Read lunyore 2 AKETSINYINGA 21 Bible Online

2 AKETSINYINGA 21 - lunyore bible

2 AKETSINYINGA 21

¹Yehoshafati yamala nafwa ma nayabilwa mubilindwa biabaruchi mwitookho lia Daudi, ne omusianiwe olangwanga Yehoramu yabukula obukonobwe singa omuruchi.

²Yehoramu omusiani wa Yehoshafati owali omuruchi wa Yuda yali nabamwabo basasaba. Nabo bali: Asaria, Yehieli, Sakaria, Asariahu, Mikaeli nende Shefatia.

³Papa wabwe yabahelesia etsahabu inyinji nende efetsa nemiandu tsiobukusi obukali ma nara siamulala khubo okhusinjil'la buli litookho eliasirwa namasisi mu Yuda. Nebutswa sichila Yehoramu yali omusiani mukhulundu, Yehoshafati yamwemekha okhuba omuruchi musilenje sisie.

⁴Olwa Yehoramu yali naraliye muburuchi bubwe khu Yuda, yalaka mbu abamwabo baabe bosi berwe, khandi nende abemeli ba Isiraeli bandi.

⁵Yehoramu yanyoola oburuchi nali nemihika amakhumi kataru nachibili ne yaruchila Yerusalemu khulwemihika munane.

⁶Yalonda ifwo ya Ahabu nende abaruchi ba Isiraeli bandi, sichila yali niyateesia omukhaana wa Ahabu. Yakhola tsimbi imbeli wo MWAMI,

⁷nebutswa OMWAMI siyayenya okhumuma oburuchi bwa Daudi tawe, sichila yali niyalomba Indakano na Daudi ma niyesuha mbu abolwibulo lulwe nabaamihenje khasotso.

⁸Mumatukhu kobwami bwa Yehoramu, esibala sia Edomu siakhol'la Yuda indiri ma nisieruka esiene.

⁹Kho Yehoramu halala nabasikaribe barula namakaari kabwe okhutsia okhuseera Edomu. Ebwene iyo, Abaedomu babafumbila, nebutswa bamala bebise mubutukhu ma nibelukha.

¹⁰Edomu sibetsanga khubwasio okhurula khu Yuda[5] okhurula olwene yilwo. Munyinga yene iyo, litookho lia Libina nalio khandi liakhola indiri, sichila Yehoramu yali nahanzukhiye OMWAMI Nyasaye wabakuka baabe.

¹¹Okhumeetakhwo, yombokhela abanyasaye abacheni habundu hokhubekayakaya mubikulu bia Yuda ma nachila abandu ba Yuda nende Yerusalemu okhukhola tsimbi imbeli wo MWAMI.

¹²Omuroobi Eliya yahandiichila Yehoramu ebarwa eboolanga mbu: “OMWAMI Nyasaye wakukawo Daudi, akhukhalachilanga esiina, sichila siolondanga ifwo ya papawo omuruchi Yehoshafati, nohomba eya kukawo omuruchi Asa tawe.

¹³Musilenje yisio, olondanga ifwo yabaruchi ba Isiraeli ma uchil'le abandu ba Yuda nende Yerusalemu babul'le okhuba abasubilwa khu Nyasaye, singa obwa Ahabu nende abaruchi abamulonda bachila Abaisiraeli nibarabba abasubilwa. Okhumeeta khu yako, ibe wera abamwabo baabo, abalinji abandu abalahi okhuyomba ibe.

¹⁴Khulwako, OMWAMI nahelesie abandubo esinyasio esikali okhusila, halala nabaana baabo nende abakhasi baabo, ne nayononie emiandu chichio chiosi.

¹⁵Ibe omwene nobe nesitekhele esibi esiobulwaye bwamalala ne nabumetekhenje okhuba obubi sielitukhu.”

¹⁶Abafilisiti nalebe nende Abaharabu nalebe bali nibamenya ahembi na Baetsiopia bandi abali nibaara liloba ahembi neinyanza. OMWAMI yabachema okhuseera lihe nende Yehoramu.

¹⁷Baseera Yuda, nibayaaka ebindu biosi hango homuruchi, ma nabibukula, abakhasi bomuruchi nende abasianibe bosi nibatsia n'nabo singa ababohe, nikarali sibabukula omusianiwe omutu olangwanga Ahasia tawe.

¹⁸Ma inyuma we yaka kosi, OMWAMI yaler'ra omuruchi esitekhele siobulwaye bwamala.

¹⁹Khuluhono lwemihika ahembi chibili, obulwaye yibwo bwameetekha okhuba obubi okhusila okhwola olwomuruchi yamala nafwa nali mukhubinda okhululu. Abandu besibala sisie sibamwambisia esitioli siomul'lo okhumwekhuula singa bali nibakhol'lakhwo abaruchi abamuranjil'la tawe.

²⁰Yehoramu yachaaka okhuruka nali nemihika amakhumi kataru nachibili ne yali naruchiye mu Yerusalemu emihika munane chionyene. Omundu wosi siyabelelakhwo olwa yafwa tawe. Bamuyabila mwitookho lia Daudi ne sibamura mubilindwa biabaruchi tawe.