Read lunyore 2 AKETSINYINGA 22 Bible Online

2 AKETSINYINGA 22 - lunyore bible

2 AKETSINYINGA 22

¹Abaharabu nalebe bali nibaseera ma nibeera abasiani bomuruchi Yehoramu bosi narali omusiani wokhumal'likha olangwanga mbu Ahasia. Kho abandu ba Yerusalemu bemekha Ahasia okhuba omuruchi musilenje sia samwana.

²Ahasia yali owemihika amakhumi kabili[6] nachibili olwa yachaaka okhuruka; ne yaruchila Yerusalemu omuhika mulala. Eliira lianyina liali Atsalia omukhaana wa Ahabu, khandi omwitsukhulu wa Omiri.

³Ahasia yalonda ifwo yabandu beinzu ya Ahabu, okhuba nyina yamwibaal'la okhukhola obubi.

⁴Yakhola tsimbi imbeli wo MWAMI singa obwa Ahabu nabeinzuye bali okhukhola; okhuba inyuma wokhufwa khwa samwana bo nibo abali abebaalibe, ma nibachila naremela ma nakwa.

⁵Yalonda amebaalo kabwe ma natsia okhukhonya Yoramu omuruchi wa Isiraeli okhuseera. Hasaeli omuruchi wa Siria. Amahe kabasikari kalwan'na Ramotsi elili mu Gileadi ma Yoramu narotselwa mubulwani yibwo.

⁶Yakalukha ingowe mwitookho lia Yesereli okhusilikhwa khub'bune bubwe, ne Ahasia natsia okhumukonyayo.

⁷Ne okhwisibwa khwa Ahasia khwarula khu Nyasaye olwa yatsia okhukonya Yoramu; okhuba olwa yoolayo, ye nende Yoramu bakaana nende omundu olangwanga Yehu, omusiani wa Nimishi owo MWAMI yali natsukhiliye amafura okhumulula inyumba ya Ahabu.

⁸Olwa Yehu yali nahaananga obukhalachi bwa Nyasaye okhumala inyumba ya Ahabu, yabukaana nende omukanda kwabandu okwalimwo abemeli ba Yuda nende mufialanyene Ahasia owali nahelekhele Ahasia khuluchendo lulwe. Yehu yabeera bosi.

⁹Ahasia yarunwa ma nanyoolwa neyebisile Samaria. Bamubukula nibamuhila khu Yehu ma nibamwira. Nebutswa bayabila omubilikwe khulwolukoosi lwa kukanyene Yehoshafati owateema butinyu okhurumikhila OMWAMI. Omundu wosi khubeinyumba ya Ahasia siyasikalakhwo owakharuchile esibala sia Yuda tawe.

¹⁰Olwa Atsalia nyina Ahasia yahulila akokhwirwa khwomusianiwe, yalaka mbu abandu bosi munyumba yoburuchi bwa Yuda berwe.

¹¹Ahasia yali nambotsonyene olangwanga Yehosheba, ne yali niyateesibwa nomwesaalisi olangwanga Yehoyada. Yahonia masilisi omusiani wa Ahasia olangwanga Yoashi namuhinia mubaana bomuruchi bandi abali nibenyanga okhwirwa ma namubisa musikoti siokhukona nende omuleli uwe. Khulwo okhumubisa, yamuhonia khukhwirwa okhwa Atsalia yali okhwira abasiani bomuruchi.

¹²Khulwemihika chisasaba, Yoashi yabiswa mbwo, ne Atsalia naye naruka esibala.