Read lunyore 2 AKETSINYINGA 20 Bible Online

2 AKETSINYINGA 20 - lunyore bible

2 AKETSINYINGA 20

¹Inyumakhwo hati abasikari ba Moabu nende Amoni halala nabalina bebibala biabwe Abameuni[3] baseera esibala sia Yuda.

²Abarume nalebe betse nibabool'la omuruchi Yehoshafati mbu: “Abasikari abenji okhurula Edomu betsele okhurula injelekha weinyanza ye Chumbi okhukhuseera. Bamal'le okhubukula Hasasoni Tamari.” (Yili neliira lipatisa elia Engedi.)

³Yehoshafati yali okhuria ma nasaaya khu MWAMI mbu amukhonye. Ma nalaka mbu abandu bahonge okhulia musibala siosi.

⁴Okhurula musielitookho lia Yuda abandu belukha okhutsia Yerusalemu okhureeba OMWAMI obukhonyi,

⁵ne halala nabandu ba Yerusalemu abandu yabo bebunjikha mumuchitsi kwe Hekalu omuyia. Omuruchi Yehoshafati yatsia nasinjila imbeli wabwe

⁶ma nasaaya nomwoyo omukali naboola, “E OMWAMI Nyasaye wabakuka befwe, ibe wamihanga amahanga kosi akomusibala noli mwikulu. Ibe oli omukufu khandi owetsingufu ne abulaho onyala okhukhufukula ibe.

⁷Niwe Nyasaye wefwe. Olwa abandubo Abaisiraeli benjila musibala sino, wakhunga abandu abali nibamenyangamwo ma nohaana esibala tsana khubetsukhulu ba Aburahamu, omulina uwo, okhuba esiabwe inziayo.

⁸Bamenyanga hano khandi bakhwombokhela ehekalu okhukhuhelesia oluyali, nibamanyile

⁹mbu esibi siosi nisiakhabanyoola okhubahelesia esinyasio, kata nisinyala okhuba lihe, olumbe nohomba esimotso; kho banyala okhwitsa okhusinjila imbeli we Hekalu yino ahe ibe wekayakayilwanga. Banyala okhusaaya khuibe mumanyakhano kabwe ne nawe wakhabahulila ma obasoole.

¹⁰“Lola, abandu ba Amoni, Moabu nende Edomu bakhuseer're. Olwa abakuka befwe barula Emisiri, ibe siwabahuchil'la okhwinjila mubibala yibio tawe, kho batsila elubeka lundi nibabibotokhana sila okhubimuma.

¹¹Yaka niko akachilanga nibakhurunjia es'sialia, betsanga okhukhuhinia musibala esie ibe wakhuhelesia.

¹²Niwe Nyasaye wefwe! Obahe esinyasio, okhuba khutimile imbeli wabasikari abenji abakhuseeranga yaba. Sikhumanyile eliokhukhola tawe, nebutswa khunaayanga khuibe mbu okhukhonye.”

¹³Abandu ba Yuda bosi halala nabakhasi babwe nende abaana babwe bali nibasinjiyeho ahembi ne Hekalu.

¹⁴Ma Omwoyo wo MWAMI niyetsa khu Omulawi mulala owali mumukanda tsana. Eliira lilie liali Yahasieli omusiani wa Sakaria owomusilibwa sia Asafu. Yali owomulwibulo lwa Asafu okhubir'ra mu Matania, Yelieli nende Benaya.

¹⁵Yahasieli tsana yaboola mbu: “Omwami nende abandu bosi ba Yuda na Yerusalemu, OMWAMI aboolanga mbu murarimukhwa ikhola kata okhuria okhulwana nabasikari abenji yaba tawe. Obulwani sibuli obwenywe tawe, nebutswa nobwa Nyasaye.

¹⁶Mubaseere mukamba olwa nababe nibetsanga mulung'anyi lwa Sisie. Namwakaane n'nabo khundulo khwe Libanda elihengele musitsiimi ahembi Yerueli.

¹⁷Inywe sinamulwane lihe yili tawe. Musinjile butswa ma mulindil'le; mwitsa okhulola obulechi obwo MWAMI yetsa okhumuhelesia. Inywe abandu ba Yuda nende Yerusalemu murasisil'la kata okhuria tawe. Rule mutsie mwihe, ne OMWAMI alaba halala n'nenywe!”

¹⁸Ma omuruchi Yehoshafati yenamia obweni hasi mafungama, ne abandu bosi nibenamia obweni halala n'naye ma nibekayakaya OMWAMI.

¹⁹Abandu bemubilibwa bia Balawi ebia Kohatsi nende Kora nibasinjila ma nibakhupa eliyoka liokhwitsoomia OMWAMI Nyasaye wa Isiraeli.

²⁰Mukamba tsuli litukhu elialondakhwo, abandu barula nibatsia musitsiimi ahembi Tekoa. Olwa bali nibachaakanga okhurula, Yehoshafati yabakufuhasia namang'ana kano: “Inywe abandu ba Yuda nende Yerusalemu! Mure obusubili bwenywe mu MWAMI Nyasaye wenywe, ma mularalila butinyu. Musubile aka baroobi baabe bamubool'la, ne mulaleka.”

²¹Inyuma wokhul'loma nabandu, omuruchi yalaka abembi nalebe okhwebikha etsikanzo etsia bebiikhanga mumasabo amachomekhe ma bemele imbeli wabasikari, ne nibemba mbu: “MWAMI yetsoomibwe! Obuyanzibwe nobweinziayo!”

²²Olwa bachiaka okhwemba nende okhwitsoomia, OMWAMI yakhola abasikari ba Amoni, Moabu nende Edomu okhulwana abene khubene nibeerana.

²³Abaamoni nende Abamoabu bamala nibaseera Abaedomu ma nibabeera bosi pe, ma olunyuma nibachaaka okhuseerana abene khubene mubulwani bwokhwirana.

²⁴Olwa abasikari ba Yuda boola khumunaara okwali musitsiimi, bahenga ma nibalola abasuku babwe bosi nibakon'ne hasi nibafwiye. Abulaho owali nahon'ne.

²⁵Yehoshafati nende amahe kabasikari baabe batsia okhuyaaka ebindu, ma nibanyoola mubo ebilasan'nwe, tsingubo, nende ebindu biobukusu obutinyu. Babukula amatukhu kataru okhubunjelesia ebindu ebiayaakwa, nebutswa biali ebinji okhusila, kata sibaali abanyala okhubukula biosi tawe.

²⁶Khwitukhu liakhane bebunjikha halala Mwibanda lia Beraka ma nibetsoomia OMWAMI khu kosi aka yali nabakholeye. Niko akachila libanda tsana nililangwa “Beraka.”[4]

²⁷Kho Yehoshafati yemel'la amahe kabasikari baabe okhuchelela Yerusalemu mumwekhoyo omukali sichila OMWAMI yali nalechele abasuku babwe.

²⁸Olwa boola mwitookho, batsia mu Hekalu, ahamatungu nende tsinzika tsiali nitsikhupilwanga.

²⁹Amahanga kosi akahulila obwo OMWAMI yali nalechele abasuku ba Isiraeli, kali okhutechela okhusila,

³⁰Kho Yehoshafati yaruka mumulembe, ne Nyasaye yamuhelesia obulindi tsimbeka tsiosi.

³¹Olwa Yehoshafati yachaaka okhuruka Yuda yali nemihika amakhumi kataru nachirano ne yali naruchiye Yerusalemu emihika amakhumi kabili nachirano. Nyina uwe yalangwa mbu Asuba omukhaana wa Shilihi.

³²Singa obwa samwanawe Asa yali, Yehoshafati yakhola akali amalahi imbeli wo MWAMI;

³³nebutswa ahokhwekayakayila abanyasaye abacheni sihayononibwa tawe. Abandu bali nibasili okhusukhana kupu nomwoyo kwosi okhwekayakaya Nyasaye wabakuka babwe.

³⁴Amang'ana kandi kosi aka Yehoshafati yakhola, okhurula mukhuchaaka okhwola mukhumalila, kahandiikwa musitapu siamang'ana kobulamu bwa Yehu omusiani wa Hanani, akali musitonye silala khumang'ana akobulamu bwabaruchi ba Isiraeli.

³⁵Mumatukhu kandi, omuruchi Yehoshafati yalomba obulina nende Ahasia omuruchi wa Isiraeli, owali okhukhola amang'ana amenji amabi.

³⁶Ha Esionigeberi balomba etsimeeli tsiokhunyanza tsiokhutsia Esipania.

³⁷Nebutswa Eliasa omusiani wa Dodawahu okhurula mwitaala lia Maresha, yakondokhela Yehoshafati naboola mbu, “Khulwa mbu ulombele obulina nende Ahasia, OMWAMI nayononie ebindu biosi ebia wombokha.” Ne etsimeeli tsiasikha ne sitsiachenda khumaatsi okhutsia Esipania tawe.