Read lunyore 2 AKETSINYINGA 25 Bible Online

2 AKETSINYINGA 25 - lunyore bible

2 AKETSINYINGA 25

¹Amasia yali nemihika amakhumi kabili nachirano olwa yachaaka okhuruka, ne naruchila Yerusalemu emihika amakhumi kabili nachirano nachine. Eliira lianyina liali Yehoadani owarula Yerusalemu.

²Yakhola akali amalahi imbeli wo MWAMI nebutswa siyakakhola nomwoyo kwosi tawe.

³Olwa yali namal'le okhuralila muburuchibwe, yera abakhongo abali nibeera samwana.

⁴Nebutswa, kata mbwo, siyali okhwira abaana babwe tawe, habula yalonda ako MWAMI yali niyalaka mu Malako ka Musa mbu: “Abebuli barerwa khulwa amabi kabaana babwe tawe, ne abaana barerwa khulwa amabi kabebuli tawe; omundu yerwe khulwa amabi kaake omwene.”

⁵Omuruchi Amasia yaloosia abasaatsa bosi abetsinzibulo tsia Yuda nende Benjameni nabara mubituma biabasikari, okhulondokhana nebilibwa biabwe ma nabara hasi wetsisawoni mubituma bietsielefu nende ebietsimia. Yaba bali abasaatsa bemihika amakhumi kabili nende abayomba yaho, ne bosi halala bali abasaatsa etsielefu tsimia tsitaru. Bali abasikari abalobole, aberechekha okhutsia mwihe, abamanya okhulasa amafumo nende okhutiila ebikhumba.

⁶Okhumeetakhwo, yahandika abasikari etsielefu emia ndala okhurula Isiraeli aba yarunga etsikilo tsiefetsa etsielefu tsitaru netsimia tsine.

⁷Nebutswa omuroobi yatsia khuye namubool'la mbu: “Oratsia mwihe nabasikari ba Baisiraeli yaba tawe: OMWAMI saali nabandu abokhurula musibala siesinyolu yaba tawe.

⁸Haundi onyala okhupaala mbu balakhumeeta tsingufu mubulwani, nebutswa Nyasaye niye oli netsingufu okhuhaana obulechi nohomba okhulekwa, naye alachila abasuku benywe bamuleke.”

⁹Amasia nareeba omuroobi tsana mbu, “Ne amapesa aka ndali okhurunga abasikari ba Isiraeli nakabe mbwena?” Omuroobi naye namukalusia mbu, “OMWAMI anyala okhukhukalusisia amenji akayomba yako!”

¹⁰Kho Amasia yaseebula abasikari aba yali narunjile amapesa nababool'la batsie ingo. Khulwa amang'ana yako, bakalukha ingo wabwe nibatiliye abandu ba Yuda oburima obukali.

¹¹Amasia naye yekhulumania ma niyoma ikholo buuli nahila abasikaribe Mwibanda lie Chumbi. Habwene yaho baseera Abaedomu ma nibeera abasikari etsielefu likhumi

¹²khandi nibatila abandi etsielefu likhumi. Bahila ababohe yabo khubutenje bwelichina likali eliali mu Sela, nibabalumba okhurula khwichina yilio ma nibafunikhila khumachina akali nikali hasi walio ma nibafwa.

¹³Olwene yilwo, abasikari ba Isiraeli, aba Amasia yali nasebuye mbu balekhe okhutsia n'naye mwihe, baseera amatookho ka Yuda aka Samaria nende Betsi Horoni, nibeera abandu etsielefu tsitaru ma nibayaaka ebindu ebinji.

¹⁴Olwa Amasia yali narul'le mukhwira Abaedomu, yabukula ebifwanani biabanyasaye babwe niyetsa n'nabio ma nabisinjisia ne nabiekayakaya nende okhubisambila obwali.

¹⁵Yaka kachila OMWAMI nahambwa noburima obukali ma naruma omuroobi khu Amasia. Kho omuroobi uyo namureeba mbu, “Nisina esichil'le niwekayakaya abanyasaye abacheni abarakhanyal'le kata okhuhonia abandu babwe mumukhonokwo tawe?”

¹⁶Nasiboola mbwo, Amasia yamukhalaka esilimi naboola, “Ni nyinga sina olwa khwakhukhola omuchetsiyi womuruchi? Buna tsi, khase ndalaka mbu wirwe!” Omuroobi uyo yabuna nebutswa yali namubooleye mbu, “Luno mal'le okhumanya mbu Nyasaye uchoomele okhukhumala obulamu sichila okhol'le yaka kosi, khandi uchiayile amachetsiyio kanje.”

¹⁷Omuruchi Amasia wa Yuda halala nabachetsiyi baabe baloosie okhuseera Isiraeli. Kho yarumila Yehoashi omuruchi wa Isiraeli owali omusiani wa Yehoahasi khandi omwitsukhulu wa Yehu ling'ana mbu yetse balwane.

¹⁸Yehoashi naye narumila Amasia likalusia lino mbu: “Elihwa eliomubikulu bia Lebanoni liarumila omusiita ling'ana mbu ‘Bakhila omusiani wanje omukhaanawo.’ Esolo nabulimo yamala ebir'reho ma nesen'na elihwa yilio hasi.

¹⁹Nawe Amasia wepaakanga mbu wabeye okhuleka Abaedomu, nebutswa khuchetsiyianga mbu wikhale hango haho. Busina ocheme omunyakhano okwitsa okhuleera likhupako khuibe nende khubandu baabo?”

²⁰Nebutswa Amasia yasuula okhuhulila. Kali nikali akobulalilo bwa Nyasaye mbu Amasia alekwe, sichila yali niyayekayakayile abanyasaye ba Edomu.

²¹Kho omuruchi Yehoashi wa Isiraeli yatsia okhulwana lihe nende omuruchi Amasia wa Yuda. Balwan'na habundu halangwanga Betsi Shemeshi mu Yuda,

²²ne abasikari ba Yuda balekwa ma nibelukha nibakalukha ingo.

²³Yehoashi yafumila Amasia namuhila Yerusalemu; nalikul'la oluhinga lwa Yerusalemu okhurula khusilibwa sia Efuraimu okhwola khusilibwa sio Mukona, olurambukho oluhela etsimiita tsimia tsibili.

²⁴Yabukula etsahabu yosi nende efetsa yomu Hekalu, nebimanulwa biomuhekalu ebialindwanga nabolwibulo lwa Obedi Edomu, nende amabiikhilo kehango homuruchi; khandi nabukula abandu abayahambe ma nakalukha n'nabo halala nebindu biosi Esamaria.

²⁵Omuruchi Amasia wa Yuda yamenya emihika likhumi nachirano inyuma wokhufwa khwomuruchi Yehoahasi wa Isiraeli.

²⁶Amang'ana kandi kosi aka Amasia yakhola okhurula mukhuchaaka okhwola mukhumalila, kahandiikwa musitapu siabaruchi ba Yuda nende Isiraeli.

²⁷Ne okhurula khunyinga eya Amasia yakhol'la OMWAMI esikala marwi, khwaliho nende lifwenyi eliokhumwir'ra Yerusalemu. Yamala yelukhile mwitookho lia Lakishi, nebutswa abasukube bamulondayo ma nibamwir'rayo.

²⁸Omubilikwe kwachingilwa khusululi nikulerwa Yerusalemu, ma nayabilwa mubilindwa biabaruchi mwitookho lia Daudi.