Read lunyore 2 AKETSINYINGA 18 Bible Online

2 AKETSINYINGA 18 - lunyore bible

2 AKETSINYINGA 18

¹Olwomuruchi Yehoshafati wa Yuda yahindihala nemiandu ma naba neifuma ingali, yaloosia obuteesani hakari wa mulala khubeinyumba yiye nende abeinyumba ya Ahabu omuruchi wa Isiraeli.

²Inyuma wemihika nalebe, Yehoshafati yatsia okhukonya omuruchi Ahabu mwitookho lia Samaria. Ahabu yenya okhuhelesia Yehoshafati oluyali nende yabo abali halala n'naye, kho yalaka mbu amakondi amenji nende tsing'ombe tsinyinji tsiirwe khulwo khukhola lisabo. Ahabu yateema okhuhomba Yehoshafati mbu amubukil'le okhuseera litookho lia Ramotsi elili mu Gileadi.

³Kho yamureeba, “Wakhayanza okhutsia n'nase okhuseera Ramotsi?” Yehoshafati namukalusia mbu, “Nanzie halala nabandu banje olwa nawe nobe niwerechekhele.”

⁴Ma nameeta okhuboola mbu, “Nebutswa khureebe OMWAMI mbelio.”

⁵Kho Ahabu yalanga abaroobi abanyala okhuhela tsimia tsine betse ahaali ma nabareeba mbu, “Nzie okhuseera Ramotsi nohomba tawe?” Nabo nibamukalusia mbu, “Tsia oliseera, Nyasaye nakhuhe obulechi.”

⁶Nebutswa Yehoshafati yamala areebe mbu, “Abulakhwoho omuroobi undi owakhunyala okhureeba khu MWAMI okhubir'ra muye?”

⁷Ahabu nakalusia mbu: “Asiliho mulala yenyene, naye ni Mikaya omusiani wa Imila. Nebutswa ndamusuula sichila saroobangakhwo amang'ana amalahi khu ise tawe: aroobanga butswa amabi konyene.” Yehoshafati namukalusia mbu, “Oraboola mbwo tawe!”

⁸Kho omuruchi Ahabu yalanga omukhongo wehango hahe namuruma okhutsia okhukhaaba Mikaya bwangu.

⁹Abaruchi babili yabo bebiikha tsingubo tsiabwe etsiobwami, ma bali nibekhaye khutsiruba tsiabwe etsiali halutse esioba wesilibwa sia Samaria, ne abaroobi bosi bali nibaboolanga akoburoobi bwabwe imbeli wabwe.

¹⁰Mulala khubo olangwanga Sedekia omusiani wa Kenaana, yalomba tsinzika tsiesibwa ma nabool'la Ahabu, “Kano niko ako MWAMI aboolanga, ‘Nolwane Abasiria netsinzika yitsi ne nobaleke bosi pe.’ ”

¹¹Abaroobi bandi bosi baboola amang'ana amatelwa yako. Baboola mbu, “Tsia oseere Ramotsi ne witsa okhulileka. OMWAMI yetsa okhukhuha obulechi.”

¹²Ne omurume owali natsiye okhuruna Mikaya yamubool'la, “Abaroobi bandi bosi baroobele mbu omuruchi nanyoole obulechi, nawe okhoya okhurooba amatelwa yako.”

¹³Nebutswa Mikaya yamukalusia naboola, “Khu Nyasaye mulala oli mwoyo Ise nzia okhuboola aka Nyasaye yetsa okhumbool'la!”

¹⁴Olwa yoola ahomuruchi Ahabu yali nali, omuruchi yamureeba mbu, “Mikaya, ololanga mbu nobulahi khu Yehoshafati nende ise okhutsia okhuseera Ramotsi nohomba tawe?” Mikaya namukalusia naboola, “Tsie muliseere! Siahene namuleke. OMWAMI namuhelesie obulechi.”

¹⁵Nebutswa Ahabu nakalusia naboola, “Olwol'lomanga n'nase muliira lio MWAMI, okhwola oboola akatooto! Namenye nikhubool'langa yaka okhwola lina?”

¹⁶Mikaya nakalusia naboola, “Ndolanga Abasikari ba Isiraeli nibasalan'ne musikulu singa amakondi akarali nomwayi. Ma OMWAMI naboola, ‘Abandu yabo sibali nomwemeli tawe. Lekha bakalukhe ingo nomulembe.’ ”

¹⁷Ahabu nabool'la Yehoshafati, mbu “Ndali okhukhubool'la mbu saroobangakhwo amalahi tawe. Aroobanga butswa amabi konyene!”

¹⁸Mikaya natsilil'la okhuboola mbu: “Luno hulila ako MWAMI aboolanga! Ndaluutsi OMWAMI niyekhaye khuluruba lulwe mwikulu, ne ababamalaikabe nibasinjiye ahembi n'naye.

¹⁹OMWAMI nareeba, ‘Niwina owanokaate Ahabu kho atsie okhwir'rwa Ramotsi?’ Balala khubamalaika baboola ling'ana elala ne abandi nibaboola elindi.

²⁰Ma okhwola olwo omwoyo kwetsaho nikubool'la OMWAMI mbu, ‘Ise namukate.’ OMWAMI nareeba omwoyo tsana mbu ‘Nomukaate mbwena?’

²¹Omwoyo nakwo nikuboola mbu, ‘Nanzie ma nakhole abaroobi ba Ahabu bosi okhuboola obubehi.’ OMWAMI nakubool'la mbu, ‘Tsia omukaate. Witsa okhumuyombel'la.’ ”

²²Ma Mikaya namalila nokhuboola mbu: “Yaka niko akamal'le okhwekhola. OMWAMI ukhol'le abaroobi baabo yaba okhukhubool'la obubehi. Nebutswa OMWAMI mwene wesuhile mbu ibe nawakaane nelikhupako!”

²³Nilwo olwomuroobi Sedekia yatsia khu Mikaya ma namwala oluhi naboola, “Nilina olwo omwoyo wo MWAMI yarul'le mwise ma nal'loma n'nawe?”

²⁴Mikaya namukalusia naboola, “Nomanye olwa notsie musikoti esieinyuma okhwebisa.”

²⁵Ma omuruchi Ahabu nalaka mulala khubakhongobe naboola, “Fumila Mikaya omuhile khu Amoni omukafuna welitookho nende khu mwami Yoashi.

²⁶Obabool'le bamure mubuhambe ma bamuhetsenje omukaati nende amaatsi okhwola olwa nangalukhe nindi nomulembe.”

²⁷Mikaya naboola nomwoyo omukali mbu, “Noba nochelele noli omulamu, kho OMWAMI saaba nal'lomeye mwise tawe!” Ma nameeta okhuboola mbu, “Inywe mwesi muhulile akamboolanga!”

²⁸Ma Ahabu omuruchi wa Isiraeli nende Yehoshafati omuruchi wa Yuda nibatsia okhuseera litookho lia Ramotsi elili mu Gileadi.

²⁹Ahabu nabool'la Yehoshafati mbu: “Olwa khutsia mwihe, nzia okhubisa obweni bwanje, nebutswa ibe wabiikhe tsingubo tsiobwami.” Kho omuruchi wa Isiraeli yatsia mwihe niyebisile obweni bubwe.

³⁰Omuruchi wa Siria yali nalachile abakhongo babasikari baabe abamakaari komul'lo mbu baraseerakhwo omundu wosi tawe narali omuruchi wa Isiraeli.

³¹Kho olwa balola omuruchi Yehoshafati, bosi bapaala mbu niye omuruchi wa Isiraeli, ma nibasukhana okhumuseera. Nebutswa Yehoshafati yahanzuukha ma OMWAMI Nyasaye namusoola ne nasukhania abasikari yabo okhurula khuye.

³²Abakhongo babasikari balola mbu siyali omuruchi wa Isiraeli tawe, kho balekha okhumulondel'la.

³³Metsukhan'na, omusikari wa Siria yalasa olusele olwafutula omuruchi Ahabu hakari hobwongan'no bwemumbafu buli. Ahabu nalakaya nabool'la omusikari owelusinjia likari lilie mbu, “Fumir'rwe! Sukhania likari khurule mwihe!”

³⁴Olwe lihe liali nilitsilil'langa, omuruchi Ahabu yali nahalabiywe mwikaari lilie nahengele aha Basiria bali nibali. Olwe eliuba liali niliyeelanga, Ahabu yamala afwe.