Read lunyore 2 AKETSINYINGA 15 Bible Online

2 AKETSINYINGA 15 - lunyore bible

2 AKETSINYINGA 15

¹Omwoyo wa Nyasaye yetse khu Asaria omusiani wa Obedi,

²ne Asaria natsia okhwakaana nende omuruchi Asa. Ma naboola mbu, “Mumbulile inywe mwesi omuruchi Asa nende abandu ba Yuda halala nende aba Benjameni! OMWAMI ali halala n'nenywe oluhono olwa nenywe muli halala n'naye. Nimuba nimumukhaaba, alanyoolekha, nebutswa nimuba nimumulekha naye alamulekha.

³Khulwo oluhono olurambi abandu ba Isiraeli bamenyelenje sila Nyasaye watooto, khandi sila abesaalisi bokhubebaal'la amang'ana nende amalako.

⁴Nebutswa olwo obutinyu bwetsa khubo, belukhila OMWAMI Nyasaye wa Isiraeli. Bamukhaaba ma nibamunyoola.

⁵Mumatukhu yako, abulaho owakharul'le nende okhwinjila nali mumulembe, sichila obutinyu nende esibi siali habundu hosi musibala.

⁶Lihanga elala liaminil'la elindi, ne litookho elala niliminil'la elindi sichila Nyasaye yabaleer'ranga obutinyu nende esihenda mwoyo.

⁷Nebutswa okhwola mukufuhale ne murafwa amakani tawe. Namunyoole omukabwa khulwo omulimo okwa namukhole.”

⁸Olwa Asa yahulila amang'ana koburoobi bwa Asaria omusiani wa Obedi, yali okhwoma ikholo. Yahinia ebiniini biabanyasaye abacheni okhurula mu Yuda nende mu Benjameni nende ebiniini bindi biosi okhurula mumatookho aka yali nabukuye okhurula musibala siebikulu sia Efuraimu. Ne yalomba obuhia olusambwa lwo MWAMI olwali nilwasinjila mumuchitsi kwe Hekalu.

⁹Abandu abenji bali nibetsele khulubeka lwa Asa okhurula mu Efuraimu, Manase, nende mu Simioni, ne bali nibamenyanga mulihanga lilie sichila bali nibaluutsi mbu OMWAMI yali nali n'naye. Asa yababunjikha halala nabandu ba Yuda nende Benjameni.

¹⁰Bebunjikha mu Yerusalemu mumwesi kwakhataru khumuhika kwelikhumi nakharano okhurula Asa nachaaka okhuruka.

¹¹Khwitukhu yilio bahaana khu MWAMI emisango khubindu ebia bali nibayaakile. Nachio chiali, tsing'ombe tsimia tsine natsitaru, nende amakondi etsielefu tsine natsitaru.

¹²Nakhola indakano yokhwekayakaya OMWAMI Nyasaye wabakuka babwe nomwoyo kwabwe kwosi.

¹³Siomundu wosi, omubuukha nohomba omusakhulu, omusaatsa nohomba omukhasi oramwekayakaya yerwanga bwirwa.

¹⁴Besuha muliira lio MWAMI nomwoyo omukali mbu nabahesinjie indakano iyio, ma nibahanzukha ma nibakhupa tsinzika.

¹⁵Abandu ba Yuda bosi bali okhusangala sichila bakhola indakano yino nomwoyo kwabwe kwosi. Bayanzisibwa nende okhwekayakaya OMWAMI, naye nabahuchil'la ma nabahelesia omulembe mutsimbeka tsiosi.

¹⁶Omuruchi Asa yahiinia nyinawe Maaka khundebeye yobukhaye singa nyina omuruchi, sichila yali nalombele esifwanani sies'sinyo esiomunyasaye mukhasi olangwanga Ashera. Asa yaremaka esifwanani yisio, nasitubula ma nasambila ebikonjio biasio mwibanda lia Kidironi.

¹⁷Kata nikali mbu Asa siyayononia habundu hokhwekayakayila abanyasaye abacheni musibala siosi tawe, yali omusubilwa khu MWAMI mubulamubwe bwosi.

¹⁸Yara mu Hekalu ebindu biosi ebia samwanawe Abiya yali niyahaana khu Nyasaye, halala nende ebietsahabu nende ebiefetsa biosi ebia ye mwene yahaana khu MWAMI.

¹⁹Lihe silialikhwoho tawe okhwola khumuhika kwamakhumi kataru nachirano muburuchi bubwe.