Read lunyore 2 AKETSINYINGA 26 Bible Online

2 AKETSINYINGA 26 - lunyore bible

2 AKETSINYINGA 26

¹Abandu ba Yuda bosi beela omusiani wa Amasia owemihika likhumi nachisasaba elangwanga Usia okhuba omuruchi musilenje sia samwana.

²Inyuma wokhufwa khwa Amasia, Usia yakalusia litookho lia Elatsi ma naliombokha obuyia.

³Usia yachaaka okhuruka nali owemihika likhumi nachisasaba ne yaruchila Yerusalemu emihika amakhumi karano nachibili. Eliira lianyina liali Yekolia okhurula Yerusalemu.

⁴Yakhola amalahi imbeli wo MWAMI singa obwa Amasia, samwanawe yali niyakhola.

⁵Yarakhwo omwoyo okhurumikhila OMWAMI mubusubilwa mumatukhu ka Sakaria, owali omuchetsiyi uwe; ma khulwako Nyasaye yamulaamila tsikhabi.

⁶Usia yatsia okhuseera lihe na Bafilisiti. Yalikul'la amasisi kamatookho ka Katsi, Yaminia nende Ashitoti ma niyombokha amatookho ketsiminga ahembi Ashitoti nende musibala sindi siosi esia Bafilisiti.

⁷Nyasaye yamukhonya okhuleka Abafilisiti, nende Abaharabu abamenya ahembi nende Kuribaali ma nende Abameuni.

⁸Abaamoni barunganga obusuru bwabwe khu Usia, ma nakufuhala okhusila, ne ifumaye nelanda okhwola Emisiri.

⁹Usia yaralisia amasisi ka Yerusalemu olwa yombokha eminaara khu Silibwa sio Mukona, nende khu Silibwa sio Mwibanda, nende ahelisisi liekot'ta.

¹⁰Khandi yombokha eminaara musitsiimi ma nayaba amayabo amenji sichila yali nemiruko eminji hasi webikulu ebili emasaba nende mumahololokho. Khulwa mbu yali okhuyanza obulimi, yatsuuba abandu okhusimikha emikunda chiemisabibu mubikulu nende okhuraaka ebiraakwa musibala esinolu.

¹¹Yali nabasikari abenji abali niberechekhele okhutsia mwihe. Amabalo kabwe kabikhwanga nende Yelieli nende Maseya abahandichi bomuruchi hasi wobuhengi bwa Hanania, mulala khubomukanda kwomuruchi.

¹²Abasikari yabo banyoolanga amalako okhurula khubemeli etsielefu tsibili netsimia tsisasaba.

¹³Nabo bali nabasikari etsielefu tsimia tsitaru natsine natsitaru nende tsimia tsirano abalinji hasi wabwe, abalwananga lihe nesinani okhukhonya omuruchi okhuleka abasukube.

¹⁴Usia yahelesia abasikaribe ebikhumba, amafumo, etsikuri, ebitsengwa, nobuyingo, netsisele nende amachina komusinga.

¹⁵Mu Yerusalemu namwo, abandube abokhukunza ebindu balomba ebindu biokhulasilakhwo tsisele nende ebiokhulasilakhwo amachina okhurula khuminaara nende khutsikona tsielisisi lielitookho. Ifumaye yalanda siahabundu, ne yakufuhala okhusila khulwe tsingufu etsia yanyoola okhurula khu Nyasaye.

¹⁶Nebutswa olwomuruchi Usia yakufuhala yali neinjinia ingali ma nikachila nakwa. Yaleera esifwabwi khu MWAMI Nyasaye olwa yenjila mu Hekalu okhusamba obwali khulusambwa lwobwali.

¹⁷Omwesaalisi Asaria, nali halala nabesaalisi bandi abeikholo khandi abolutswoni balonda omuruchi

¹⁸okhumwikal'la. Bamubool'la mbu, “Usia! Obula obunyali okhusambila OMWAMI obwali. Nabesaalisi bonyene abolwibulo lwa Haruni nibo abahulwa okhukhola mbwo. Rula habundu hatsienukhu hano. Umal'le okhuchaaya OMWAMI Nyasaye ne solaba netsikhabi tsitsie khandi tawe.”

¹⁹Usia yali nasinjiye mu Hekalu halusambwa lwobwali ne yali natil'le olusalilo lwokhusambilakhwo obwali. Yamala asinyikhile abesaalisi, ne nonoho obuchele bwachiaka okhuromba mubwenibwe.

²⁰Asaria nende abesaalisi bandi bahenga mubweni bwomuruchi noburi obukali ma nibamuhinia mu Hekalu netsingufu. Yarulamwo bwangu sichila OMWAMI yali namuheye esinyasio.

²¹Mubulamu bubwe okhurula khwitukhu yilio, omuruchi Usia yali owobuchele okhwola olwa yafwa. Yamenyanga munzuye omwene, naranyala okhutsia mu Hekalu khandi okhuba yekal'lwa okhutsiamwo nende okhukhola emilimo chindi chiosi. Omusianiwe olangwanga Yotsamu yalindanga esibala olwene yilwo.

²²Omuroobi Isaya omusiani wa Amosi yahandika hasi amang'ana kandi kosi akomuruchi Usia yakhola olwa yali narukanga.

²³Usia yafwa ma nayabilwa mumukunda kwokhuyabilwamwo abaruchi, nebutswa siyayabilwa mubilindwa biabaruchi tawe sichila yali owobuchele. Yotsamu omusiani uwe nabukula obukonobwe singa omuruchi.