Read lunyore 2 AKETSINYINGA 30 Bible Online

2 AKETSINYINGA 30 - lunyore bible

2 AKETSINYINGA 30

¹Hesekia yarumila abandu bosi ba Isiraeli nende Yuda ling'ana khandi nahandika etsibarwa khubandu ba Efuraimu nende Manase mbu betse Yerusalemu muhekalu yo MWAMI khulwo khulia lisabo lie Pasaka yo MWAMI Nyasaye wa Isiraeli.

²Omuruchi nende abemeli baabe nende abomukanda bosi abali mu Yerusalemu balola mbu balie lisabo lie Pasaka mu mwesi kwakhabili.

³Sibaali abanyala okhulia lisabo yilio munyinga yalio tawe sichila sibaali nende abesaalisi abali nibesiiyile abahela tawe khandi abandu sibaali nibetsele Yerusalemu tawe.

⁴Omuruchi halala nabandu bosi balola namalahi

⁵kho bamala nibalanga Abaisiraeli bosi okhurula khu Dani elubeka lwe esinyolu okhwola Berisheba elubeka lwe nandete, betse halala mu Yerusalemu balie lisabo lie Pasaka okhulondokhana nende Amalako, mubwinji okhuyombakhwo amatukhu kandi.

⁶Kho abarumwa nibalakwa nende omuruchi nabakhulundu baabe okhutsia Isiraeli nende Yuda nende Yerusalemu nende omulango kuno: “Inywe abandu ba Isiraeli, kalukhe khu MWAMI, Nyasaye wa Aburahamu, Isaka nende Yakobo, khe abe onyala okhukalukha khu inywe abasikala, abahonokokha okhurula mumakhono ka abaruchi ba Asiria.

⁷Murabba singa abakuka benywe nende Abaisiraeli basienywe abaraali abasubilwa khu MWAMI Nyasaye wabwe tawe. Singa obwa munyala okhulola yabahelesia esinyasio esikali.

⁸Murabba abesikala marwi singa bali tawe, nebutswa muhulile OMWAMI. Mwitse mu Hekalu eli Yerusalemu eyo MWAMI Nyasaye wenywe yatsienula khulwe inziayo, ma mumwekayakaye kho alekhe okhuba nelirima n'nenywe.

⁹Nimwakhamukalukhila OMWAMI, khe nilwo olwe yabo ababukula abekho benywe singa ababohe bakhababeela tsimbabasi ma babalekhe bakalukhe mungo mwabwe. OMWAMI Nyasaye wenywe nowesirenda khandi owetsimbabasi ne nimwakhakalukha khuye, yakhamuhuchil'la.”

¹⁰Abarumwa batsia mubuli litookho musibala sietsinzibulo tsia Efuraimu nende Manase, kata okhwola elubeka lwe esinyolu mubolwibulo lwa Sabuloni, nebutswa abandu babatsekhel'la nende okhubanyokhosia.

¹¹Ne kata mbwo balimwo abandi mutsinzibulo tsia Asheri, Manase nende Sabuloni abahuchil'la okhutsia Yerusalemu.

¹²Khandi Nyasaye yali nakholanga emilimo mu Yuda khulwo okhubahambania abandu mulinaaya liabwe khulwo okhuhulila lichoomo lio MWAMI khulwo okhulonda amalako komuruchi nende abakhulundu baabe.

¹³Abandu abenji bebunjikha mu Yerusalemu mumwesi kwakhabili okhwitsusia Lisabo lio Omukaati okuralimwo amamela.

¹⁴Babukula tsisambwa tsiosi etsiarumikhilwanga mu Yerusalemu khulwo okhuhan'nakhwo emisango nende okhusambilakhwo obwali nibatsifuuba mwibanda lia Kidironi.

¹⁵Ne litukhu lielikhumi nakhane liomwesi yikwo beera ebimeme biamakondi khulwo omusangokwe Pasaka. Abesaalisi nende Abalawi abaraali nibesiyile bali nesimba murwe esikali ma nikachila nibehaana khu MWAMI kho babe abanyala okhuhaana emisango emisambe mu Hekalu.

¹⁶Babukula obukono bwabwe mu Hekalu okhulondokhana nende amebaalo akali mu Malako ka Musa, omundu wa Nyasaye. Abalawi bahaana amatsahi kemisango khubesaalisi, abanyul'lusia khulusambwa.

¹⁷Sichila abandu abenji sibaali abasiyikhu tawe, sibaali abanyala okhwira ebimeme biamakondi bie Pasaka tawe, kho Abalawi bamala nibaber'ra ma nibahaana ebimeme yibio khu MWAMI.

¹⁸Okhumeetakhwo abenji abali nibetsele okhurula mutsinzibulo tsia Efuraimu, Manase, Isakari, nende Sabuloni sibaali nibesiyile tawe kho betsusianga Epasaka nibarali habwene tawe. Omuruchi Hesekia yahaana amasaayo kano khubo:

¹⁹“E OMWAMI, Nyasaye wabakuka befwe, khulwo obulahi bubwo babeele yabo abakhwekayakayanga nomwoyo kwabwe kwosi kata nikali sibali abasiyikhu okhulondokhana namalako tawe.”

²⁰OMWAMI yakalusia amasaayo ka Hesekia, yabeela abandu ne siyabasaalisia tawe.

²¹Khulwa amatukhu kane nakataru abandu abebunjikha mu Yerusalemu, betsusia Lisabo lio Omukaati kuralimwo amamela nende obusangali obukali, ne buli litukhu Abalawi nende abesaalisi bafumia OMWAMI netsingufu tsiabwe tsiosi.

²²Hesekia yetsoomia Abalawi khulwo obulwenyukhu bwabwe bwokhwemel'la obwekayakayi bwo MWAMI. Inyuma wamatukhu kane nakataru nibamal'le okhuhaana emisango khulwo khufumia OMWAMI, Nyasaye wabakuka babwe,

²³bosi bahuchil'la okhukhola lisabo khulwa amatukhu kandi karano. Kho bakhola lisabo nobusangali obukali.

²⁴Omuruchi Hesekia yahaana etsichulukhi ehelefu ndala nende amakondi etsielefu tsine natsitaru khulwa abandu okhwira nende okhulia ne abakhulundu bahaana etsichulukhi tsindi elefu ndala nende amakondi etsielefu likhumi. Abesaalisi abenji bakhola omulukha kwokhwesiiya.

²⁵Kho buli mundu yali nobusangali. Abandu ba Yuda, abesaalisi Abalawi, abandu abetsa okhurula esinyolu, nende abandu bosi abacheni abali nibamenya musibala sia Isiraeli nende Yuda khulwe inziayo bosi basangala.

²⁶Litookho lia Yerusalemu lietsulamwo obusangali sichila ling'ana lifwana mbu liali nilisili okhwekholekhakhwo okhurula mumatukhu komuruchi Solomoni, omusiani wa Daudi tawe.

²⁷Abesaalisi nende Abalawi bareebela abandu tsikhabi tsio MWAMI. Nyasaye nali hango hahe mwikulu yahul'la amasaayo kabwe ma nakahuchil'la.