Read lunyore 2 AKETSINYINGA 14 Bible Online

2 AKETSINYINGA 14 - lunyore bible

2 AKETSINYINGA 14

¹Omuruchi Abiya yafwa ma nayabilwa mubilindwa biabaruchi mwitookho lia Daudi. Omusiani uwe olangwanga Asa yali omuruchi musilenje sisie ne esibala siali mumulembe khumihika likhumi muburuchi bwa Asa.

²Asa yayanzisia OMWAMI, Nyasayewe mukhukhola akali akahabwene nende amalahi.

³Yahiniaho tsisambwa tsiabanyasaye abacheni nende habundu habwe hokhwekayakayila. Khandi yatuyila hasi etsisiilo tsiamachina ma naremaka ebifwanani biomunyasaye omukhasi olangwanga Ashera.

⁴Yalaka abandu ba Yuda okhukhola akobulalilo bwo MWAMI Nyasaye wabakuka babwe, nende okhulonda amebaalo kaake namachetsiyioke.

⁵Ne sichila yali okhutuya habundu hokhwekayakayila abanyasaye abacheni nende etsisambwa tsiobwali okhurula mumatookho kosi aka Yuda, esibalasie siosi siali nomulembe hasi hoburuchi bubwe.

⁶Yombokhela amatookho ka Yuda amasisi kokhukasira mumatukhu kaake, ne khulwemihika eminji, lihe silialikhwoho tawe, sichila OMWAMI yamuhelesia omulembe.

⁷Yabool'la abandu ba Yuda mbu, “Chende khusire amatookho kefwe khulwo khukombokhela amasisi nende eminaara, nende ebilibwa ebinyala okhwikalwa nende ebiebibia. Esibala sili mumakhono kefwe sichila khwali okhukhola akobulalilo bwo MWAMI Nyasaye wefwe. Ye ukhusool'le ma ukhulinde bulahi mutsimbeka tsiosi.” Ma kho bombokha ma nibahindihala.

⁸Omuruchi Asa yali nabasikari bokhulwana lihe abahela etsielefu tsimia tsine okhurula Yuda abali nibali nebikhumba nende amafumo, ne abasikari bandi etsielefu tsimia tsibili namakhumi munane okhurula Benjameni abali nibali nebikhumba nende obuyingo. Bosi bali abandu abalulu khandi abasitsa belihe.

⁹Omundu wa Etsiopia oweliira mbu Sera yaseera esibala sia Yuda nali nabasikari abahela emilioni ndala nende abamakaari tsimia tsitaru ne benjila niboola Maresha.

¹⁰Asa yarula okhutsia okhuseera, ne abasikaribe niberechekha khandi abasikari ba Sera niberechekha Mwibanda lia Sefatsa ahembi Maresha.

¹¹Asa yasaaya khu MWAMI Nyasayewe naboola, “E OMWAMI! Ibe onyala okhuhabina abasikari batititi singa butswa obwa bakhabeye abenji. Luno, E OMWAMI Nyasaye wefwe okhuhabine sichila khweleetanga khuibe, ne khwitsile okhulwana abasikari abenji yaba muliira lilio. OMWAMI ibe oli Nyasaye wefwe; abulaho onyala okhupaala mbu yakhakhuleka.”

¹²OMWAMI yaleka abasikari belihe lia Etsiopia olwa Asa nende abasikari ba Yuda barula okhubaseera. Belukha,

¹³ma Asa nende abasikaribe nibabalondel'la okhwola Gerari. Abandu abenji abomukanda kwa Etsiopia berwa ne siyaliho owasikalakhwo tawe. Balekel'lwa no MWAMI nende abasikari baabe ma abasikari nibayaaka ebindu ebinji.

¹⁴Ma abasikari ba Yuda bamala nibafunaka abamatookho akali ahembi Kerari, sichila abandu baho bali nibatechesibubwe nende OMWAMI. Abasikari yabo bayaaka amatookho yako kosi ma nibabukula ebindu ebinji okhusila.

¹⁵Khandi bali okhuseera etsikambi tsiabaayi nalebe, nibabukula amakondi amenji nende tsingamia tsinyinji. Ma nibakalukha Yerusalemu.