Read lunyore 2 AKETSINYINGA 2 Bible Online

2 AKETSINYINGA 2 - lunyore bible

2 AKETSINYINGA 2

¹Omuruchi Solomoni yarakhwo omwoyo okhwombokhela OMWAMI ehekalu eyabandu okhwekayakayila mwo OMWAMI, khandi nachooma okhweyombokhela inyumba yoburuchi.

²Yara abandu etsielefu amakhumi kane nakataru khumilimo chiokhuchinga ebindu biokhwombokhela, ne abandi etsielefu amakhumi munane okhukhola emilimo chiokhubaatsa amachina. Ne abandu bokhuhengelesia obwemilimo chiakholwanga bali etsielefu tsitaru netsimia tsisaaba.

³Solomoni yarumila Hiramu omuruchi wa Tiro ling'ana mbu: “Okhole obukhala n'nase singa wakholanga nende papa wanje omuruchi Daudi olwa wamukusisianga ebikhongo biemisiita khulwokhwombokha inyumbaye yoburuchi.

⁴Luno ise nyombokhanga ehekalu eyokhuhelesia OMWAMI Nyasaye wanje oluyali. Nebe habundu hatsienukhu ahabandu banje halala n'nase nakhumwekayakayilenje khulwo okhumusambila obwali obuhunyanga bulahi, nende okhuhaana ebihanwa biemikaati emitsienukhu khuye khasotso, khandi niho aha nakhuhanenje emisango emisambe buli mukamba tsuli nende khumukolooba; kata nende mumatukhu ke Sabato, nende Amasabo komwesi olwa kulabanga nende amatukhu kandi amatsienukhu khulwokhuhaana oluyali khu MWAMI Nyasaye wefwe. Ye walaka Isiraeli okhukholanga yaka inziayo.

⁵Ehekalu eya nyenyanga okhwombokha neingali okhusila, sichila Nyasaye wefwe nomukhongo okhuyomba abanyasaye bandi bosi.

⁶Ne kata mbwo abulaho omundu onyala okhwombokhela Nyasaye ehekalu, sichila kata obubambukhu bwosi bwo mwikulu sibunyala okhumuhela tawe. Kho nase ndakhanyala mbwena okhwombokha ehekalu enyala okhuba ikhongo okhuyomba habundu hokhusambila obwali khu Nyasaye?

⁷Kho yanza urumile omundu oli nobusitsa bwokhubaatsa amachina, nokhukhola emilimo chietsahabu, efetsa, omukasa nende ebibia, khandi onyala okhulukha tsingubo tsiobukondo obwabuluu, obusembe nende obwakhanyu. Yetse akhole emilimo nende abasitsa ba Yuda nende Yerusalemu aba papa wanje Daudi yali okhwahula.

⁸Manyile mbu ababaatsi bemisaala baabo nabasitsa abalulu, kho yanza under're ebikhongo ebiemisiita, biemitarakwa, nende ebiemisanduli okhurula Lebanoni. Rumanga abakholi banje okhukhonyana nende abaabo

⁹okhurechekha emisaala eminji sichila ehekalu eya nyenyanga okhwombokha yiyi nebe ingali khandi eyeing'ono indahi.

¹⁰Khulwokhulisia abakholi baabo, nakhurumile etsitani estielefu tsibili tsieingano, etsitani etsielefu tsibili etsieshayiri, etsiliita etsielefu tsimia tsine etsiewaini nende etsiliita etsielefu tsimia tsine tsiamafura komuseituni.”

¹¹Omuruchi Hiramu yarumila Solomoni ebarwa okhumukalusia amang'ana kaake. Yahandika mbu, “OMWAMI wayanza abandube, ma niko akachil'le nakhwemekha obe omuruchi wabwe.

¹²OMWAMI Nyasaye wa Isiraeli, omulonji welikulu nende esibala yetsoomibwe! OMWAMI uheye omuruchi Daudi omusiani omuchesi, oli nokhumanyilisia khwosi nende obusitsa obwinji, ma luno aloosianga okhwombokhela OMWAMI ehekalu, nende hango hahe hokhumenya.

¹³Ne luno khurumilanga omufundi omuchesi khandi oli omusitsa okhusila ne eliira lilie ni Hiramu.

¹⁴Nyina uwe yali omukoko okhurula mulwibulo lwa Dani ne samwana yali omwibule wa Tiro. Ye nomusitsa webindu bietsahabu, nende efetsa nomukasa, nebibia, namachina, nende ebieingubo yabaluu, neisembe nende inzakhanyu nende kata etsiekatani. Anyala okhubaatsa nende okhukunza ebindu bietsimbila tsiosi, nende okhulomba ebindu biosi ebia ang'oleywe. Ohuchil'la omwene uyu akhole emilimo halala nabafundi baabo nende yabo abakhol'langa papa uwo, Daudi emilimo.

¹⁵Kho luno okhurumile ingano, nende eshayiri, newaini, namafura aka wakhulachile nokhuhe.

¹⁶Mubikulu bia Lebanoni, ifwe nakhuremake emisiita chiosi echia wakhenya, ma nakhuchibohe halala nikhuchiel'lemia khumaatsi ke inyanza ma nakhuchisukume okhwola Yopa. Okhurula Yopa onyala okhuchibukula ma ochihile Yerusalemu.”

¹⁷Omuruchi Solomoni yabala abandu bosi abali abacheni abamenyibwa musibala sia Isiraeli, ne obubali yibwo bwali singa obwa papawe Daudi yali niyakhola. Baliho abacheni abamenyanga mu Isiraeli abandu etsielefu emia ndala, namakhumi karano nachitaru nende tsimia tsisasaba.

¹⁸Khubo yabukula abandu etsielefu amakhumi kane nakataru nabara okhuchinganga ebindu biokhwombokhela, ne abandu etsielefu amakhumi munane nabara okhubaatsanga amachina mubikulu, ma niyahula abandu etsielefu tsitaru nende tsimia tsisasaba okhuba abanyapala abokhulola mbu omulimo kukholwanga bulahi.