Read lunyore 2 AKETSINYINGA 29 Bible Online

2 AKETSINYINGA 29 - lunyore bible

2 AKETSINYINGA 29

¹Hesekia yachaaka okhuruka nali nemihika amakhumi kabili nachirano ne yaruchila Yerusalemu emihika amakhumi kabili nachirano nachine. Eliira lia nyina liali Abiya omukhaana wa Sakaria.

²Yakhola akali amalahi imbeli wo MWAMI singa kukawe Daudi yakhola.

³Mumwesi kwokhuranga khumuhika kwokhuranga okwa Hesekia yachiachilakhwo oburuchi, yali okhwikula ebilibwa bie Hekalu ebiali nibiekala ma nabilomba obuyia.

⁴Yalanga abesaalisi nende Abalawi okhwebunjikha mumuchitsikwe Hekalu okuli ebukwe wayo

⁵ma nababool'la mbu: “Inywe Abalawi mukhoya okhwetsienula ma musiiye Ehekalu yo MWAMI Nyasaye wabakuka benywe: Muhinie mu Hekalu esindu siosi esitsifwabanga.

⁶Abakuka befwe sibaali abasubilwa khu MWAMI Nyasaye wefwe tawe ma kho bakhola akes'sinyo khuye. Bali okhumulekha ma nibakhupa emikongo chiabwe habundu aha amenyanga.

⁷Bali okhwikala emiliango chie Hekalu, nibahiniamwo ebimeme biamakondi, ma nibabula okhusambila obwali mu Hekalu ya Nyasaye wa Isiraeli kata nende okhuhan'namwo emisango chiokhusambwa.

⁸Khulwe yako OMWAMI yamala atiil'le Yuda nende Yerusalemu oburima, ne aka yakholeye abandu bayo, kachenyisie abandu bosi nende okhubarimula ikholo. Inywe mumanyile yaka bulahi bwene.

⁹Abakuka befwe bali okhwir'rwa mwihe, ne abakhasi befwe nende abaana befwe babeye okhuhilwa singa ababohe.

¹⁰“Nase ndehaan'ne okhukhola indakano no MWAMI, Nyasaye wa Isiraeli kho alekhe okhutsilil'la okhukhutil'la oburima.

¹¹Abaana banje, murakosiakhwo inyinga yosi tawe. Ninywe abo MWAMI yali okhwahula okhusamba obwali khuye nende okhwemel'la abandu mubwekayakayi.”

¹²Ma Abalawi bano nibarula: Okhurula musilibwa sia Kohatsi, Mahatsi omusiani wa Amasai nende Yoeli omusiani wa Asaria. Okhurula musilibwa sia Merari, Kishi omusiani wa Abudi nende Asaria omusiani wa Yehalefeli. Okhurula musilibwa sia Gerishoni, Yoa omusiani wa Simuna nende Edeni omusiani wa Yoa.

¹³Okhurula musilibwa sia Elisafani, Shimuri nende Yeueli, okhurula musilibwa sia Asafu, Sakaria nende Matania.

¹⁴Okhurula musilibwa sia Hemani, Yehueli nende Shimei, Okhurula musilibwa sia Yedutsuni, Shemaya nende Usieli.

¹⁵Abemeli bano babunjikha halala Abalawi basiabwe ma bosi nibesiiya. Ma nibachaaka okhusiiya Ehekalu okhuhesia Amalako ko MWAMI singa omuruchi yali nabalachile okhukhola.

¹⁶Abesaalisi benjila mu Hekalu mukari okhuchisiiya ma nibaleera mumuchitsikwe Hekalu esioba ebindu biosi ebiali ebiomusilo. Abalawi nabo nibabukula ma nibabihila esioba welitookho mwibanda lia Kidironi.

¹⁷Omulimo yikwo kwachiaka khwitukhu liokhuranga khumwesi kwokhuranga ne khwitukhu liamunane bali nibamal'le emilimo chiosi halala nokhusiiya esikoti esili mubwinjil'lo bwe Hekalu. Ma bamala batsilil'le nemilimo khumatukhu kandi munane, okhwola khwitukhu lielikhumi nakhasasaba khumwesi yikwo, olwa barechekha Ehekalu khulwo khwekayakaya.

¹⁸Abalawi baler'ra omuruchi Hesekia ling'ana lino: “Khumal'le okhusiiya Ehekalu yosi, halala nokhusiiya olusambwa lwokhusambilakhwo obwali, nemesa yemikaati emitsienukhu nende ebimanulwa biamwo biosi.

¹⁹Khandi khukalusisie ebimanulwa biosi ebiomuruchi Ahasi yahiniamwo emihika yichio olwa yakhol'la Nyasaye esikala marwi, ma khubisiiyile. Biosi bili imbeli wolusambwa lwo MWAMI.”

²⁰Sila okhukosia obweyangu, omuruchi Hesekia yabunjikha abandu beifuma mwitookho halala ma bosi halala n'naye nibatsia mu Hekalu.

²¹Babukula etsichulukhi tsine natsitaru, namakondi kane nakataru, nebimeme bine nabitaru nende tsimbusi tsine natsitaru singa omusango kwokhuhiinia tsimbi tsiabandu behango homuruchi nende etsiabandu ba Yuda khandi singa omusango kwokhusiiya Ehekalu. Omuruchi yabool'la abesaalisi abolubamba lwa Haruni bahaane emiruko yichio singa omusango khulusambwa.

²²Abesaalisi baranga okhwira etsichulukhi mbelio ma nibalondiakhwo amakondi ma nende ebimeme, ma nibatsukhil'la amatsahi kabuli omusango khulusambwa.

²³Olunyuma babukula tsimbusi nibatsihila khumuruchi nende abekayakayi bandi abali okhura amakhono kabwe khutsimbusi tsana.

²⁴Ma abesaalisi bamala bere tsimbusi yitsio ma nibasundula amatsahi katsio khulusamba singa omusango kwokhuhiinia tsimbi tsiabandu bosi, okhuba omuruchi yali nalachile mbu emisango chiokhusambwa nende emisango chietsimbi tsikholwe khulwa Abaisiraeli bosi.

²⁵Omuruchi Hesekia yalonda amebaalo ako MWAMI yali niyahelesia omuruchi Daudi okhubir'ra mu Gadi omuroobi womuruchi nende okhubir'ra khumuroobi Natsani. Yasinjisia Abalawi mu hekalu nibali namalele nende amatungu,

²⁶ebindu biobukhana singa ebia Daudi yarumikhila. Abesaalisi nabo basinjilamwo nibali netsinzika.

²⁷Hesekia yalaka mbu emisango chiokhusambwa chikholwe; ne olwokhuhaana emisango khwali nikhuchiakanga, abandu bemba tsinyembo tsiokhwitsoomia khu MWAMI, ne abalonyi betsinyembo nabo nibachaaka okhukhupa tsinzika nende ebikhupil'la bindi biosi.

²⁸Abandu bosi abali nibaliho beyonga mubwekayakayi; ne obwembi nende obukhana bwatsilil'la okhwola olwemisango chiali nichisambilwe.

²⁹Ma omuruchi Hesekia nende abandu bosi bamala basikame ma nibekayakaya Nyasaye.

³⁰Omuruchi nende abemeli belihanga balaka Abalawi bembele OMWAMI tsinyembo tsiokhwitsoomia etsia Daudi nende omuroobi Asafu bali okhuhandika. Kho abandu bosi bemba nobusangali obukali nibasikamile hasi ne nibekayakayanga Nyasaye.

³¹Hesekia yamala abool'le abandu mbu, “Luno, olwa mumal'le okhuba abasiyikhu, muleere emisango singa ebihanwa biokhwitsoomia OMWAMI.” Bosi bahulila omuruchi, ne abalala khubo behaana abene okhuleera emiruko chiokhuhanwa singa emisango chiokhusambwa.

³²Baleera etsichulukhi amakhumi kane nakataru, amakondi emia ndala nende ebimeme biamakondi tsimia tsibili okhukhol'lwa omusango kwokhusambwa.

³³Khandi baleera etsichulukhi tsimia tsisasaba namakondi etsielefu tsitaru singa emisango chiabandu okhulia.

³⁴Khulwa mbu abesaalisi sibaali abenji abakhanyal'le okhwira emiruko yichio bonyene tawe, Abalawi babakhonya okhwola olwomulimo kwahwa. Olwene yilwo abesaalisi abenji bali nibetsienuye. Abalawi balinji abasubilwa mukhwetsienula okhuyomba abesaalisi.

³⁵Okhumeeta khumisango echiasambwanga nichili emichima, abesaalisi khandi bali nomulimo kwokhusamba esinya eyahanwanga okhurula khumisango echiabandu balitsanga, nende okwokhutsukha ewaini eyali okhuhanwa halala nemisango chiokhusambwa. Ma nimbwo obwekayakayi bwomu Hekalu bwachiaka obuhia.

³⁶Omuruchi Hesekia halala nabandu bosi basangala, sichila Nyasaye yabakhonya okhukhola yako kosi munyinga indututu.