Read lunyore 2 AKETSINYINGA 13 Bible Online

2 AKETSINYINGA 13 - lunyore bible

2 AKETSINYINGA 13

¹Mumuhika kwelikhumi namunane okhurula Yeroboamu omuruchi wa Isiraeli nachaaka okhwamiha, Abiya yabukula oburuchi bwa Yuda,

²ne yamiha emihika chitaru nali Yerusalemu. Nyinawe yalangwa Mikaya omukhaana wa Urieli okhurula mwitookho lia Gibea. Lihe liabuukha hakari wa Abiya nende Yeroboamu.

³Abiya yarula okhutsia mwihe naali nende abasikari etsielefu tsimia tsine, ne Yeroboamu naye yali nabasikari etsielefu tsimia munane.

⁴Abasikari yabo babukaan'na musibala siebikulu esia Efuraimu. Omuruchi Abiya yaniina khusikulu sia Semaraimu ma nalanjilisia Yeroboamu na Baisiraeli naboola: “Mbulile!

⁵Inywe simumanyile mbu OMWAMI Nyasaye wa Isiraeli yakhola Indakano eranyala okhufunakwa hakariwe nende Daudi, ma namuhelesia ye nende abetsukhulube oburuchi bwa Isiraeli inziayo tawe?

⁶Yeroboamu omusiani wa Nebati yakhol'la omuruchiwe Solomoni indiri.

⁷Ne olunyuma yabunjikha omukanda kwabandu abahingwa abali abamayamu abaranyala esindu, ma nibahachia Rehoboamu omusiani wa Solomoni okhukhola aka bali nibenyanga, naye yali nasili omwana omuti khandi obula amachesi kokhubafukula.

⁸Luno mupaalanga okhuseera lihe khuburuchi bwoluyali obwo MWAMI yahelesia abetsukhulu ba Daudi. Inywe muli nabasikari abenji nende ebimoosi bietsahabu ebia Yeroboamu yamulombela okhuba abanyasaye benywe.

⁹Mwali okhukhunga abesaalisi bo MWAMI abali abetsukhulu ba Haruni, khandi nimukhunga Abalawi. Mubukono bwabwe mwahula abesaalisi munjila efwanana nende obwamahanga kandi kakholanga. Omundu wosi owakhetsa nende echulukhi nohomba amakondi kane nakataru anyala okhwahulwa singa omwesaalisi wabanyasaye benywe yabo singa mubalanganga.

¹⁰“Nebutswa ifwe khusirumikhilanga OMWAMI Nyasaye wefwe ne sikhwamulekha tawe. Abesaalisi abolubamba lwa Haruni bahesianga emilimo chiabwe, ne Abalawi babakhonyanga emilimo yitsio.

¹¹Buli mukamba tsuli nende buli khumukolooba bahaananga obwali nende emisango chiemiruko echisambwanga emichima. Bahaananga emisango chiemikaati khumesa eyasiywa bulahi, ne buli khumukolooba bahambianga etsitaya etsili khubihani bietsahabu. Ifwe khukholanga ako MWAMI yakhulaka, ne nenywe mwamulekha.

¹²Nyasaye mwene niye omwemeli wefwe ne abesaalisibe bali hano netsinzika, ne berechekhele okhutsikhupa nende okhukhulaka mbu khumuseere. Inywe abandu ba Isiraeli, baralwane lihe no MWAMI, Nyasaye wabakuka benywe tawe! Kata simwakhamuleka tawe!”

¹³Nebutswa Yeroboamu naye yali narumile abalala khubasikaribe okhukonekha nokhuseera abasikari ba Yuda okhurula inyuma, ne abandi bosi nibabaseera okhurula imbeli.

¹⁴Abasikari ba Yuda bahenga iyi ne iyi ne nibalola mbu bafumbiywe hakari. Balanga khu MWAMI mbu abakhonye, ma abesaalisi nibakhupa tsinzika tsiabwe.

¹⁵Abandu ba Yuda bahanzukha obutinyu ma nibaseera lihe nibemeleywe nende Abiya. Nyasaye yaleka Yeroboamu nende abasikari ba Isiraeli.

¹⁶Abaisiraeli belukha okhurula khu Bayuda, ma Nyasaye nameeta Abayuda tsingufu okhulekel'la Abaisiraeli.

¹⁷Abiya nende abasikaribe beera Abaisiraeli obubi okhusila; abasikari abalulu ba Baisiraeli aberwa bali etsielefu tsimia tsirano.

¹⁸Ma kho abandu ba Yuda bali nobulechi khubandu ba Isiraeli, sichila beleeta khu MWAMI, Nyasaye wabakuka babwe.

¹⁹Abiya yalondel'la abasikari ba Yeroboamu ma nabukula amalala khumatookho kaake. Nako kali Betseli, Yeshana, Efuroni nende emikitsi atsiali ahembi n'nako.

²⁰Yeroboamu siyanyoola tsingufu khandi muburuchi bwa Abiya tawe. Olwokhumal'likha, OMWAMI yamukhupa ma nafwa.

²¹Ne Abiya yameetekha mutsingufu okhusila. Yali nabakhasi likhumi nabane ne yali nabasiani abayebula amakhumi kabili nababili nende abakhaana likhumi nabasasaba.

²²Amang'ana kobulamu bwa Abiya kandi kosi, aka yaboola nende aka yakhola, kahandiikwa musitapu siobulamu bwomuroobi Ido.