Read lunyore 2 AKETSINYINGA 24 Bible Online

2 AKETSINYINGA 24 - lunyore bible

2 AKETSINYINGA 24

¹Yoashi yali nemihika chine nachitaru olwa yachaaka okhuruka esibala sia Yuda, ne yaruchila Yerusalemu emihika amakhumi kane. Eliira lianyina liali Sibia okhurula mwitookho lia Berisheba.

²Yakhola akali amalahi khu MWAMI oluhono lwomwesaalisi Yehoyada yali nasili mwoyo.

³Yehoyada yeel'la Yoashi abakhasi babili, ma nibamwibul'la abasiani nabakhaana.

⁴Olunyumakhwo Yoashi yarakhwo omwoyo okhukol'losia Ehekalu aha yali niyabiiya.

⁵Yalaka abesaalisi nende Abalawi okhutsia mumatookho ka Yuda ma basolole khubandu amapesa akahela okhwombokha Ehekalu aha yabiiya buli muhika. Yababool'la bakhole bwangu, nebutswa Abalawi basisil'la,

⁶ma kho yamala alange Yehoyada, owali omwemeli wabwe ma namureeba, “Busina norakhol'le esinani okhulola mbu Abalawi basoloye amapesa kobusuru okhurula Yuda nende Yerusalemu aka Musa omurumikhili wo MWAMI yalaka abandu okhurunga khulwo okhukhonyel'la Liheema liokhubaho khwo MWAMI?”

⁷Abalondi ba Atsalia, owali omukhasi omubatsa, bali nibononia Ehekalu ma bali nibarumikhila ebindu ebitsienukhu mukhwekayakaya Baali.

⁸Omuruchi yalaka Abalawi okhulomba Lisanduku liokhusolol'lamwo ma nibalira hasilibwa esinjilanga mu Hekalu.

⁹Nibarumania amang'ana mu Yerusalemu mwosi nende mu Yuda mbu siomundu wosi aleer're OMWAMI obusuru obwa Musa omurumikhili wa Nyasaye yali niyalaka busololwe olwa Abaisiraeli bali musitsiimi.

¹⁰Amang'ana yaka kayanzisia abandu nende abemeli babwe, ma nibaleera amapesa kobusuru nibetsusia lisanduku n'nako.

¹¹Sielitukhu, Abalawi babukulanga lisanduku yilio nibalihila khumukhongo womuruchi owali nobunyali khulio. Buli lwosi olwa lialinji nilitsuye, omuhandichi womuruchi nende omukobokheliwo Mwesaalisi Omukhongo babukulanga amapesa okhukahinia mwisanduku, ma balikalusia hasilibwa esinjilanga mu Hekalu. Ma kho basolola amapesa amenji.

¹²Omuruchi halala nende Yehoyada bahaananga amapesa yako khubandu abali nibasinjiliye omulimo kwokhulomba Ehekalu aha yononekha, ne bahandika abombokhi bamachina, ababaatsi betsimbaho nende abombokhi bebibia khulwo okhukalusia Ehekalu mung'ono.

¹³Abakholi bosi, bakhola emilimo nesinani ma nibakalusia Ehekalu okhusinjila bulahi mutsingufu tsiayo singa yalinji olwokhuranga.

¹⁴Olwomulimo kwokhulunjisia Ehekalu kwali nikuhweye, etsahabu nende efetsa eyali nesikaye yahanwa khumuruchi nende khu Yehoyada; nabo nibalombakhwo etsindaabo nende ebindu biokhurumikhilwa mu Hekalu. Buli lwosi olwa Yehoyada yali nasili mwoyo, emisango chiahanwanga buli lwosi mu Hekalu.

¹⁵Olwa yali nali omusakhulu wemihika emia ndala namakhumi kataru, yafwa.

¹⁶Ne bamuyabila mubilindwa biabaruchi mwitookho lia Daudi khulwa amalahi aka yali nakholeye abandu ba Isiraeli, na Nyasaye, ma nende Ehekalu.

¹⁷Nebutswa olwa Yehoyada yali namal'le okhufwa, abakhulundu ba Yuda betsa ma nibasaaya omuruchi mbu abahulile.

¹⁸Kho abandu balekha okhwekayakayila mu Hekalu yo MWAMI Nyasaye wabakuka babwe, ma nibachaaka okhwekayakaya ebiniini nende ebifwanani biomunyasaye omukhasi olangwanga mbu Ashera. Esikha siabwe khulwe tsimbi yitsio siachila oburima bwa Nyasaye nibuba khu Yuda nende Yerusalemu.

¹⁹OMWAMI yabarumila abaroobi okhubakalusia khuye, nebutswa abandu yabo basuula okhumuhulila.

²⁰Ma Omwoyo wa Nyasaye niyetsa mu Sakaria omusiani womwesaalisi Yehoyada. Yasinjila ahabandu banyala okhumulola ma naboola nomwoyo omukali mbu, “OMWAMI Nyasaye areebanga esichil'le nimusuula amalako kaake ma khulwako nimweler'ra esibi abene! Mwabeye okhumulekha khulwako naye namulekhe.”

²¹Nebutswa baloosia masilisi okhwira Sakaria ma singa omuruchi yabalaka, bamulasa namachina nali mumuchitsi kwe Hekalu.

²²Omuruchi yali niyebil'la omulimo omulahi okwa Yehoyada, samwana Sakaria yali niyamukhol'la okhumura khundebe yoburuchi, ma nalaka mbu Sakaria yerwe. Olwa Sakaria yali nafwitsanga, yahanzuukha naboola, “OMWAMI omwene alole akamukholanga ma amuhe esinyasio!”

²³Mubumal'likhi bwomuhika yikwo, abasikari bamahe ka Siria betsa okhuseera Yoashi. Baseera Yuda nende Yerusalemu nibeera abemeli bosi ma nibayaaka ebindu ebinji nibabihila Damasiko khumuruchi wayo.

²⁴Abasikari ba Siria bali bati nebutswa OMWAMI yabaha tsingufu okhuleka abasikari ba Yuda abenji okhusila, sichila abandu yabo bali nibalekhele OMWAMI Nyasaye wabakuka babwe. Nimbwo omuruchi Yoashi yali okhuhebwa esinyasio.

²⁵Bamusalisia okhusila, ne olwa bali nibamulekhele, abasikari babili khubakhongobe bamusiemania ma nibamwir'ra khusitandasie okhumurunga es'sialia khulwokhwira omusiani womwesaalisi Yehoyada. Yayabilwa mwitookho lia Daudi nebutswa sibamuyabila mubilindwa bwabaruchi tawe.

²⁶Yabo abali okhumwira bali Sabadi omusiani womukhasi olangwanga Shimeatsi Omuamoni, nende Yehosabadi omusiani womukhasi olangwanga Shimiritsi Omumoabu.

²⁷Amang'ana kabaanabe, nende akoburoobi obwinji obwaroobwa khuye, nende akobwombokhi bwokhukalusia Ehekalu mung'ono, kahandiikwa musitapu esibaalanga amang'ana Kabaruchi. Ne omusianiwe olangwanga Amasia yabukula obukonobwe singa omuruchi.