Read lunyore 2 AKETSINYINGA 16 Bible Online

2 AKETSINYINGA 16 - lunyore bible

2 AKETSINYINGA 16

¹Mumuhika kwamakhumi kataru nakhasasaba muburuchi bwa Asa omuruchi wa Yuda, Baasha omuruchi wa Isiraeli yaseera Yuda ma nachaaka okhwombokha lisisi lia Rama okhwikal'la abandu okhwinjilanga nende okhurula musibala sia Yuda.

²Kho Asa nabukula efetsa nende etsahabu okhurula mumabiikhilo kemu Hekalu nende ekehango homuruchi ma natsihila Damasiko khu Benihadadi omuruchi wa Siria noburume buno:

³“Chenda khube abalina singa abapapa befwe balinji. Efetsa ino nende etsahabu ino nesihanwa sianje khuibe. Luno yanza osinjisie obuhambani bubwo nende Baasha omuruchi wa Isiraeli kho ahinie abasikari baabe musibala sinje.”

⁴Benihadadi yahuchil'la amang'ana ka Asa ma naruma etsisawoni tsitsie nende abasikari babwe okhutsia okhuseera amatookho ka Isiraeli. Yabukula Ijoni, Dani, Abeli, Betsi, Maaka, nende amatookho ka Nafutali kosi ahebimanulwa biabiikhwanga.

⁵Olwomuruchi Baasha yahulila akali nikekholekhanga, yamala alekhe okhwombokha amasisi ka Rama.

⁶Ma omuruchi Asa nabunjikha abandu okhurula musibala sia Yuda siosi ma nabalaka okhubukula amachina nende emisaala echia Baasha yali niyombokhelanga litookho lia Rama, ma nibombokhela amasisi kamatookho ka Geba nende Misipa.

⁷Olwene yilwo omuroobi Hanani yatsia khumuruchi Asa ma namubool'la, “Khulwa mbu wali okhweleeta khutsingufu tsiomuruchi wa Siria, musilenje siokhweleeta khu MWAMI Nyasayewo, abasikari ba Isiraeli[2] bahonokokhele okhurula khuibe.

⁸Abaetsiopia nende Abalibia, sibaali nabasikari bamakaari kelihe amenji nende abetsisululi abenji. Nebutswa olwa weleeta khu MWAMI, yakhuhelesia obulechi khubo.

⁹OMWAMI ahengelesianga esibala siosi mubweinikhu, okhuhaana obukhonyi khuyabo abemioyo chiabwe chili emisubilwa khuye. Akokhol'le yaka nakobusilu, ne khulwako okhurula olwaleelo okhutsia imbeli nolwanenje lihe nabasuku.”

¹⁰Yaka kachila Asa nahambila omuroobi uyo oburima ma nalaka mbu areebwe mububohe. Niko, amatukhu aka Asa yachaaka okhulul'la abandu.

¹¹Kosi akekhola muburuchi bwa Asa okhurula mukhuchaaka okhwola mukhumalila kahandiikwa musitapu siobulamu bwabaruchi ba Yuda nende Isiraeli.

¹²Khumuhika kwamakhumi kataru nachirano nachine muburuchibwe, Asa yali okhulemibwa nobulwaye bwebilenje. Ne kata mbwo, Asa siyayilukhila OMWAMI tawe, nikarali yatsia khubafila bamulese.

¹³Inyuma wemihika chibili yamala afwe

¹⁴ma nayabilwa musilindwa siomulwanda esia yali niyebatsila mwitookho lia Daudi. Babakha omubilikwe ebihunyanga obulahi nende amafura kesuswa okhukurechekha omubilikwe khulwo okhuyabilwa, ma nibasichikha esitioli siomul'lo omukali okhwekhuula okhufwa khukhwe.