Read lunyore 2 AKETSINYINGA 3 Bible Online

2 AKETSINYINGA 3 - lunyore bible

2 AKETSINYINGA 3

¹Omuruchi Daudi, samwana Solomoni yali niyarechekha habundu hokhwombokha ehekalu. Habundu tsana hali mu Yerusalemu khusikulu sia Moria, aho MWAMI yabisukhila Daudi, ne niho aha Arauna Omuyebusi yali niyarumikhila singa halutse. Omuruchi Solomoni yachaaka okhwombokha ehekalu

²mumwesi kwakhabili khumuhika kwakhane olwa yali omuruchi.

³Ehekalu eyomuruchi Solomoni yombokha yali noburambi obuhela etsimiita amakhumi kabili natsine natsitaru nende obubambukhu obuhela etsimiita tsirano natsine.

⁴Esikoti esiali mubwinjil'lo siali esibambukhu okhuhelana nende obubambukhu bwe Hekalu mbu esimita tsirano natsine ne okhutsia ikulu siali noburambi obuhela etsimiita amakhumi karano natsine. Mukari mwesikoti, obwelu bwasio bwahomwa nende etsahabu inzele.

⁵Ne inyumba yene ingali yafunikhwakhwo nende etsahabu isiyikhu, ne mwang'onibwa nemisaala chiamasindu nende eminyololo.

⁶Omuruchi yang'onia Ehekalu namachina kobukusi akobukondo obulahi nende etsahabu eyahinibwa Parivaimu.

⁷Yarumikhila estahabu tsana okhufunikha amasisi ke Hekalu, nende emikul'lo chiayo nende ebiniinilo biayo nende khumiliango chiayo. Abafundi bali okhung'oola amang'oole kabakerubi khumasisi.

⁸Esikoti siomukari esilangwanga mbu Habundu Hatsienukhu Okhusila, siali noburambi obuhela etsimiita tsirano natsine khandi obubambukhu obuhela etsimiita tsirano natsine obuhelanga nende oburambi bwe Hekalu yosi. Esitani okhuyomba amakhumi kabili etsietsahabu tsiarumikhilwa okhufunikha amasisi ka Habundu Hatsienukhu Okhusila;

⁹ne etsiguramu tsimia tsirano namakhumi karano nakane tsietsahabu tsiarumikhilwa okhulomba emisumari, khandi amasisi kebikoti bietsikorofa biafunikhwa netsahabu.

¹⁰Khandi omuruchi yalaka abakholibe balombe amakerubi kabili okhurula khusibia ma bakafuunikhe netsahabu ne babare Habundu Hatsienukhu okhusila.

¹¹Tsimbala tsiamakerubi yako tsiosi nitsibambukhile tsiali etsihela etsimiita tsirano natsine. Olubaha l'lala olwelikerubi elala lwali etsimiita tsibili nende ebitonye bibili khumiita ne lwola khwisisi lieinyumba. Khandi olubaha lundi lwahela mbwo nilutilana nende olubaha lwelikerubi lindi.

¹²Olubaha lwelikerubi lindi lwahela etsimiita tsibili nebitonye b'bili khumiita nalwo khandi lwola khwisisi lieinyumba. Olubaha lundi olwelikerubi liakhabili lwahela etsimiita tsibili nebitonye b'bili khumiita ma nilwongana nende olubaha lwelikerubi liokhuranga.

¹³Tsimbaha tiamakerubi yako tsiabambukha ma nitsihela etsimiita tsirano natsine; ne amakerubi tsana kasinjila khubilenje biako nikahengele mubwelu mukari.

¹⁴Epasia eya Habundu Hatsienukhu Okhusila yalukhwa okhurula khuingubo yekatani nende ingubo yindi eyenikhwa murangi ya buluu, nende isembe, neinzakhanyu, nelikhwo amang'oole kamakerubi nikanabilwakhwo.

¹⁵Omuruchi khandi yalomba etsisiilo tsibili, ne buli esiilo ndala yali noburambi bweikulu obuhela etsimiita likhumi natsirano nende enusu, natsira imbeli womu Hekalu. Ekofia eyali khubuli esiilo yahela etsimiita tsibili nebitonye b'bili khumiita.

¹⁶Yalomba eminyololo singa echiomwikosi nachira khumirwe chiechisiilo, naching'oonia nende amakomamango emia ndala nakara khuminyololo tsana.

¹⁷Yamala asinjisie etsisiilo yitsio mubwinjil'lo bwe Hekalu, ndala khumukhono musaatsa ne eyindi khumukhono mukhasi. Eyali khumukhono musaatsa yalangwa mbu Yakini ne eyali khumukhono mukhasi yalangwa mbu Boasi.