Read lunyore 2 AKETSINYINGA 23 Bible Online

2 AKETSINYINGA 23 - lunyore bible

2 AKETSINYINGA 23

¹Inyuma wokhulindil'la khulwemihika chisasaba, omwesaalisi Yehoyada yalola mbu inyinga yokhwoma ikholo yool'le. Kho yahuchilisania nende abakhongo bamahe barano. Nabo bali: Asaria omusiani wa Yerohamu, Eshimaeli omusiani wa Yehohanani, Asaria omusiani wa Obedi, Maaseya omusiani wa Adaya nende Elishafati omusiani wa Sikiri.

²Batsia mumatookho ka Yuda kosi ma nibachelela Yerusalemu nibali nende Abalawi halala nabemeli bosi bebilibwa.

³Bosi babukaan'na mu Hekalu, ma nibalombelamwo indakano nende Yoashi omusiani womuruchi. Yehoyada yababool'la mbu, “Uno nomusiani womuruchi omuchendi. Niye okwana okhuba omuruchi luno, singa OMWAMI yali okhwesuha mbu abolwibulo lwa Daudi nibo abalabetsanga abaruchi.

⁴Kano niko aka khwitsa okhukhola. Olwabesaalisi nende Abalawi nabetse khumilimo mwitukhu lie Sabato, esitonye esinabitaru khubo nabalinde ebilibwa bie Hekalu,

⁵esitonye esinabitaru khubo sindi nabalinde hango homuruchi ne esinabitaru sindi nasio nabalinde Esilibwa sio Musinji. Abandu bosi nabebunjikhe mumuchitsikwe hekalu.

⁶Omundu wosi arenjilakhwo mumombokho kehekalu tawe nibarali abesaalisi nende Abalawi abali khumilimo bonyene. Bo banyala okhwinjilamwo sichila nibo abahulwa ma nibasiywa, nebutswa abandu bandi bosi okhwola balonde amalako ko MWAMI ma babe esioba.

⁷Abalawi balinde omuruchi butinyu nibamufumbiye, ne babe nibachomoye tsinganga tsiabwe, khandi batsitsenje nomuruchi hosi aha yakhatsia. Omundu wosi owakhateema okhwinjila mu Hekalu okhwola yerwe.”

⁸Abalawi nende abandu ba Yuda bakhola amang'ana kosi aka Yehoyada yabebaal'la. Abandu sibahuchil'lwa okhurula khumilimo khwitukhu lie Sabato tawe, kho abakhongo bamahe bali neyabo abali nibetsanga khumilimo nende yabo abenyekhanga okhurula khumilimo.

⁹Yehoyada yahelesia etsisawoni amafumo nende ebikhumba ebialinji ebiomuruchi Daudi ne biali nibiabikhwa mu Hekalu.

¹⁰Yarechekha abandu abali netsinganga etsiali nitsichomoywe okhufumbila Ehekalu nende okhulinda omuruchi.

¹¹Ma Yehoyada nahinia Yoashi esioba, nara olusimbi khumurwe kukwe, ma namuhelesia amalako akalindanga oburuchi. Ma munjila iyo nibamwemekha okhuba omuruchi. Yehoyada halala nabasianibe batsukhil'la amafura khu Yoashi singa omuruchi ma abandu bosi nibaboola nomwoyo omukali mbu, “Omuruchi ahindile amatukhu amenji!”

¹²Olwa Atsalia yahulila abandu nibetsoominjia omuruchi neliyoka likali, yelukha natsia mu Hekalu ahomukanda kwali nikwebunjikhile.

¹³Habwene yaho, yalola omuruchi omuyia nali habwinjil'lo bwe Hekalu, nasinjiye hasiilo eyabikhilwa abaruchi nafumbiywe netsisawoni nende abakhupi betsinzika. Abandu bosi bali nibahanzukhanga nobusangali ne nibakhupa tsinzika, ne abembi bomuhekalu nabo bali nibarel'lesianga tsinyembo tsielisabo nibali nebinanda biabwe. Atsalia yamala arandule tsingubo tsitsie muburima ma naboola nomwoyo omukali mbu! “Yibu nobusiemani! Yibu nobusiemani!”

¹⁴Yehoyada siyayenya Atsalia yer'rwe muhekalu tawe, kho yalanga etsisawoni ma naboola: “Mumuhile esioba hakari wetsinyaali tsiabalindi, ne mwire omundu wosi owakhateema okhumuhonokosia.”

¹⁵Bamutiila, nibamuhila hango homuruchi, ma nibamwir'rayo ha Silibwa sie Tsisululi.

¹⁶Omwesaalisi Yehoyada yakhola indakano hakariwe, nomuruchi Yoashi nende abandu mbu nababetsenge abandu bo MWAMI.

¹⁷Ma bosi nibatsia muhekalu ya Baali ma nibachisambula. Bakoka tsisambwa nende ebifwanani ebialimwo ma nibeer'ra Matani, omwesaalisi wa Baali imbeli wetsisambwa.

¹⁸Yehoyada yara Abalawi nende abesaalisi okhuhenga emilimo chio mu Hekalu. Bakholanga emilimo echiabahebwa okhuhesia nomuruchi Daudi nende okhuhaana emisango emisambe khu MWAMI okhulondokhana na Malako ka Musa. Khandi barebwaho okhulinda tsinyembo nende emikho chiamasabo.

¹⁹Khandi Yehoyada yara abalindi okhulinda ebilibwa biehekalu okhwikal'la omundu wosi orali omusiyikhu okhwinjila mwo.

²⁰Abakhongo bamahe, abandu beifuma indahi, abemeli nende abandu bandi bosi beyonga khumwesaalisi Yehoyada khumukho kwokhuhila omuruchi hango homuruchi okhurula mu Hekalu. Benjil'la musilibwa esikali, ma abandu nibekhasia omuruchi khuluruba.

²¹Abandu bosi betsula nobusangali, ma litookho liosi nilisiling'ana, sichila Atsalia yali niyeer'rwe.