Read lunyore 2 AKETSINYINGA 17 Bible Online

2 AKETSINYINGA 17 - lunyore bible

2 AKETSINYINGA 17

¹Yehoshafati yabukula obukono bwa Asa samwanawe singa omuruchi ma nakufuhala okhusila okhuseera Isiraeli.

²Yara amahe kabasikari mumatookho ka Yuda kosi akasirwa namasisi okhulinda esibala siosi sia Yuda, nende amatookho akali mu Efuraimu.

³OMWAMI yalaamila Yehoshafati ikhabi sichila yalonda ifwo ya samwana mumihika chichie echiokhuranga ne siyayekayakayakhwo Baali tawe.

⁴Yarumikhila Nyasaye wa samwana, nalonda amalako ka Nyasaye, ne siyakhola singa abaruchi ba Isiraeli tawe.

⁵OMWAMI yaralisia Yehoshafati mubunyalibwe okhwamiha esibala sia Yuda, ne abandu bosi bamuler'ra ebihanwa, kho yamala abe omuhinda khandi owoluyali olukali.

⁶Omwoyokwe kwayanzisibwa okhurumikhila OMWAMI ma natuya habundu hokhwekayakayila abanyasaye abacheni hosi; khandi yatuya esifwanani siomunyasaye mukhasi Ashera esiali nisili mu Yuda.

⁷Mumuhika kwakhataru muburuchi bubwe, yaruma abemeli bano okhutsia okhwibaala mumatookho ka Yuda: Benihaili, Obadia, Sakaria, Netsaneli nende Mikaya.

⁸Halala n'nabo, batsia nende Abalawi barano nabane nende abesaalisi babili. Abalawi tsana bali Shemaya, Netsania Sebadia, Asaheli, Shemiramotsi, Yehonatsani, Adoniya, Tobiya nende Tobadoniya; ne abasaalisi nabo bali Elishama nende Yehoramu.

⁹Babukula esitapu sia Malako ma nibabir'ra mumatookho kosi ka Yuda nibebaal'langa abandu Amalako tsana.

¹⁰OMWAMI yahambia amahanga kosi akali ahembi oburi bwokhuseera omuruchi Yehoshafati.

¹¹Abafilisiti abalala baler'ra Yehoshafati efetsa inyinji okhusila nende ebihanwa bindi, ne Abaharabu bandi nibamuleer'ra amakondi etsielefu tsine natsitaru netsimia tsine natsitaru nende tsimbusi etsielefu tsine natsitaru nende tsimia tsine natsitaru.

¹²Kho Yehoshafati yatsilil'la okhukufuhala mutsingufu okhusila. Musibala siosi sia Yuda, yombokha amasisi nende amatookho,

¹³ahebimanulwa biabiikhwanga mubwinji. Yara mu Yerusalemu abemeli beifuma indahi

¹⁴okhulondokhana nebilibwa biabwe. Adina yakholwa omukhongo wamahe kabasikari bemubilibwa bia Yuda, ne yali nabasikari etsielefu tsimia tsitaru hasiwe.

¹⁵Omulondiwe mubukhongo yali Yehohanani, naye yali nabasikari etsielefu tsimia tsibili namakhumi munane.

¹⁶Owakhataru mubukhongo yali Amasia omusiani wa Suchiri, nali nabasikari etsielefu tsimia tsibili. Amasia yali niyehaana omwene okhurumikhila OMWAMI.

¹⁷Omukhongo wamahe kabasikari bemubilibwa bia Benjameni yali Eliada owali omusikari weifuma ingali, ne yali nabasikari etsielefu tsimia tsibili hasiwe abali nebikhumba nende obuyingo m'makhono kabwe.

¹⁸Omulondiwe mubukhongo yali Yohosabadi, naye yali nabasikari etsielefu emia ndala nende amakhumi munane hasiwe, abali niberechekheye lihe.

¹⁹Abandu yaba barumikhila omuruchi mu Yerusalemu, ne okhumeeta khubo, omuruchi yara abasikari bandi mumatookho kandi ka Yuda akasirwa namasisi.