Read lunyore 2 AKETSINYINGA 12 Bible Online

2 AKETSINYINGA 12 - lunyore bible

2 AKETSINYINGA 12

¹Olwa Rehoboamu yali namal'le okhwenyool'la obunyali singa omuruchi, ye nende abandube bosi balekha Amalako ko MWAMI.

²Mumuhika kwakharano muburuchi bwa Rehoboamu, Shishaki omuruchi we Misiri yaseera Yerusalemu. Baseerwa khulwo okhubula okhuba abasubilwa khu Amalako ko MWAMI.

³Yaliseera nali nabasikari bamakaari komul'lo ehelefu ndala netsimia tsibili, etsisululi etsielefu amakhumi kasasaba, nende abasikari ba Libia, Sukite nende Etsiopia.

⁴Yabukula amatookho akasirwa aka Yuda ma niyenjila okhwola Yerusalemu.

⁵Omuroobi Shemaya yatsia khumuruchi Rehoboamu nende khubemeli ba Bayuda abali nibebunjikhile Yerusalemu nibenyanga okhwilukha okhurula khu Shishaki. Yababool'la mbu “Kano niko ako MWAMI aboolanga khwinywe: ‘Mwabeye okhundekha, nase luno mal'le okhumulekha mumakhono ka Shishaki.’ ”

⁶Omuruchi Rehoboamu nende abemeli bosi bahuchil'la mbu bali nibakhol'le tsimbi, ma nibaboola, “Ako MWAMI ali mwikhola nakahabwene.”

⁷Olwo MWAMI yalola akene yako, yabool'la omuroobi Shemaya olwakhabili mbu, “Khulwa mbu bahuchiliye tsimbi tsiabwe, sinzia okhubamala tawe. Nebutswa olwa Shishaki abaseera balahonokokha hati butswa. Abandu ba Yerusalemu sibalasalisibwa bululu netsingufu tsielirima lianje liosi tawe,

⁸nebutswa Shishaki alabaleka, nabo balamanya obwabukhani hakari wokhurumikhila ise nende okhurumikhila abaruchi besibala.”

⁹Omuruchi Shishaki yetsa Yerusalemu ma nabukula amabiikhilo okhurula mu Hekalu nende okhurula hango homuruchi. Yabukula ebindu biosi halala nende ebikhumba bietsahabu ebiomuruchi Solomoni yali niyalomba.

¹⁰Ne musilenje siabio omuruchi Rehoboamu yalomba ebikhumba biomukasa ma nabihaana mumakhono Ketsisawoni etsialindanga ebilibwa bie hango homuruchi.

¹¹Buli lwosi olwomuruchi yenjilanga mu Hekalu, abasikari yabo bachinganga ebikhumba yibio ma khandi babikalusia munyumba yabalindi.

¹²Khulwa mbu Rehoboamu yetutuyia khu MWAMI, oburima bwo MWAMI sibwamala bumumulule kupu tawe, ne amang'ana kamala katsilil'le bulahi nende Yuda.

¹³Rehoboamu yaruka nali mu Yerusalemu ma nameeta obunyalibwe singa omuruchi. Olwa yachaaka okhuruka yali owemihika amakhumi kane namulala, ne yaruka emihika likhumi nachine nachitaru mu Yerusalemu, litookho elio MWAMI yali okhwahula mutsisoma tsia Isiraeli tsiosi mbu libe nilio habundu aha akwana okhwekayakayilwa. Nyina Rehoboamu yalangwa Naamani, okhurula musibala sia Amoni.

¹⁴Ne Rehoboamu yakhola akali amabi sichila siyateema okhukhaba OMWAMI tawe.

¹⁵Ne amang'ana ka Rehoboamu yakhola okhurula mukhuchaaka okhwola mukhumalila nende amang'ana kabandu beinyumbaye kahandiikwa musitapu siamang'ana kobulamu bwomuroobi Shemaya nende musitapu siobulamu bwomuroobi Ido. Rehoboamu nende Yeroboamu bamenyanga mubulwani khasotso.

¹⁶Rehoboamu yafwa ma nayabilwa mubilindwa biabaruchi mwitookho lia Daudi ne musilenjesie omusianiwe olangwanga Abiya yali omuruchi.