Read lunyore 2 AKETSINYINGA 28 Bible Online

2 AKETSINYINGA 28 - lunyore bible

2 AKETSINYINGA 28

¹Ahasi yachaaka okhuruka nali nemihika amakhumi kabili, ne yaruchila Yerusalemu emihika likhumi nachisasaba. Siyakhola akali amalahi imbeli wo MWAMI singa Daudi kukanyene yakhola tawe.

²Habula yakhola singa abaruchi ba Isiraeli bakhola ma nalomba ebifwanani bia Baali ebiomukasa.

³Khandi yasambila obwali mwibanda lia Hinomu, kata khandi nahaana abasianibe bene singa omusango kwokhusambilwa ebiniini, nakholanga ebies'sinyo singa abamahanga, abo MWAMI yali okhukhunga musibala olwa Abaisiraeli bali nibenjilangamwo.

⁴Ahasi yakhol'la emisango nende okhusambila obwali habundu hokhwekayakayila abanyasaye abacheni, khubikulu nende khumisaala chiamasafu amabisi.

⁵Khulwako OMWAMI Nyasaye yamuhaana mumukhono kwomuruchi wa Siria, owali okhumuleka ma nabukula abandu ba Ahasi abenji nabahila Damasiko singa ababohe. Khandi OMWAMI yamuhaana mumukhono kwomuruchi wa Isiraeli, owali okhumuleka ma niyeera abandu abenji:

⁶Omuruchi uyo, owalangwa mbu Peka, omusiani wa Remalia, yeera abandu bolutswoni etsielefu emia ndala namakhumi kabili mu Yuda khwitukhu elala. Yaka kekholekha sichila abandu ba Yuda bali nibakhupile OMWAMI Nyasaye wabakuka babwe omukongo.

⁷Omusikari wa Isiraeli olangwanga Sikiri yeera omusiani womuruchi Ahasi olangwanga Maseya, nende omusinjil'li wehango homuruchi olangwanga Asirikamu nende omulondi womuruchi mubukhongo oweliira mbu Elikana.

⁸Kata nikali mbu Abayuda bali abolubamba lwabwe, abasikari Abaisiraeli babukula abakhasi halala nabaana abahela etsielefu tsimia tsibili nibabahila Samaria singa ababohe halala nende ebindu ebinji ebia bali nibayaakile.

⁹Ne ebwene iyo yaliho omuroobi wo MWAMI oweliira mbu Odedi. Naye yarula natsia okhubukan'na abasikari ba Isiraeli abali nibetsanga nababohe ba Yuda okhwinjila mwitookho lia Samaria, ma nababool'la mbu, “OMWAMI Nyasaye wabakuka benywe yatiiliye abandu ba Yuda oburima, nisio esiachil'le nabahaana mumukhono kwenywe. Ne Nyasaye uluutsi singa muber're mwirima likali.

¹⁰Ne luno mwenyanga okhukhola abasaatsa nabakhasi ba Yuda nende Yerusalemu okhuba abasumba benywe. Nenywe simumanyile mbu nenywe muli netsimbi etsia mwakhol'la OMWAMI Nyasaye wenywe?

¹¹Kho luno hulile amang'ana kanje! Abahambe yaba nabamwabo benywe nende ababotso benywe. Mubalekhe batsie, khase OMWAMI alamuha esinyasio muburima bubwe.”

¹²Bane khubemeli belihanga liesinyolu mbu Asaria omusiani Yehohanani, Berekia omusiani wa Meshilemotsi, Yehisikia omusiani wa Shalumu nende Amasa omusiani wa Halidai nabo khandi bafukula aka abasikari ba Isiraeli bali nibakholanga.

¹³Baboola mbu: “Muraleera abasumba yabo hano tawe! Ifwe khwaseya okhukhola tsimbi imbeli wo MWAMI tsimbi ma nikachila nakhutil'la oburima bwokhukhuha esinyasio. Luno nenywe mwenyanga okhukhola ling'ana eliakhakhumeeta esikha esikali.”

¹⁴Kho abasikari ba Isiraeli balakhuula abasumba yabo nibabara mumukhono kwabandu ba Yuda nende abemeli babwe halala nebindu biosi ebia bali nibayaakile.

¹⁵Ne abandu bane abamera kabwe kakharalwa yabo barula nibabukula abasumba tsana, ne nibababiikha tsingubo okhurula khubindu ebiali nibiyaakilwe. Bababiikha ebilaaro nibabahelesia ebiokhulia nende amaatsi, nibabakha amafura khutsinguma tsiabwe. Yabo abali abatekhele abaranyala okhuchenda babachinjila khutsipunda, ma nibahila ababohe bosi Yeriko, litookho eliemisaala chiamasindu elili mu Yuda. Ma Abaisiraeli nibakalukha ingo wabwe Samaria.

¹⁶Mumatukhu yako omuruchi Ahasi yaruma ling'ana khumuruchi wa Asiria mbu yetse okhumukhonya.

¹⁷Abaedomu bali nibakalukhile okhuseera Yuda ma nibasilekele khandi nibahil'le abandu mububohe.

¹⁸Khandi munyinga yene iyio, Abafilisiti bali nibaseeranga amataala akali ahembi nende ebikulu biemasaba nende mulusoma lwenandete wa Yuda. Babukula amatookho ka Betsi Shemeshi, Aijaloni nende Kederotsi halala namatookho ka Soko, Timina nende Kimiso nemichitsi tsiako, ma nibamenyayo.

¹⁹OMWAMI yaleera eminyakhano khu Yuda sichila Ahasi omuruchi wa Yuda yali nakholeye abandu amang'ana akarakhoyele ma naleer're es'simba murwe khu MWAMI.

²⁰Omuruchi wa Asiria naye niyetsa okhumufukula nende okhumunyasia musilenje siokhumukhonya.

²¹Kho Ahasi nabukula etsahabu yomu Hekalu, nende eya hango homuruchi nende eye mutsingo tsiabemeli ba Yuda, ma nahil'la omuruchi wa Asiria, nebutswa kata yako sikamusoola tawe.

²²Olweminyakhano chichie chiali nichimetekhele okhusila, omuruchi Ahasi mwene uyo yakhola tsimbi imbeli wo MWAMI etsiali tsinyinji okhubira esichelo.

²³Yahaana emisango khubanyasaye ba Siria, abali nibamuleka. Yaboola mbu, “Abanyasaye ba Siria bakhonyele abaruchi ba Siria, kho nase nimba nimbahan'na emisango balakhonya.” Yaka kaleera amakhupako khuye omwene nende khwihanga lilie.

²⁴Okhumeetakhwo, yabukula ebindu biomuhekalu biosi ma nabifunaka mubitonye. Yekala Ehekalu ma niyombokha tsisambwa mu Yerusalemu mwosi.

²⁵Mumatookho ka Yuda kosi nende mumataala, yombokhamwo habundu hokhwekayakayila abanyasaye abacheni. Munjila iyi yeler'rakhwo omwene lirima lio MWAMI Nyasaye wabakuka baabe.

²⁶Amang'ana kandi kosi akoburuchi bwa Ahasi, okhurula mukhuchaaka okhwola mukhumalila, kahandiikwa mumang'ana kobulamu bwabaruchi ba Yuda nende Isiraeli.

²⁷Omuruchi Ahasi yafwa ma nayabilwa mu Yerusalemu, nebutswa siyayabilwa mubilindwa biabaruchi tawe. Omusianiwe oweliira mbu Hesekia yabukula obukono bubwe singa omuruchi.