Rehoboamu yatsilil'la okhuba mu Yerusalemu ma nalaka mbu amasisi kombokhwe khumatookho ka Yuda nende Benjameni kano:

⁶Betselehemu, Etamu, Tekoa,

⁷Betsisuri, Soko, Adulamu,

⁸Gatsi, Maresha, Sifu,

⁹Adoraimu, Lakishi, Aseka,

¹⁰Sora, Aiyaloni nende Heburoni.

¹¹Yalaka mbu kasirwe butinyu ma naramwo abemeli ne musielitookho yaramwo tsinyumba tsiokhuramwo ebiokhulia, amafura komuseituni, nende ewaini,

¹²khandi nende etsiokhuramwo ebikhumba nende amafumo. Munjila iyi yara Yuda nende Benjameni hasi wobwami bubwe.

¹³Okhurula mutsisoma tsiosi etsia Isiraeli, abesaalisi, nende Abalawi bakongoma emwalo enandete okhutsia Yuda.

¹⁴Abalawi balekha obwayilo bwabwe nende emikunda chiabwe chindi ma nibatsia Yuda nende Yerusalemu, sichila omuruchi Yeroboamu, wa Isiraeli nende abaruchi bandi abamulonda sibabahuchil'la okhukhalabana singa abesaalisi bo MWAMI tawe.

¹⁵Yeroboamu yeela abesaalisi baabe omwene okhukhalabana habundu hokhwekayakayila ahabanyasaye abaramanyikhan'ne nende okhwekayakaya ebisieno nende ebifwanani ebia yalomba ebifwananga etsikhole nende ebimoosi bietsichulukhi.

¹⁶Okhurula mubandu betsinzibulo tsia Isiraeli, yabo abenyanga okhwekayakaya OMWAMI Nyasaye wa Isiraeli mubwatooto balonda Abalawi okhutsia Yerusalemu, kho babe abanyala okhukhol'la OMWAMI Nyasaye wabakuka babwe emisango.

¹⁷Yaka kakufuhasia obwami bwa Yuda, ne khulwemihika chitaru, bakhonyel'la Rehoboamu omusiani wa Solomoni, ma nibamenya singa balinji hasi homuruchi Daudi nende Solomoni.

¹⁸Rehoboamu yateesia Mahalatsi omukhaana wa Yerimotsi owali omusiani wa Daudi ne nyina mwana yalangwa mbu Abihaili omukhaana wa Eliabu ne yali omwitsukhulu wa Yese.

¹⁹Bali nabasiani bataru mbu: Yeushi, Shemaria nende Sahamu.

²⁰Olunyuma Rehoboamu yateesia Maaka omukhaana wa Abisalomu ne yebula n'naye abasiani bane mbu: Abiya, Itai, Siza, nende Shelomitsi.

²¹Abakhasi bosi aba Rehoboamu yateesia bali likhumi namunane nende abandi abokhumenyibwa amakhumi kasasaba, ne yali nabasiani amakhumi kabili namunane nende abakhaana amakhumi kasasaba. Khubakhasi baabe bosi pe, yali okhuyanza Maaka okhusila,

²²ma nakhola Abiya omusiani wa Maaka okhuba ikulu khubandi bosi, namwahula mbu abe niye owakharuke musilenjesie.

²³Rehoboamu yakabula emilimo khubasianibe mubuchesi obukali, ne yabara buli habundu mu Yuda nende mu Benjameni mumatookho akasirwa bulahi. Yabakabul'la bosi kosi aka batakhanga ma nabanyool'la abakhasi abenji.